Małdova admoviłasia vydać Biełarusi zatrymanaha ŭ joj ukrainskaha deputata
Hienprakuratura Małdovy admoviłasia ekstradavać u Biełaruś deputata Viarchoŭnaj rady Ukrainy Jaŭhiena Jakavienku, jakoha zatrymali na małdaŭskaj miažy 5 červienia. Pra heta 7 červienia paviedamiła pres-słužba prakuratury Małdovy, piša Radyjo Svaboda.
«Pryčyny admovy ŭ ekstradycyi abumoŭlenyja statusam hetaj asoby jak člena Viarchoŭnaj rady Ukrainy, jaki pieramoh na vybarach u 2019 hodzie ŭ Danieckim rehijonie, u kantekście hieapalityčnaj situacyi ŭ rehijonie», — adznačyli ŭ prakuratury.
Małdaŭskaja prakuratura padazraje, što kali Jakavienku ekstradujuć u Biełaruś, praces suprać jaho nie budzie spraviadlivym. Tamu jana rasparadziłasia adpuścić ukrainskaha deputata.
Jakavienka znachodzicca ŭ mižnarodnym vyšuku na zapyt Biełarusi. U Biełarusi ŭkrainskaha deputata padazrajuć u chabarnictvie i karupcyi.
U 2001 hodzie Jaŭhien Jakavienka zasnavaŭ handlova-pramysłovuju kampaniju «Alkon». Viadoma, što kampanija Jakavienki była pasiarednicaj u pastaŭkach sielskahaspadarčaj pradukcyi, paliva, mietałaŭ i ŭhnajeńniaŭ, a taksama zajmałasia handlem hruzavym aŭtamabilnym transpartam. Pa sutnaści, jahonaja dziejnaść mahła być źviazanaja i z prasoŭvańniem biełaruskaj pradukcyi na ŭkrainskim rynku.
Siarod rezidentaŭ svabodnych ekanamičnych zon Biełarusi, abnarodavanych na adpaviednych sajtach, imia Jaŭhiena Jakavienki i nazva jahonaj kampanii nie zhadvajucca. Ale ź vidaŭ dziejnaści kampanii, jakuju biznesmien paśla vybrańnia ŭ parłamient pierapisaŭ na žonku Taćcianu, vynikaje, što ŭ śfieru jahonych intaresaŭ mahli trapić biełaruskija naftapradukty, uhnajeńni i hruzavyja aŭtamabili.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud28
Kamientary