Palicyja Banhkoka rasśleduje abstaviny śmierci šaści čałaviek, znojdzienych miortvymi ŭ adnym ź fiešeniebielnych atelaŭ tajskaj stalicy Hyatt Erawan Bangkok. Usie jany — vjetnamcy, u niekatorych, jak paviedamlajecca, było padvojnaje hramadzianstva z ZŠA, piša VVS.
Siarod miortvych troje mužčyn i try žančyny.
Pavodle haściničnych zapisaŭ, miescy ŭ hateli zareziervavała hrupa ź siami čałaviek, ale zajechali tolki piać.
Šosty čałaviek, znojdzieny miortvym, nie značycca ŭ śpisach pastajalcaŭ, zajavili ŭ palicyi.
Na dadzieny momant asnoŭnaja viersija palicyi — atručvańnie jadam. Ciapier pravodzicca taksikałahičnaja ekśpiertyza.
U kryvi pamierłych znojdziena padazronaje rečyva, jakoje mahło trapić u arhanizm z napojami, zamoŭlenymi haściami ŭ numar kala dźviuch hadzin dnia pa miascovym časie ŭ paniadziełak. Adnak palicyja pakul ustrymlivajecca ad vysnoŭ i kamientaroŭ.
Palicyju ŭ hatel vyklikaŭ hatelny piersanał kala 17:30 pa miascovym časie ŭ aŭtorak.
Raniej ekśpierty paviedamili, što na momant pačatku ahladu ciełaŭ achviary byli miortvyja kala 24 hadzin.
Taksama razhladałasia viersija charčovaha atručvańnia, ale zamoŭlenaja ŭ numar ježa była niekranutaja.
Hrupa pavinna była vyjechać z hatela ŭ paniadziełak. Sudziačy pa ŭsim, hości vyrašyli spačatku paabiedać razam. Jany sabralisia ŭ dvuchpakajovym numary adnaho ź ich na piatym paviersie, dzie i byli paźniej znojdzieny pakajoŭkaj.
Zamoŭlenaja ŭ numar ježa stajała niekranutaj. Raniej pradstaŭnik palicyi paviedamiŭ, što na miescy byli znojdzieny vykarystanyja čajnyja i kavavyja kubki.
Cieły lažali ŭ haścinaj i ŭ vannym pakoi.
U vannaj taksama znojdzieny kubki z reštkami harbaty, słoiki z enierhietyčnymi napojami i miod.
Pa słovach śledčych, ni śladoŭ baraćby, ni prykmiet abrabavańnia na miescy zdareńnia nie vyjaŭlena.
Tolki ŭ adnaho na ciele jość rana, ale, pavodle słoŭ ekśpiertaŭ, chutčej za ŭsio, heta śledstva padzieńnia.
Premjer-ministr Tajłanda Sietcha Tchavisin, jaki pabyvaŭ na miescy padziej, uziaŭ rasśledavańnie pad asabisty kantrol, zajaviŭšy, što toje, što adbyłosia, nie pavinna adbicca na imidžy krainy i na turystyčnym patoku.
Kamientary