Biełarus, jakoha chacieli vysłać z Polščy, vyjhraŭ sud u śpiecsłužbaŭ

Uradženiec Hrodna Pavieł Juškievič žyvie ŭ Polščy z 17 hadoŭ, atrymaŭ niekalki adukacyj, skončyŭ aśpiranturu, vykładaje va ŭniviersitecie ŭ Toruni. Jon atrymaŭ dazvoł na pastajannaje pražyvańnie na padstavie polskich karanieŭ. Adnak u listapadzie 2023 hoda jahonaje PMŽ anulavali, pakolki Ahienctva ŭnutranaj biaśpieki (ABW) paličyła Paŭła pahrozaj dla nacbiaśpieki Polščy.

U studzieni ABW zahadała mužčynu pakinuć krainu da 4 lutaha na padstavie niejkaha sakretnaha zaklučeńnia 10-hadovaj daŭniny. Adnak Pavieł vyrašyŭ zmahacca za adnaŭleńnie PMŽ. Jon padaŭsia na mižnarodnuju abaronu i padaŭ u sud na rašeńnie ŭpraŭleńnia pa spravach inšaziemcaŭ.

Historyja vyklikała rezanans, pra kiejs pisali bujnyja polskija ŚMI, a biełarusy arhanizoŭvali akcyju ŭ padtrymku Paŭła. I ciapier sud zaniaŭ bok Juškieviča.

Spravu razhladaŭ vajavodski administracyjny sud u Varšavie. U sudzie advakat Paŭła paviedamiŭ pra biesprecedentny vypadak: ABW źmianiła svaju pazicyju. 

Pavieł i jahony advakat miarkujuć, što śpiecsłužby pryznali biełarusa pahrozaj tamu, što jon nie staŭ pieradavać im infarmacyju pra biełaruskich studentaŭ i jahonych kaleh. Taksama pryčynaj moža być udzieł Paŭła ŭ alimpijadzie pa ruskaj movie ŭ Domie rasijskaj kultury — Juškievič byŭ studentam ruskaj fiłałohii. Sud, jaki aznajomiŭsia z materyjałam śpiecsłužbaŭ, pryjšoŭ da vysnovy, što jon ahulny i niekankretny.

Sam dakumient advakat nazvaŭ «klaŭzaj», «paskvilem» i «chłuśnioj». Praces jon nazvaŭ baraćboj za dobraje imia Paŭła. 

U lutym 2024 hoda ABW admoviłasia ad raniejšaj pazicyi i pierastała ličyć Juškieviča pahrozaj nacbiaśpiecyi. Pavieł ličyć, što heta źviazana z padtrymkaj polskaj i biełaruskaj hramadskaści.

Listy ŭ abaronu Paŭła adpraviŭ daradca Śviatłany Cichanoŭskaj Franak Viačorka — jon raskazaŭ, što ŭ Biełarusi Paŭłu pahražajuć represii. Hetyja i padobnyja listy ŭ sudzie nie pryniali. Adnak da spravy dałučyli śviedčańnie, što Juškieviča niama ŭ śpisie niepažadanych inšaziemcaŭ u Polščy.

U vyniku sud admianiŭ rašeńnie ŭpraŭleńnia pa spravach inšaziemcaŭ ab anulavańni pastajannaha dazvołu na žycharstva. Ciapier Pavieł maje namier adklikać zajavu na mižnarodnuju abaronu, pakolki heta ŭžo nieaktualna, i źjeździć u adpačynak papravić zdaroŭje, jakoje pachisnułasia ad usich pieražyvańniaŭ.

Advakat Paŭła Michał Chajduk mierkavaŭ, što paśla źmieny rašeńnia śpiecsłužbaŭ sprava skončycca pazityŭna dla klijenta. Kali b u ABW stajali na svaim — rašeńnie mahło b być inšym. Choć u hetym vypadku sud pryznaŭ, što infarmacyja ŭ zasakrečanaj častcy davoli ahulnaja.

«Z samaha pačatku hetaj spravy my byli ŭpeŭnienyja, što Pavieł nie ŭjaŭlaje pahrozy Polščy. Patrebna była prosta mahčymaść heta dakazać», — skazaŭ Michał.

Jon miarkuje, što ŭ ABW niačasta mianiajuć svajo mierkavańnie, choć adpaviednaj statystyki ŭ jaho niama. Jon pra taki vypadak nie čuŭ.

Michał miarkuje, što bolš paśpiachovaje zaviaršeńnie spravy Paŭła moža stać precedentam dla inšych.

• 0
• 10
• 0
• 4
• 0
• 0
• 0