Biełaruski ajcišnik štodzień śniedaje bčb-tvarahom i zrabiŭ z hetaha błoh — pahutaryli ź im
IT-śpiecyjalist Jan u jakaści dapaŭnieńnia da ranišniaha pryvitańnia ŭ čacie pačaŭ adpraŭlać siabram fotazdymki svaich śniadankaŭ. Kab fud-karcinki nie hublalisia, u niejki momant jon vyrašyŭ stvaryć dla ich asobnuju staronku ŭ Instahramie. Asablivaść śniadankaŭ u tym, što ich vid nie mianiajecca: kožny dzień heta tradycyjnyja tvaroh i vareńnie.
Raspytali aŭtara staronki «Śniadanki novaha dnia», ci nie nadakučyła jamu takoje spałučeńnie i jakuju zvyšzadaču niasie publičnaja demanstracyja svajoj ježy.
Skrynšot sa staronki @sniadanki.log.
Jan raskazvaje, što tvaroh z sočyvam i šklanka vady — heta amal zaŭsiody pieršaja ježa dla jaho ranicaj. Pry čym, vareńnie roznaje: to žuravinavaje, to kłubničnaje, to kiziłavaje ci malinavaje. Vybar bahaty.
«U heta cpačatku nie vieryli navat znajomyja. Było šmat pytańniaŭ: ci na samaj spravie heta moj śniadanak, ci nie nadakučvaje kožny dzień jeści adno i toje ž, a moža, śniadanki paŭtarajucca? I hetak dalej, — kaža chłopiec. — Prosta praca z domu nakładvaje svoj adbitak na śniadanki i abiedy — treba chutka i smačna, dy i ja čałaviek zvyčki. Paśla tvarahu mahu źjeści niejkuju siezonnuju sadavinu».
Na abied, darečy, fud-błohier lubić narezać sabie čyrvonych pamidoraŭ i zapravić ich śmiatanaj — fotazdymki takich sałataŭ taksama možna znajści na staroncy. Heta adsyłka da viadomaha rolika ź inžynieram Anatolem Šałkovičam.
Jan nazyvaje svoj błoh «žartam» i daninaj lubimym koleram biełarusaŭ, ale jon daŭno staŭ niečym bolšym — sposabam padtrymki siabroŭ i nieznajomych padpisantaŭ.
«Kali praciahvajecca varjactva, prabivajecca čarhovaje dno i dzień za dniom vy stanoviciesia zakładnikam drennych navin, tady patrebny niejki pazityŭ. I voś hetyja śniadanki — heta niejkaja pazityŭnaja stabilnaść dla nas», — kamientuje surazmoŭca.
Darečy, adnym sa svaich lubimych desiertaŭ Jan nazyvaje kłubnicy sa śmiatanaj.
Nijakich płanaŭ pa raźvićci abo manietyzacyi błoha ajcišnik nie maje: «Heta prosta dla «fanu».
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii19
Kamientary