Pamočnik Kanapackaj kinuŭ moładź, aburanuju zakonam ab pryzyvie. Nieviadoma, dzie sabranyja hramadoj hrošy
Dziŭnaja situacyja razhortvajecca z palityčnaj aktyŭnaściu vakoł źmienaŭ u pryzyŭnoje zakanadaŭstva.
Situacyja była takaja: moładź, niezadavolenaja pryniaćciem papravak, pačała hurtavacca i dzialicca dumkami ŭ telehram-čacie @ProtestBY Chat. Jon, jak nieŭzabavie vyjaviłasia, byŭ stvorany i administravaŭsia Dzianisam Cichanienkam — pamočnikam deputatki Hanny Kanapackaj.
Dzianis prezientavaŭ siabie jak demakratyčnaha aktyvista i pierakonvaŭ, što hetaja tema jamu nie abyjakavaja, tamu jon dapamahaje studentam.
Jon staŭ takim mientaram dla ludziej, jakija ŭpieršyniu sutyknulisia z patrebaj vykazać svaju niazhodu i šukali kansultatyŭnaj padrymki ŭ mietadach dy srodkach. Status pamočnika deputata rabiŭ na ich uražańnie.
Cichanienka dapamoh vypracavać płan pratestnaj aktyŭnaści i zapuściŭ zbor srodkaŭ na jaje finansavańnie — srodki pieraličvalisia na jaho rachunak u sistemie PayPal, pryjšło niedzie 1500 rubloŭ.
Ale samyja aktyŭnyja ŭdzielniki pačali źviartać uvahu, što «ad Cichanienki sychodzić zanadta šmat bałbatni», čas hublajecca, a sama tema ŭvohule sychodzić u bok i padmianiajecca zaklikami Cichanienki padtrymać jaho na vybarach. Bo, maŭlaŭ, sa źmienami ŭ zakon treba zmahacca, majučy zakanadaŭčuju ŭładu.
«Cichanienka abiacaŭ arhanizavać mitynh, kali ŭ čacie budzie 1000 čałaviek — jon mieŭsia być hałoŭnym. Ale nie strymaŭ słova i nie dapamoh, navat kali ŭ im było ŭžo 2000 čałaviek! Biudžet na aktyŭnaść jon praličyŭ u pamiery 35 jeŭra na miesiac, choć my sabrali našmat bolej, ale bolš jon nie pieraličvaŭ. Potym pačaŭ banić niezadavolenych, ale zrabiŭ vyhlad, što sam bolš nie kiruje čatam, a «addaŭ» jaho inšamu čałavieku», — vykazvajuć pretenzii da Cichanienki aktyvisty čata ProtestBY.
Praŭda, vielmi chutka vyjaviłasia, što toj «inšy čałaviek» — heta alter-eha Cichanienki. U pamočnika Kanapackaj jość nieruchomaść u Italii, jon jaje zdaje, pakidajučy svaje italjanskija kantakty. Kali ŭvieści hetyja kantakty ŭ Telehram, jon pakaža, što heta — kantakt «novaha administratara».
Bačačy ŭsio heta, častka samych aktyŭnych ludziej adkałołasia ad čata Cichanienki i stvaryła paralelny @pozvachat.
«Tut sabralisia tysiačy chłopčykaŭ i dziaŭčynak, jakich cikavić vyklučna tema admieny zakona ab adterminoŭcy. Palityčnyja ambicyi čałavieka, jaki samavolna abviaściŭ siabie pradstaŭnikom pratestu, moža dyskredytavać ruch ahułam. My nie suprać inicyjatyvaŭ Dzianisa, źviazanych mienavita z hetym zakonam, i budziem usialak ich padtrymlivać. Adzinaja pryčyna našaha «sieparatyzmu» — žadańnie zaścierahčy siabie i svajo imia ad palityčnych hulniaŭ ludziej, jakich my zanadta mała viedajem. U internecie zanadta šmat infarmacyi pra toje, što Dzianis Cichanienka stała pražyvaje za miažoj. Hety fakt nie dadaje matyvacyi udzielnikam ruchu bačyć u jaho asobie svajho «pres-sakratara», — patłumačyli stvaralniki novych inicyjatyŭ «Našaj Nivie».
Taksama aktyvisty patłumačyli, što Cichanienka ad imia svajho alter-eha raskazvaŭ, što padaŭ zajaŭku na praviadzieńnie pratestnaj akcyi ŭ Minharvykankam. Ale nichto toj zajaŭki, aproč fiktyŭnaha administratara, nie bačyŭ.
A što sam Cichanienka? U razmovie z žurnalistam «Našaj Nivy» jon śćviardžaŭ, što nie viedaje pra kanflikt.
Ale heta abviarhajecca faktami — zaklik nie padtrymlivać «sieparatystaŭ» byŭ raźmieščany ŭ telehram kanale @ProtestBy, jaki, sa słovaŭ Cichanienki, kantralujecca im. Sam pisaŭ dy nie bačyŭ? Paśla razmovy z žurnalistam toj dopis z kanała źnik.
Taksama Cichanienka zapeŭnivaŭ, što italjanski numar, na jaki zarehistravany «novy administratar» čata, jamu nie naležyć.
Ahułam, Cichanienka nie zdoleŭ patłumačyć, navošta i kamu «pieradaŭ» kantrol nad čatam.
«Vy viedajecie, kamu pieradali čat?», — spytali my.
«Asabista ja nie viedaju hetaha čałavieka, asabista nichto nikoha nie viedaje», — skazaŭ jon.
Ale paśla razmovy Cichanienki z «Našaj Nivaj» pratestny čat na bolš čym 2000 čałaviek… źnik! Jon byŭ vydaleny administrataram ź italjanskim numaram Dzianisa Cichanienki.
Aktyvisty ž, jakija ŭtvaryli paralelnyja inicyjatyvy, bačać u pavodzinach Cichanienki hłupstva, jakoje naradžaje pytańni jak da jaho asabista, tak i da jaho patrona — Hanny Kanapackaj.
«Było zrazumieła, što jon płanuje ŭvieś ruch skarystoŭvać potym dla svaich palityčnych met, ale ž nie treba rabić heta tak rana i tak adkryta! Dy i hety jaho chod — zavieści ananimny akaunt, dać jamu pravy na čat, a potym kazać što jon nie pry spravach — taksama vielmi durny. Jaho tut nie škada, škada Kanapackuju z takimi pamahatymi», — skazaŭ adzin sa stvaralnikaŭ paralelnaha čatu aktyŭnaści.
Paśla vydaleńnia čata źviazacca ź Cichanienkam pa mabilnym niemahčyma, nie mohuć źviazacca ź im nie tolki žurnalisty, ale i aktyvisty.
Pry hetym na rachunkach Cichanienki zastajucca hrošy, sabranyja ludźmi — kala 500 rubloŭ.
Inšaja častka hrošaj pajšła metava — na apłatu pasłuh milicyi i chutkaj na pikietach.
Čytajcie taksama. Pamočnik Kanapackaj pravodzić u internecie «prezidenckija vybary». Uhadajecie, chto pieramahaje?
«Usie bačyli, što jamu padabajecca Nataša, i dumali: «Nu kali vy ŭžo?!» Były palitviazień Łukša raskazaŭ pra svaje adnosiny z Ejsmantami15
Kamientary