Skandał u industryi hulniaŭ — doŭhačakanuju GTA 6 źlili ŭ sieciva niezadoŭha da aficyjnaj prezientacyi
Za niekalki dzion da vialikaj prezientacyi Grand Theft Auto VI u siecivie pačali źjaŭlacca videa ź jašče nie vydadzienaj hulni. Materyjały raspaŭsiudžvajucca pad imiem CyberLeek, a chto nasamreč staić za ŭciečkaj, pakul nieviadoma.
Grand Theft Auto VI — praciah adnoj z samych paśpiachovych sieryj videahulniaŭ u historyi. Papiaredniaja častka, GTA V, vyjšła jašče ŭ 2013 hodzie.
Padziei GTA VI adbyvajucca ŭ vydumanym amierykanskim štacie Leanida, pratatypam jakoha stała Fłaryda. Hałoŭny horad — Vajs-Sici, miascovy anałah Majami, jaki ŭžo źjaŭlaŭsia ŭ papiarednich hulniach sieryi.
Hałoŭnych hierojaŭ dvoje — Džejsan Dziuval i Lusija Kaminas. Paśla niaŭdałaha złačynstva para apynułasia ŭ centry vialikaj kryminalnaj historyi i musić dziejničać razam. Kampanija-raspracoŭščyk Rockstar abiacaje najbolš maštabnuju i detalovuju viersiju śvietu Grand Theft Auto za ŭsiu historyju sieryi.
Reliz GTA VI pryznačany na 19 listapada 2026 hoda na PlayStation 5 i Xbox Series X/S. 27 žniŭnia Rockstar płanavała pakazać vialikuju anłajn-prezientacyju hulni na Netflix. Ale za dzieviać dzion da jaje płany kampanii pačaŭ psavać nieviadomy.
18 žniŭnia ŭ internecie źjavilisia dva videa, jakija vyhladali jak zapisy hulniavoha pracesu GTA VI. Ich apublikavaŭ nieviadomy čałaviek abo hrupa ludziej pad nazvaj CyberLeek.
Na pieršym videa Džejsan znachodzicca kala doma i hulaje ŭ baskietboł. Na druhim jeździć pa horadzie, sutykajecca z mašynami, ustupaje ŭ bojku i pryciahvaje ŭvahu palicyi.
CyberLeek na hetym nie spyniŭsia. U toj ža dzień u siecivie źjaviłasia poŭnaja karta štata Leanida.
U nastupnyja dni stali źjaŭlacca novyja videa.
Da 23 žniŭnia ŭ siecivie źjaviłasia jak minimum dziesiać rolikaŭ. Na ich Džejsan bjecca ź inšymi piersanažami, kradzie i kiruje aŭtamabilami, rabuje zapraŭki i kramy, uciakaje ad palicyi i naviedvaje stryp-kłub. Amatary hulni taksama pabačyli rolik z palotami na samalocie.
Asabliva pakazalnym staŭ rolik, u jakim Džejsan strełami vyvodzić na ścianie słova LEEK — adsyłku da nazvy CyberLeek. Heta stała važnaj prykmietaj taho, što ŭ aŭtara vycieka moh być nie prosta nabor zahadzia skradzienych videarolikaŭ, a dostup da pracoŭnaj viersii hulni.
Rockstar aficyjna nie paćviardžała sapraŭdnaść apublikavanych materyjałaŭ. Adnak kopii videa stali vydalać ź internetu paśla skarhaŭ na parušeńnie aŭtarskich pravoŭ, što stała ŭskosnym śviedčańniem ich sapraŭdnaści.
«Heta nie sproba zarabić»
Adnačasova ź pieršymi vyciekami 18 žniŭnia CyberLeek apublikavaŭ manifiest, u jakim patłumačyŭ svaje matyvy i vystaviŭ patrabavańni hulniavoj industryi.
Chakier vystupaje suprać ličbavych papiarednich zakazaŭ hulniaŭ, płatnaha dostupu da kantentu, jaki ŭžo znachodzicca ŭ samoj hulni, i praktyki, kali nabytaja hulnia moža pierastać pracavać paśla adklučeńnia siervieraŭ. Na jaho dumku, adnakarystalnickija hulni pavinny zastavacca dastupnymi afłajn, navat kali kampanija bolš nie padtrymlivaje ich sierviery.
Aŭtar pahražaje, što Rockstar moža być nie apošniaj kampanijaj, suprać jakoj buduć pravodzicca takija ataki.
Ale jość detal, jakaja mocna psuje vobraz baraćbita za pravy hulcoŭ. Razam z vyciekami CyberLeek pačaŭ aktyŭna rekłamavać ułasnuju kryptavalutu CYBERLEEK u sietcy Solana. Jaje rekłama i QR-kody źjaŭlajucca niepasredna na videa z vykradzienymi materyjałami GTA VI.
Sam CyberLeek śćviardžaje, što hrošy patrebnyja dla niejkaha sakretnaha prajekta i infrastruktury dla budučaj baraćby z hulniavymi karparacyjami. U manifieście jon asobna nastojvaje, što heta «nie sproba chutka zarabić».
Rockstar šukaje krynicu ŭciečki
20 žniŭnia Take-Two Interactive, maciarynskaja kampanija Rockstar Games, źviarnułasia ŭ fiederalny sud u Ńju-Jorku. Jana choča atrymać ad Microsoft i Discord infarmacyju, jakaja moža dapamahčy vyznačyć asobu CyberLeek.
Havorka idzie nie tolki pra imia abo elektronnuju poštu. Ad Microsoft patrabujuć, siarod inšaha, IP-adrasy, ź jakich rehistravalisia akaŭnty i adbyvalisia apošnija ŭvachody, numary telefonaŭ, źviestki pra źviazanyja akaŭnty i OneDrive, a taksama identyfikatary Windows-pryład.
Zapyt tyčycca taksama troch Discord-siervieraŭ, jakija mahli być źviazanyja z raspaŭsiudžvańniem vyciečak. Microsoft i Discord pavinny pieradać zapatrabavanyja źviestki da 4 vieraśnia.
Ananimnaja krynica, znajomaja ź dziejańniami kampanii, raskazała Bloomberg, što ciapier u Rockstar «ŭsie kinutyja na hetuju spravu»: kiraŭnictva sprabuje vyśvietlić pachodžańnie ŭciečki i znajści taho, chto za joj staić.
Niahledziačy na skandał, Rockstar nie źbirajecca pieranosić zapłanavanuju prezientacyju hulniavoha pracesu abo terminova mianiać markietynhavuju stratehiju GTA VI.
Pavodle krynicy Bloomberg, kiraŭnictva i mnohija supracoŭniki Rockstar razzłavanyja tym, što adbyłosia. Asablivaje razdražnieńnie vyklikaje toje, što heta ŭžo druhaja bujnaja ŭciečka GTA VI paśla ŭzłomu ŭ 2022 hodzie.
Paśla toj ataki Rockstar istotna ŭzmacniła miery biaśpieki. Raspracoŭščykaŭ abaviazali pracavać u ofisach piać dzion na tydzień i admovilisia ad dystancyjnaj pracy. Kamanda GTA VI bolš nie mahła karystacca pracoŭnymi instrumientami i atrymlivać dostup da viersij hulni pa-za ofisam. Adnak navat hetyja miery nie zmahli praduchilić novy vyciek.
Sama GTA VI tym časam jašče nie zavieršanaja, choć raspracoŭka ŭžo nabližajecca da finalnaj stadyi. Rockstar praciahvaje rychtavać hulniu da zapłanavanaha relizu 19 listapada.
Ciapier čytajuć
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie4
Kamientary