Суд у Расіі даў рэжысёру Яўгеніі Бярковіч і драматургу Святлане Петрыйчук 6 гадоў за спектакль
Гэта першы ў Расіі прысуд за спектакль.
Суддзя 2-га Заходняга акруговага вайсковага суда Юрый Масін прысудзіў рэжысёрку Жэню Бярковіч і драматурга Святлану Петрыйчук да шасці гадоў пазбаўлення волі па справе аб «апраўданні тэрарызму» (частка 2 артыкула 205.2 КК), піша Медуза.
Адбываць пакаранне абвінавачаныя будуць у калоніі агульнага рэжыму. Ім таксама на тры гады забаранілі адміністраваць сайты. Суддзя таксама пастанавіў залічыць час утрымання Бярковіч і Петрыйчук у СІЗА з 4 мая 2023 года з разліку «дзень за дзень».
Дзяржабвінавачанне запытвала такі ж тэрмін для падсудных — па шэсць гадоў калоніі.
8 ліпеня Бярковіч і Петрыйчук выступілі з апошнім словам. З 13 чэрвеня ўсе пасяджэнні суда па іх справе праходзяць у закрытым рэжыме, таму журналісты і слухачы пры выступе абвінавачаных не прысутнічалі.
Падтрымаць абвінавачаных да будынка суда прыйшлі былы гендырэктар «Сёмай студыі» Аляксей Малабродскі і лаўрэат Нобелеўскай прэміі міру Дзмітрый Муратаў, распавёў «Медузе» адзін з прысутных ля суда. Паводле яго слоў, побач з судом сабраліся каля 80 чалавек.
Жэню Бярковіч і Святлану Петрыйчук затрымалі ў маі 2023 года з-за спектакля «Фініст ясны сокал». Следства сцвярджае, што спектакль, у якім распавядаецца пра дзяўчат з Расіі, якія з'язджаюць за жаніхамі ў Сірыю, апраўдвае тэрарызм. Высновы следства заснаваныя, у прыватнасці, на экспертызе стваральніка «дэструкталогіі» Рамана Сіланцьева, які знайшоў у п'есе «прыкметы ідэалогіі радыкальнага фемінізму».
Другую экспертызу па справе правяла эксперт ФСБ Святлана Мачалава, якая знайшла ў спектаклі рамантызацыю вобразу тэрарыста і дыскрымінацыю рускіх мужчын.
Галоўным сведкам абвінавачвання выступаў Уладзімір Карпук — акцёр і рэжысёр з Ніжняга Ноўгарада, які напісаў данос на спектакль. У справе таксама ёсць засакрэчаны сведка «Мікіта», які прынёс відэазапіс чыткі спектакля ў цэнтр «Э».
13 чэрвеня суддзя Юрый Масін на просьбу пракурора закрыў судовыя пасяджэнні паводле справы Бярковіч і Петрыйчук. У выніку пасяджэння, на якіх абарона прадстаўляла доказы невінаватасці Бярковіч і Петрыйчук, прайшлі без прысутнасці слухачоў і журналістаў. 4 ліпеня пачаліся спрэчкі, якія таксама праходзяць у закрытым рэжыме.
У 2022 годзе пастаноўка «Фініст ясны сокал» атрымала прэмію «Залатая маска».
Цяпер чытаюць
У СІЗА КДБ апынуўся Мікалай Цырто, фігурант старой справы Беларусбанка. Другі раз — за палітыку1
У СІЗА КДБ апынуўся Мікалай Цырто, фігурант старой справы Беларусбанка. Другі раз — за палітыку
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі1111
Каментары