U Haradku da Dnia biełaruskaha piśmienstva pastavili «pomnik «Bukvariu»
Anansavałasia, što heta budzie «aryhinalny art-abjekt u vyhladzie litar biełaruskaha ałfavita — z «Ŭ» i «I» — tak pisała viciebskaja dziaržaŭnaja hazieta «Viťbiči». Adnak ź bietonnych litar składajecca ruskaje słova «Bukvaŕ».
U Haradku (Viciebskaja vobłaść) 2-3 vieraśnia adznačajecca XXX Dzień biełaruskaha piśmienstva. Da hetaj padziei ŭ Vieranicynskim skviery ŭstalavali skulpturnuju kampazicyju ź litar kiryličnaha ałfavitu.
Dla tych, chto sam nie zmoža skłaści słova z naboru bietonnych litar, na pastamiencie prymacavali šyldačku: «BUKVAŔ». Pośvieŝajetsia XXX Dniu biełorusskoj piśmiennosti». U nadpisie pamyłka: pavodle hramatyki ruskaj movy, treba pisać «pośviaŝajetsia».
Miarkujučy pa ranišnim repartažy ANT, pamyłku zaŭvažyli i vypravili, piša «Lusterka».
Da słova, na ŭvachodzie ŭ Vieranicynski skvier, nazvany tak u pamiać pra ziemlaka Kanstancina Vieranicyna, aŭtara viadomaj satyryčnaj paemy «Taras na Parnasie», taksama źjaviłasia novaja skulpturnaja kampazicyja da Dnia biełaruskaha piśmienstva. Jana zroblena z žaleznaj blachi i ŭjaŭlaje saboj stos knih, jaki «raście» z kamla dreva.
Dapaŭniaje kampazicyju šylda ŭ vyhladzie papiarovaha śvitka z «nieržaviejki», na jakim napisana nazva skviera. «Aŭtarami źjaŭlajucca Juryj Tatarynovič, Alaksandr Zielankoŭski i Haradocki rajonny vykanaŭčy kamitet», — paviedamlaje hazieta «Haradocki vieśnik».
Juryj Tatarynovič — dyrektar hłybockaha pradpryjemstva «V ažurie», jakoje niepasredna i vyrabiła kampazicyju pad nazvaj «Dreva biełaruskaha piśmienstva». Sioleta ŭ sakaviku sud Hłybockaha rajona aštrafavaŭ pradprymalnika na 2 590 rubloŭ (70 bazavych vieličyń) za tak zvanaje «niesankcyjanavanaje pikietavańnie ŭ internecie»: Tatarynovič byŭ pakarany za toje, što na svaju avatarku ŭ fejsbuku nakłaŭ malunki ŭkrainskaha ściaha i histaryčnaha biełaruskaha hierba «Pahonia». Svaje viny asudžany nie pryznaŭ.
U Haradku ŭłady vyznačylisia z nazvaju skviera, jaki źjavicca da Dnia biełaruskaha piśmienstva
Rabotniki kultury i adukacyi Haradoččyny razmalavali prypynki da Dnia biełaruskaha piśmienstva. I ŭzialisia za damy
U Haradku abmiarkoŭvajuć nazvu skviera, dzie staić skulptura hieroja paemy «Taras na Parnasie». Prapanovy — pa-biełarusku
Łukašenka pra adklučeńnie internetu ŭ 2020-m: Kali heta paŭtorycca, adklučym zusim25
Kamientary