Favarytka Łukašenki i Čyža — što pryniesła himnastcy Ksienii Sankovič blizkaść z palityčnymi elitami?
Ksienija Sankovič — adna z samych vysokapastaŭlenych spartsmienak Biełarusi. «Naša Niva» raskazvaje, jak jana trapiła ŭ kiraŭniki Nacyjanalnaha alimpijskaha kamiteta, jakija pluški joj pryniesła kachańnie z Čyžom i za što dziaŭčyna maje 109 štrafaŭ.
Siamja spartsmienaŭ-jurystaŭ
Ksieniju Sankovič možna prezientavać z dvuch rakursaŭ.
Z adnaho boku, heta paśpiachovaja himnastka. Ksienija — bronzavy pryzior Alimpijady-2008 i srebny pryzior Alimpijady-2012 u hrupavym šmatborji, čempijonka Jeŭropy-2012 i zasłužany majstar sportu.
Z druhoha — udzielnica «kavunovaha bataljona» Alaksandra Łukašenki i spartyŭnaja funkcyjanierka.
Ksienija naradziłasia ŭ 1990 hodzie ŭ Minsku, paśla škoły vučyłasia ŭ Respublikanskaj vučelni alimpijskaha reziervu. Jaje prychod na spartovuju ściežku byŭ dosyć łahičnym u siamji, u jakoj baćka zajmaŭsia skokami ŭ vyšyniu, a maci — płavańniem.
I heta nie byŭ hvałtoŭny praces: u piać hadoŭ dziaŭčynu padčas abychodu dziciačych sadkoŭ zaŭvažyła trenierka pa mastackaj himnastycy i pakinuła baćkam svaju vizitku — pa słovach spartsmienki, jana sama nieŭzabavie pačała chadzić na treniroŭki i rabiła heta z zadavalnieńniem.
Andrej Sankovič, baćka Ksienii, dasiahnuŭ u svaim kirunku značnych pośpiechaŭ — u 1993 hodzie jon uziaŭ u skačkach u vyšyniu 2,34 mietra, i doŭhi čas hety rekord nichto nie moh pabić. Ale z 2021 hoda jon zamacavany za jašče adnym praŭładnym spartoŭcam — Maksimam Niedasiekavym (2,37 mietra).
Baćka — abaraniaŭ palityčnych, a potym prymušaŭ kalehu maŭčać pa spravie Babaryki
Paśla zaviaršeńnia spartovaj karjery Andrej Sankovič pierajšoŭ u jurydyčnuju śfieru i staŭ advakatam. Jaho licenzija dziejničaje z 2000 hoda, jon śpiecyjalizujecca na hramadzianskim, pracoŭnym i kryminalnym pravie.
U 2011-m jon abaraniaŭ palitviaźnia Dźmitryja Novika pa spravie «ab masavych biesparadkach», zaviedzienaj paśla Płoščy-2010. U tym ža hodzie kalehi abrali Sankoviča staršynioj Minskaj haradskoj kalehii advakataŭ. Ale jaho kandydatura nie zadavoliła ŭłady. Ministerstva justycyi zajaviła, što schod advakataŭ byŭ praviedzieny z parušeńniami. U vyniku Sankoviča adchilili, a staršynioj abrali inšaha čałavieka, jakoha ŭchvalili čynoŭniki.
U 2021-m Sankovič-starejšy hulaŭ pa praviłach novaha času. Tak, jon jak siabra Rady Minskaj haradskoj kalehii advakataŭ cisnuŭ na advakata Viktara Babaryki Dźmitryja Łajeŭskaha, kab toj nie kamientavaŭ kryminalnuju spravu presie, kab jana «nie stała hučnaj».
Pry hetym jon ža pracavaŭ pa spravie «Pres-kłuba», abaraniajučy eks-palitviaźnia, apieratara Piatra Słuckaha. Pa vyniku ŭsie padsudnyja pa spravie, zaviedzienaj za ŭchileńnie ad spłaty padatkaŭ, vyjšli na volu.
Andrej Sankovič — nie adziny juryst u siamji. Natchniŭšysia prykładam baćki, jurfak BDU skončyła i sama Ksienija.
«Jon (baćka. — «NN») prychodziŭ dachaty i raskazvaŭ pra svaje spravy. Ja zaŭsiody, adkryŭšy rot, słuchała. Viadoma, padzialiłasia b cikavymi historyjami, ale advakackaja tajamnica baćki nie dazvalaje razbałbatacca», — raskazvała matyvacyju svajho vybaru novaj prafiesii Ksienija.
Z 2017 hoda praktykuje jak advakat i jaje brat Mikita.
Tolki maci ŭ hetaj siamji apynułasia ŭ inšaj śfiery. Alena Sankovič pracuje namieśnicaj hałoŭnaha doktara ŭ 10-j staličnaj kliničnaj balnicy.
