U Minsku adkryłasia jašče adna kaviarnia stylnaha farmatu — dla amataraŭ knih i kavy
U Minsku dabaviłasia jašče adna ŭstanova, dzie možna nie tolki papić kavy, ale i pačytać knihi. U starym, davajennym domie na vulicy la Trajeckaha adkryłasia stylnaja kaviarnia «Marks», piša «Anłajnier».
Dzie znachodzicca kaviarnia?
Łakacyja ŭ jaje sapraŭdy charakternaja. Ustanova raźmieščanaja na pieršym paviersie staroha piacipaviarchovika, pabudavanaha ŭ styli kanstruktyvizm u kancy 1930-ch. U 3-4-pakajovych kvaterach žyli pieravažna aficerskija siemji. Adna z hałoŭnych fišak kvater — umantavanyja ŭ padłohu basiejny, jakija zamianiajuć zvyčajnyja vanny. Padčas vajny dom byŭ razburany, ale paźniej jaho adnavili ŭ vyhladzie, nabližanym da aryhinała.
Doŭhi čas na pieršym paviersie budynka pracavała krama «Radziviłaŭski». Adnak u 2021-m sietka začyniłasia, pamiaškańnie vyzvaliłasia, i ŭ nastupnym hodzie źjaviłasia infarmacyja, što jaho płanujuć zdać u arendu. Uviesnu ŭ prastory, što pustavała, pačali rabić ramont. A paru tydniaŭ tamu prylacieła navina: na miescy byłoha praduktovaha mahazina adkryjecca kaviarnia «Marks». U sieradu jana pačała pracavać u testavym režymie.
Što saboj ujaŭlaje kaviarnia?
Pa kancepcyi kaviarnia kardynalna nie adroźnivajecca ad inšych z takoj ža šyldaj, raźmieščanych na vulicach Kisialova i Marksa. Tut usio hetak ža možna adpačyć, vypić kavy, zamović jakuju-niebudź słodyč i kupić litaraturu: bijahrafii znakamitaściaŭ, knihi pa architektury, historyi, mastactvie i kiniematohrafie.
— Pry hetym usie try našy ŭstanovy roznyja. U hetaj vy možacie pravieści dziełavyja pieramovy, na Kisialova — prosta pasiadzieć viečaram i vypić ciopłaha čaju, a na Marksa, 11 — pamaryć i stvaryć niejki svoj prajekt. Atmaśfiera ŭsiudy roznaja, ale sutnaść adna: kava plus knihi, — tłumačyć supracoŭnica ŭstanovy Valeryja.
Što tyčycca interjera, to prama zaraz jaho ŭpryhožvajuć tvory biełaruskaha skulptara Volhi Orsik. U budučyni ŭ kaviarni płanujuć vystaŭlać pracy i inšych biełaruskich mastakoŭ i skulptaraŭ.
Naviedvalnikaŭ sustrakaje praca fatohrafa Aleny Koršak, apublikavanaja niekalki hadoŭ tamu ŭ italjanskim Vogue.
Piarojdziem da napojaŭ i ježy. Jak raspaviała Valeryja, dla kaviarni kupili sučasnuju kavamašynu Victoria Arduino, jakaja moža samastojna varyć filtr-kavu.
— U nas jość kantaktny bru-bar, dzie možna pahutaryć z barysta, jon padbiare kavu pa vašych pažadańniach i na vašych vačach pryhatuje napoj. Vy sami vybirajecie ziernie i sposab zavarvańnia: varonka V60, aerapres, paśla źjavicca kiemieks (ručnaja kavavarka; dziakujučy ščylnamu filtru, kava atrymlivajecca čystaj, ale davoli mocnaj z-za praciahłaha kantaktu z vadoj. — Zaŭv. Onlíner). Nu i ŭ nas jość batč-bru i filtr-kava, — kaža surazmoŭca.
Niekalki słoŭ pra ceny:
— letnija napoi (ajs-łate, ajs-matču, espresa-tonik, bambł, matča-tonik, chałodny čaj karkade, afahata) — ad 6,5 da 9,5 rubla;
— limanady — 9 rubloŭ;
— čornaja kava (amierykana, espresa, filtr, V60 — ad 5 da 8 rubloŭ;
— kava z małakom (kapučyna, fłet, pikała, łate, raf, matča-łate) — ad 5 da 12 rubloŭ.
Va ŭstanovie taksama možna zamović bułački, napaleon, kiš albo tvarožnik. Praź niekalki tydniaŭ abiacajuć uklučyć u mieniu śniadanki. «Marks» prymaje naviedvalnikaŭ z 8 da 22, ale z časam całkam realny pierachod na hrafik da 23 hadzin.
Ciapier čytajuć
U Minsku kidajuć budavać treciuju liniju mietro ŭ Zialony Łuh. Usie siły pojduć na čaćviortuju, kalcavuju15
Kamientary