Łukašenka i Pucin zastalisia biez padtrymki — ekśpiert pra vyniki samita ADKB

Sustreča lidaraŭ krain ADKB zafiksavała surjozny pravał zamiežnaj palityki Rasii. Amal try miesiacy idzie vajna RF suprać Ukrainy. Padzieja, jakaja vyklikała mižnarodny «ziemlatrus». Na jaje adreahavali ŭ AAN, roznych mižnarodnych arhanizacyjach (spartovych i inš.).

I tolki ADKB — vajskova-palityčny sajuz, stvorany RF, — maŭčała.

Łukašenka miarkuje, što Ukraina pieršaj napała na Biełaruś i Rasiju, tamu, pavodle Statutu ADKB, inšyja čalcy arhanizacyi musili b pryjści na dapamohu «achviaram». Jon publična zaklikaŭ sajuźnikaŭ sabracca i surjozna pahavaryć. I sapraŭdy, doŭhaje maŭčańnie ADKB stanaviłasia zanadta hučnym i zaŭvažnym.

Mahčyma, hetaje maŭčańnie praciahnułasia b jašče davoli doŭha, kali b nie padaśpieŭ jubilej stvareńnia hetaj arhanizacyi — 30 hadoŭ. Tut chočaš nie chočaš, a śviata abaviazvała vykanać patrebny rytuał, sabracca, pryniać niejkuju zajavu.

I raptam vyjaviłasia, što sam farmat hetaha mierapryjemstva vyklikaŭ roznahałośsi. Jak jaho nazvać? Na sajcie ADKB mierapryjemstva nazvanaje «sustrečaj lidaraŭ dziaržaŭ — členaŭ ADKB, pryśviečanaj jubileju». A ŭračystaja sustreča nie praduhledžvaje niejkaha aficyjnaha paradku dnia, pryniaćcia adpaviednych rašeńniaŭ. Na aficyjnym sajcie Łukašenki mierapryjemstva nazvanaje «samitam ADKB». A dakumient, jaki byŭ pryniaty pa vynikach sustrečy, nazvany zajavaj «Rady kalektyŭnaj biaśpieki ADKB». Takim čynam, pytańnie, što heta było, tak i zastałosia adkrytym.

Vielmi admietnymi byli vystupy lidaraŭ dziaržaŭ-udzielnic ADKB. Pucin apaviadaŭ pra vierałomny Zachad, ZŠA, «nacysckuju» Ukrainu. I aściarožna adznačyŭ «važnaść samaj ciesnaj kaardynacyi pamiž udzielnikami ADKB u śfiery źniešniaj palityki, uzhodnienych dziejańniaŭ u AAN i na inšych šmatbakovych placoŭkach».

A Łukašenka, uśled za Pucinym, mała taho što imknuŭsia pierakanać kiraŭnikoŭ ADKB, što arhanizacyja pavinna supraćstajać NATO, pieratvarycca ŭ Anty-Zachad, dyk jašče i pierajšoŭ prosta da paprokaŭ na adras sajuźnikaŭ:

«Adnak ci možna siońnia śćviardžać, što my ŭ našaj Arhanizacyi razam i ŭsio hetak ža źviazanyja suviaźziu salidarnaści i padtrymki? Jak pakazvajuć apošnija padziei, z našaha punktu hledžańnia (moža, ja pamylajusia), zdajecca, nie… Na fonie samaha žorstkaha, ašalełaha sankcyjnaha presinhu z boku kansalidavanaha Zachadu pastułaty adzinstva i salidarnaści spracoŭvajuć daloka nie zaŭsiody. Heta bačna, na žal, pa hałasavańni ŭ mižnarodnych arhanizacyjach. Z maŭklivaj zhody našych partnioraŭ Biełaruś i Rasija nasupierak usim zakonam mižnarodnaha žyćcia pa kapryzie Zachadu šalmujucca i vyklučajucca ź mižnarodnych arhanizacyj».

I što ž adkazali lidary Kazachstana, Kyrhyzstana, Tadžykistana, Armienii? Z hledzišča pažadańniaŭ Pucina i Łukašenki — ničoha. A ŭ adkaz — cišynia.

Jany nie zaŭvažyli vierałomnaha NATO, «nacysckaj» Ukrainy, havaryli pra svajo. Pra patencyjnuju pahrozu z boku Afhanistana. Lidar Armienii Pašynian, jak zaŭsiody, uzhadaŭ svoj kanflikt z Azierbajdžanam.

I ŭ vynikovaj zajavie ničoha nie havorycca navat pra palityčnuju padtrymku Rasii i Biełarusi ŭ supraćstajańni Ukrainie i Zachadu.

I hetaje maŭčańnie vielmi krasamoŭnaje. Padajecca, heta surjozny pravał zamiežnaj palityki Rasii. Pa sutnaści, jana zastałasia biez sajuźnikaŭ. Dakładniej, z adzinym sajuźnikam.

I paśla vajny Rasii z Hruzijaj u 2008 hodzie, i paśla zachopu Rasijskaj Fiederacyjaj Kryma i Danbasa ŭ 2014-m pazicyja ADKB była choć i aściarožnaja, adnak davoli zaŭvažna prarasijskaja. Ciapier situacyja inšaja. Čalcy ADKB nie rušyli ŭśled za Biełaruśsiu. I tamu jość šerah pryčyn.

Najpierš, Pucin pierad napadam na Ukrainu zajaviŭ, što nie pryznaje vynikaŭ raspadu SSSR, tych miežaŭ, jakija byli zafiksavanyja ŭ 1991 hodzie. I abviaščaje svajo histaryčnaje, maralnaje, a značyć, i palityčnaje prava na pierahlad taho, što jon nieadnarazova nazyvaŭ «hieapalityčnaj katastrofaj». Prezident Rasii miarkuje, što pryjšoŭ čas adnavić spraviadlivaść, viarnuć ruskija ziemli na histaryčnuju radzimu. Tamu

kiraŭniki inšych postsavieckich dziaržaŭ bajacca paŭtaryć los Ukrainy.

Akramia taho, biesprecedentna rašučyja i žorstkija zachodnija sankcyi suprać Rasii mieli dva nastupstvy. Z adnaho boku, postsavieckija krainy nie chočuć svarycca z Zachadam, jaki prademanstravaŭ siłu. Nikomu nie chočacca trapić pad sankcyi.

A ź inšaha boku, sankcyi mocna asłablajuć Rasiju. Jana nie moža być paŭnavartasnym zastupnikam, sponsaram i harantam biaśpieki dla krain ADKB. Jaho členam treba šukać inšyja varyjanty.

«Nas zaŭtra moža nie być» — Łukašenka na samicie ADKB

• 83
• 0
• 6
• 2
• 1
• 1
• 1
• 0