Sud u Rasii daŭ režysioru Jaŭhienii Biarkovič i dramaturhu Śviatłanie Pietryjčuk 6 hadoŭ za śpiektakl
Heta pieršy ŭ Rasii prysud za śpiektakl.
Sudździa 2-ha Zachodniaha akruhovaha vajskovaha suda Juryj Masin prysudziŭ režysiorku Ženiu Biarkovič i dramaturha Śviatłanu Pietryjčuk da šaści hadoŭ pazbaŭleńnia voli pa spravie ab «apraŭdańni teraryzmu» (častka 2 artykuła 205.2 KK), piša Mieduza.
Adbyvać pakarańnie abvinavačanyja buduć u kałonii ahulnaha režymu. Im taksama na try hady zabaranili administravać sajty. Sudździa taksama pastanaviŭ zaličyć čas utrymańnia Biarkovič i Pietryjčuk u SIZA z 4 maja 2023 hoda z raźliku «dzień za dzień».
Dziaržabvinavačańnie zapytvała taki ž termin dla padsudnych — pa šeść hadoŭ kałonii.
8 lipienia Biarkovič i Pietryjčuk vystupili z apošnim słovam. Z 13 červienia ŭsie pasiadžeńni suda pa ich spravie prachodziać u zakrytym režymie, tamu žurnalisty i słuchačy pry vystupie abvinavačanych nie prysutničali.
Padtrymać abvinavačanych da budynka suda pryjšli były hiendyrektar «Siomaj studyi» Alaksiej Małabrodski i łaŭreat Nobieleŭskaj premii miru Dźmitryj Murataŭ, raspavioŭ «Mieduzie» adzin z prysutnych la suda. Pavodle jaho słoŭ, pobač z sudom sabralisia kala 80 čałaviek.
Ženiu Biarkovič i Śviatłanu Pietryjčuk zatrymali ŭ mai 2023 hoda z-za śpiektakla «Finist jasny sokał». Śledstva śćviardžaje, što śpiektakl, u jakim raspaviadajecca pra dziaŭčat z Rasii, jakija źjazdžajuć za žanichami ŭ Siryju, apraŭdvaje teraryzm. Vysnovy śledstva zasnavanyja, u pryvatnaści, na ekśpiertyzie stvaralnika «destruktałohii» Ramana Siłanćjeva, jaki znajšoŭ u pjesie «prykmiety ideałohii radykalnaha fieminizmu».
Druhuju ekśpiertyzu pa spravie praviała ekśpiert FSB Śviatłana Mačałava, jakaja znajšła ŭ śpiektakli ramantyzacyju vobrazu terarysta i dyskryminacyju ruskich mužčyn.
Hałoŭnym śviedkam abvinavačvańnia vystupaŭ Uładzimir Karpuk — akcior i režysior ź Nižniaha Noŭharada, jaki napisaŭ danos na śpiektakl. U spravie taksama jość zasakrečany śviedka «Mikita», jaki prynios videazapis čytki śpiektakla ŭ centr «E».
13 červienia sudździa Juryj Masin na prośbu prakurora zakryŭ sudovyja pasiadžeńni pavodle spravy Biarkovič i Pietryjčuk. U vyniku pasiadžeńnia, na jakich abarona pradstaŭlała dokazy nievinavataści Biarkovič i Pietryjčuk, prajšli biez prysutnaści słuchačoŭ i žurnalistaŭ. 4 lipienia pačalisia sprečki, jakija taksama prachodziać u zakrytym režymie.
U 2022 hodzie pastanoŭka «Finist jasny sokał» atrymała premiju «Załataja maska».
Kamientary