Sa sportu — u kavunovy bataljon i abdymki Čyža
Pad čas vystupu na konkursie «Student hoda» Ksienija pryznavałasia, što jaje lubimyja pradmiety — kryminalny praces i hramadzianskaje prava. Praŭda, usie vyvučanyja zakony nibyta byli zabytyja, bo, kali ŭ Biełarusi ŭzoru-2020 jany pačali parušacca napoŭnicu, Sankovič tolki i zmahła, što zajavić:
«Maja kraina za 26 hadoŭ źmianiłasia: čystyja, utulnyja i akuratnyja nie tolki harady, ale i maleńkija vioski, na vulicach spakojna i biaśpiečna, jakasny ŭzrovień miedycyny i adukacyi, sport, dastupny dla ŭsich, nizki ŭzrovień biespracoŭja, mała biazdomnych ludziej. My jamo śviežyja jakasnyja pradukty i hadujem dziaciej u niezaležnaj krainie, dzie zachoŭvajecca ŭsio dla nas z vami. Pakul ja rasła i treniravałasia, Biełaruś zakvitnieła na vačach! Ja šanuju toje, što jość, i chaču heta zachavać i pamnožyć, a nie źniščać i razmazvać na chvali emocyj».
Paśla hetaha jaje prademakratyčnyja siabry sprabavali vyjści na dyjałoh z Ksienijaj, danieści arhumienty nakont taho, što nie tak z takim «sałodkim» mierkavańniem — usio ž u lipieni-2020 užo išli palityčnyja zatrymańni. Ale dziaŭčyna, pa ich słovach, była nieprabojnaja. U vyniku niekatoryja blizkija, u tym liku eks-kalehi pa sporcie, spynili ź joj kamunikacyju.
Sama Ksienija zapeŭnivała, što pieražyła heta spakojna:
«Tak, byli niejkija niehatyŭnyja emocyi, daviałosia adpravić u ban paru dziasiatkaŭ čałaviek, jakija nie ŭmiejuć karektna vykazvać svaje dumki», — raskazvała jana.
Pa jurydyčnaj linii jana tak i nie prasunułasia, zatoje pajšła pa pradziaržaŭnaj. Składana być u apazicyi, kali ty adna z udzielnic «kavunovaha bataljona» ci tak zvanaha «harema» Łukašenki.
U składzie śvity Sankovič naviedvała inaŭhuracyju Łukašenki ŭ Pałacy Niezaležnaści ŭ 2015-m, vyjazdžała na subotniki, hladzieła pobač ź im spartovyja spabornictvy roznaha maštabu, źbirała razam ź im i inšymi maładymi dziaŭčatami bulbu i, kaniečnie, kavuny, a taksama vylatała ź siamjoj Łukašenkaŭ u mižnarodnyja pajezdki.
Ale jašče raniej jana była zaŭvažanaja ŭ kampanii miljaniera Juryja Čyža. U 2012-m, kali ich pačali bačyć razam, jon byŭ uładalnikam futbolnaha kłuba «Dynama» (Minsk). Chadzili plotki, što Juryj Čyž i Ksienija Sankovič sustrakajucca — choć biznesmien i zastavaŭsia ŭ šlubie. Hetyja čutki paćvierdziła trenierka zbornaj Biełarusi pa himnastycy Iryna Laparskaja.
«Ja nie chaču ŭ hetym kapacca i raźbiracca. Ale tady było kachańnie — heta absalutna dakładna», — prakamientavała jana stasunki 49-hadovaha Čyža i 22-hadovaj Sankovič.
Nie raźvitvalisia jany navat pad čas zamiežnych pajezdak Čyža. Zhodna z danymi, jakimi z «Našaj Nivaj» padzialilisia ŭ Belpol, u pieryjad z 2012 pa 2014 hady ŭ Sankovič i Čyža było bolš za dziasiatak sumiesnych palotaŭ za miažu.
Tak, 16 kastryčnika 2012-ha Ksienija adpraviłasia z Čyžom u Italiju, u kancy miesiaca była ź im u Turcyi. U listapadzie jany palacieli ŭ Abjadnanyja Arabskija Emiraty, na tym ža rejsie prysutničaŭ biznesmien Alaksandr Zinhman. Za 2013 hod para nieadnarazova pabyvała ŭ Emiratach, Kazachstanie, a taksama ŭ Turcyi i Turkmienistanie. U 2014-m Sankovič znoŭ była ŭ Emiratach i Kazachstanie, na rejsach taksama prysutničaŭ poŭny skład siamji Łukašenkaŭ — Alaksandr, Viktar, Dźmitryj i Mikałaj.
Jakoj nieruchomaściu i aŭto vałodaje spartoŭka?
Jakraz pad čas stasunkaŭ z Čyžom Ksienija stała ŭładalnicaj nieruchomaści płoščaj 223 kvadraty ŭ domie «La Trajeckaha», jaki ŭ narodzie nazyvajuć «domam Čyža», bo mienavita jahony «Trajpł» zajmaŭsia budaŭnictvam. Na toj momant takaja nieruchomaść aceńvałasia pryblizna ŭ $750 tysiač.
