Kraŭcoŭ: Hulać u eskałacyju možna, kali ty realna vałodaješ siłaj. Jeŭropa pastaviła adzinaje patrabavańnie — nul palitviaźniaŭ
Ivan Kraŭcoŭ u efiry «Radyjo Svaboda» patłumačyŭ svajo bačańnie stratehii apazicyi.
Kraŭcoŭ zaŭvažyŭ, jaho našumieły post u fejsbuku nie stolki pazicyja, a analiz situacyi dla taho, kab prafiesijanały i aktyvisty mahli zadumacca ab praduktyŭnaści stratehii i kanstrukcyi, jakuju biełaruskaja apazicyja buduje za miažoju.
«Asnoŭny tezis vielmi prosty — hulać u eskałacyju, hulać u pazicyju siły možna, kali ty realna vałodaješ siłaj. Ci kali ty razumieješ, jak jaje naźbirać. U vypadku, kali ty razumieješ, što ŭ praciŭnika, supiernika jość pieravaha ŭ sile, to nie hulaješ u hulniu supraćstajańnia siłaj.
Ty prydumvaješ manieŭry, pravodziš manieŭrovyja apieracyi i sprabuješ dasiahać met paśladoŭna, u tym liku i adychodnymi šlachami», — havoryć Kraŭcoŭ.
«Kali za čatyry hady my zrazumieli, što apazicyja nie stała macniejšaj, kali my zrazumieli, što my nie nabližajemsia da zadač, to, mahčyma, varta sabie sumlenna adkazać i pryznacca, što realnaj stratehii pa dasiahnieńni vynikaŭ u tak zvanych demakratyčnych siłaŭ prosta niama», — praciahvaje mužčyna.
Kraŭcoŭ zaŭvažaje, što demakratyčnym siłam być efiektyŭnymi nie dazvalaje šerah faktaraŭ. Asnoŭny ź ich — vajna va Ukrainie.
«Ciapier vyzvaleńnie palitviaźniaŭ — hałoŭnaja taktyčnaja zadača»
Fiłosaf Pavieł Barkoŭski ličyć, što pytańnie palitviaźniaŭ nie pavinna pierakryvać asnoŭny palityčny paradak dnia demakratyčnych sił, bo ŭ takim vypadku sistemnych efiektaŭ nie budzie dasiahnuta. Kraŭcoŭ jamu apaniruje:
«Usie krainy, u tym liku Jeŭrasajuza, amierykancy, pastavili adzinaje patrabavańnie — nul palitviaźniaŭ u Respublicy Biełaruś. Heta adzinaje aficyjnaje patrabavańnie, jakoje vystaŭlena biełaruskamu režymu. Nichto nie havoryć ab źmienie ŭłady, źmienie sistemy dziaržavy.
Jość adno patrabavańnie — palityčnyja viaźni. Ale heta nie prosta tak. Tamu što majecca na ŭvazie, kali pytańnie budzie vyrašana, kali my apyniemsia ŭ situacyi, kali palitviaźniaŭ budzie nul, heta značyć, što ŭnutranaja palityčnaja abstanoŭka ŭ Biełarusi stabilizavałasia.
Kančatkovaja meta — demakratyzacyja. Ale pytańnie — ci možam my dasiahnuć hetaj mety ŭ hetym epizodzie? (…) Ja liču, što va ŭmovach abmiežavanych resursaŭ ciapier vyzvaleńnie palitviaźniaŭ — hałoŭnaja taktyčnaja zadača. (…) My ŭsie chočam demakratyzacyi, ale taktyčna mienavita hetuju zadaču možna ciapier tolki rašyć».
«Treba skazać praŭdu — my prosta čakajem raźviazki situacyi, i prosta ŭ nas roznyja ambicyi»
Kraŭcoŭ adznačyŭ, što nie ličyć biełaruskuju apazicyju za miažoju važnym faktaram pieramien u Biełarusi.
«Kali prastora mahčymaściej adkryjecca ŭnutry krainy, to dziejničać budzie nie tolki apazicyja, jakaja znachodzicca za miažoju. Jość ludzi, jakija znachodziacca ŭ turmie. Lidary, jakaja našmat papularniejšyja za tych, jakija ciapier znachodziacca za miažoju.
Buduć novyja lidary. Jość biznes, jaki taksama zacikaŭleny ŭ palitycy, jaki siabie jašče nie prajaviŭ.
Tamu śćviardžać, što «my zachoŭvajem hetuju śviatuju čašu palityki tut u Varšavie, Vilniusie», dla mianie niejak hučyć vielmi samaŭpeŭniena. I arhanizavać mabilizacyju z-za miažy — taksama vielmi samaŭpeŭniena.
Tamu treba skazać praŭdu — my prosta čakajem raźviazki situacyi, i prosta ŭ nas roznyja ambicyi».
«Radykalnych apazicyjanieraŭ časta izalujuć»
Kraŭcoŭ ličyć, što pazicyja na eskałacyju, radykalizacyju adnosna režymu Łukašenki moža naškodzić i samim pradstaŭnikam apazicyi, jakija za heta vystupajuć.
Pa słovach mužčyny, najaŭnaść radykalnaha i ŭmieranaha kryła ŭ biełaruskaj apazicyi — karysna ŭ vypadku mahčymaha «kruhłaha stała».
Adnak, zaŭvažaje Kraŭcoŭ, «pytańnie ŭ tym, što nie zaŭsiody radykalnaja apazicyja — heta charošaja pazicyja dla taho, kab raźličvać na ŭdzieł u hetych pieramovach».
«Vielmi časta jana pryvodzić da taho, što radykalnych apazicyjanieraŭ izalujuć abodva baki. Moža być, jany vykonvajuć važnuju rolu psichałahičnaha cisku, ale časta jany siabie pakazvajuć nienadziejnymi partniorami (i dla Zachadu ŭ tym liku).
Tamu što, kali našy pradstaŭniki chodziać i havorać, što chočuć budavać «virtualnuju dziaržavu», vypuskać pašparty, kab pryznavali ŭrad, heta pakazvaje nie zusim adekvatnaść hetych fihur. I heta taksama stanie prablemaj dla hetych fihur».
Volha Čamadanava taksama budzie sparynh-partnioram na vybarach6
Kamientary
Čamu takija ruskija vykazvajucca na kont biełaruskaj situacyi?