Rasijskija ŭłady abaviazali adpravić kantraktnikami ŭ vojska nie mienš za 2% studentaŭ
U Rasii vyšejšaja adukacyja atrymała dziaržaŭny zakaz na harmatnaje miasa.
Na zakrytaj naradzie ŭ pačatku 2026 hoda ministr navuki i vyšejšaj adukacyi Valeryj Falkoŭ paviedamiŭ rektaram najbujniejšych rasijskich VNU, što kantrakt ź Minabarony pavinny zaklučyć nie mienš za 2% studentaŭ, piša Faridaily.
Administracyi ŭniviersitetaŭ i technikumaŭ pa ŭsioj Rasii nastojliva prapanujuć studentam uziać akademičny adpačynak, zaklučyć jak minimum na hod kantrakt ź Minabarony i adpravicca na vajnu z Ukrainaj. Pieršyja paviedamleńni pra heta źjavilisia jašče ŭ śniežni 2025 hoda. Pačynajučy ź lutaha 2026 hoda jany stali masavymi.
Pavodle źviestak za minuły hod, u rasijskich VNU navučałasia 2,2 młn mužčyn. Kali VNU ŭdasca vykanać patrabavańnie ministerstva, to rasijskaja armija dadatkova atrymaje minimum 44 tysiačy bajcoŭ. Kali ž płan u 2% pastavili i pierad technikumami, to ŭsiaho kantrakt zaklučać 76 tysiač maładych ludziej.
Ułady imknucca zavabić studentaŭ pierš za ŭsio ŭ bieśpiłotnyja vojski. Heta novy asobny rod vojskaŭ, jaki źjaviŭsia ŭ rasijskaj armii minułaj vosieńniu. Da hetaha vajskoŭcy, jakija pracujuć z dronami, byli častkaj suchaputnych, pavietranych abo marskich padraździaleńniaŭ armii (u zaležnaści ad śpiecyjalizacyi).
Zhodna z dakumientami, jakija byli padrychtavany Minabarony RF dla ŭnutranaha vykarystańnia i pamyłkova apublikavany na sajtach niekatorych kaledžaŭ, rasijskija ŭłady płanujuć nabrać u hetym hodzie ŭ bieśpiłotnyja vojski 78,8 tysiač čałaviek, u tym liku za košt studentaŭ.
Kantrakty mohuć zaklučać navat studenty pieršych kursaŭ, jakim u asnoŭnym pa 18—20 hadoŭ.
Kali ŭ studenta jość prablemy z paśpiachovaściu, to jamu mohuć pahražać adličeńniem. Kali ž jon pahodzicca, to administracyja abiacaje zakryć vočy na drennuju paśpiachovaść i navat raspracavać dla studenta indyvidualny płan navučańnia, kali jon vierniecca z vajny.
Maładym ludziam abiacajuć, što jany zmohuć viarnucca da navučańnia paśla zakančeńnia kantrakta, a taksama nahadvajuć pra vysokija dziaržaŭnyja vypłaty i ilhoty dla ŭdzielnikaŭ vajny suprać Ukrainy. Akramia taho, u standartny nabor bonusaŭ uvachodzić mahčymaść pieravieścisia z płatnaha adździaleńnia na biudžetnaje. Niekatoryja VNU, bahaciejšyja — naprykład, MDU i SPbDU, abiacajuć studentam dadatkovyja vypłaty za svoj košt.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie17
Kamientary