Akramia hetych apartamientaŭ na Staražoŭskaj, Sankovič vałodaje jašče adnoj kvateraj u stalicy pa vulicy Prytyckaha — ličycca, što mienavita jana moža być «miedalnaj», kuplenaj na hanarary ad Alimpijskich hulniaŭ (pieramohi prynieśli himnastcy $30 tysiač u 2008 hodzie i $75 tysiač u 2012-m).
U aŭto Sankovič addavała pieravahu marcy Lexus IS250. Na mašynie jana, vidavočna, lubić pahaniać, bo na rachunku himnastki 109 pryciahnieńniaŭ pa linii DAI za pieravyšeńnie chutkaści.
Muž — rasijanin, dačku taksama addali ŭ himnastyku
U sakaviku 2016 hoda Juryja Čyža aryštavali pa spravie ab niaspłacie padatkaŭ. Na toj momant Sankovič užo budavała adnosiny ź Illom Papovym, rasijaninam, jaki pracavaŭ u Alimpijskim kamitecie Rasii i zahadvaŭ siektaram pa ŭdziele ŭ junackich alimpijskich mierapryjemstvach.
U vieraśni 2016 hoda Sankovič vyjšła za jaho zamuž. Praz try miesiacy paśla viasiella ŭ pary naradziłasia dačka Alisa. Dziaŭčynu z malenstva addali ŭ mastackuju himnastyku.
Sankovič nie spyniła mahčymaja pierśpiektyva bulinhu dački — pra toje, što zornyja himnastki čaściakom stanavilisia abjektam dla ckavańnia za lišnija kiłahramy, «Našaj Nivie» raskazała adna sa spartsmienak:
«Bić dziaciej, kryčać na ich, u tym liku maciukami — na žal, takaja praktyka maje miesca».
Sama Sankovič u imia karjery mocna abmiažoŭvała siabie ŭ charčavańni, admaŭlajučysia časam nie tolki ad ježy, ale navat i ad vady.
Papoŭ na hety momant praciahvaje žyć na dźvie krainy. U Rasii jon adkazvaje za markietynh Usierasijskaj fiederacyi lohkaj atletyki i źjaŭlajecca adnym z kiraŭnikoŭ kłuba pa džyu-džycu.
«Palityka biaźlitasna ŭvajšła ŭ sport i łamaje losy»
U pačatku 2024-ha Sankovič stała paŭnavartasnym hienieralnym sakratarom Nacyjanalnaha alimpijskaha kamiteta. Da hetaha jana niekalki hadoŭ vykonvała abaviazki hienieralnaha sakratara, sumiaščajučy pasadu z rolaj viadučaj na ANT: z ekranaŭ televizara Sankovič pakazvała kompleksy praktykavańniaŭ na pachudzieńnie.
Jaje asnoŭny načalnik na siońnia — Viktar Łukašenka, prezident Nacyjanalnaha alimpijskaha kamiteta. Jašče adna z himnastak — siabroŭka Sankovič Luboŭ Čarkašyna — uvachodzić u siabry vykankama arhanizacyi.
Sankovič pryznavałasia, što biełaruskamu sportu prychodzicca niaprosta z pryčyny adrezanaści ad mižnarodnaha kalendara spabornictvaŭ, a taksama praz adsutnaść mižnarodnaha finansavańnia. U vyniku nakładzienych sankcyj biełaruskija spartsmieny pieraklučylisia na Uschod i asabliva na Rasiju. Ale sama Sankovič adznačaje, što tamtejšyja turniry nie mohuć zamianić paŭnavartasnyja top-pieršynstvy, na jakich spaborničaješ z najlepšymi atletami z usiaho śvietu.
«Heta aburalny prykład taho, jak palityka biaźlitasna ŭvajšła ŭ sport i łamaje losy. Nievierahodna škada dziaŭčat [himnastak], ciažka navat ujavić, što im davodzicca pieražyvać», — zajaŭlała Sankovič i adznačała, što fiederacyja «prykładaje niamała namahańniaŭ, kab urehulavać situacyju».
«Ksienija pačynała ŭ NAK viadučaj śpiecyjalistkaj, i voś davysłužvałasia da kiraŭničaj pasady. Składana zrazumieć, jak heta moža być važniejšaje za čałaviečaje, bo ŭ minułym my viedali Ksiušu jak tuju, chto nie padviadzie, padtrymaje. U jaje mocnyja lidarskija jakaści. Zdajecca, jano tak va ŭsich himnastak, ale kab nastolki — kab karjernyja ambicyi stali ŭ pryjarytecie ŭsiaho… Heta nie paddajecca łohicy», — kamientujuć jaje blizkija znajomyja.
«Kaniečnie, ciapier joj treba to na subotnik zhaniać, to niedzie ŭ prapahandzie zaśviacicca. Moža, niedzie i pramaŭčać — jak pra vajnu va Ukrainie, naprykład. Ale taki siońnia košt, kab być pry pasadzie ŭ Biełarusi i tym bolš, kab krucicca ŭ prałukašenkaŭskich kołach. Chočaš žyć — umiej być prystasavancam», — kaža jašče adzin surazmoŭca sa spartyŭnaj śfiery.
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža4
Kamientary