Ekspazicyja zdymkaŭ dzikaj pryrody adkryłasia ŭ Minsku

U ekspazicyi pradstaŭlena 21 rabota fatohrafa-animalista, člena Kłuba fatohrafaŭ dzikaj pryrody Biełarusi Taćciany Aleški, pišuć Minsk-naviny.

Taćciana praciahvaje spravu baćki — viadomaha fatohrafa Viačasłava Aleški, adnaho ź pieršaprachodcaŭ siarod biełaruskich fatohrafaŭ dzikaj pryrody. Pa ŭspaminach surazmoŭcy, doma była vielmi vialikaja biblijateka, značnuju častku jakoj zajmali knihi pra pryrodu i mastactva fatahrafii. Jašče adnym zachapleńniem baćki Taćciany Aleški była paezija, jakaja padabajecca i joj samoj. Fatahrafijaj jana pačała surjozna zajmacca tolki z 2018 hoda — luboŭ da žyvioł pieradałasia ŭ spadčynu i stała asnoŭnaj temaj fotarabot aŭtara.

Pavialičyć

— Ja fiłołah pa adukacyi i doŭhi čas vyvučała paeziju. U niejki momant zadałasia pytańniem: jak šmat ptušak sustrakajecca ŭ biełaruskich liryčnych tvorach? Akazałasia, što ptuški zajmajuć u ich značnaje miesca. Jany ciesna źviazanyja z paŭsiadzionnym žyćciom čałavieka, mifami, kazkami, falkłoram. A raznastajnaść paetyčnych vobrazaŭ i mietafar, źviazanych z ptuškami, uražvaje. Ciapier u płanach vydać knihu, dzie buduć maje fatahrafii i vieršy biełaruskich paetaŭ, pryśviečanyja ptuškam, — raspaviała Taćciana Aleška.

Akramia ptušak, fatohraf zdymaje i źviaroŭ. Surazmoŭnica padzialiłasia: nazirać za pavodzinami i emocyjami pradstaŭnikoŭ faŭny, ich uzajemadziejańniem pamiž saboj vielmi cikava — usio heta jana imkniecca pakazać na fatahrafijach.

Pavialičyć

— Asabliva radujusia, kali ŭdajecca źniać žyviołu bujnym płanam, kab byli bačnyja jaje vočy. Svajoj vystavaj ja chacieła b pryciahnuć uvahu haradžan da našych susiedziaŭ pa płaniecie — pradstaŭnikoŭ žyviolnaha śvietu. Pakazać tych ź ich, kaho nie kožny moža ŭbačyć užyvuju, i, kaniešnie, zaklikać ludziej kłapacicca pra navakolny śviet. Pavodle słoŭ navukoŭcaŭ, dalikatnaja raŭnavaha pamiž čałaviečaj cyvilizacyjaj i pryrodaj nabližajecca da punkta niezvarotu, — adznačyła fatohraf-animalist.

Choć fotavystava i nosić nazvu «Śviet dzikaj pryrody: pohlad praz abjektyŭ», usie zdymki zrobleny vyklučna ŭ Biełarusi, u samych roznych jaje miescach: zakaźnikach «Krasny Bor», «Nalibocki», «Vyhanaščanskaje», nacyjanalnych parkach «Biełaviežskaja pušča», «Brasłaŭskija aziory» i inšych miescach.

Pavialičyć

— U ekspazicyi pradstaŭleny raboty 2022—2025 hadoŭ. Sam praces fotazdymki zajmaje vielmi šmat času, bo redkich žyvioł časta davodzicca padpilnoŭvać u schoviščy. Žyvioły, jak i ludzi, vielmi roznyja. Naprykład, adna ptuška moža padpuścić da siabie davoli blizka, a inšaja palacić, jak tolki pačuje šorhat, — padzialiłasia T. Aleška. — Fatohrafa-animalista kormiać nohi: čym bolš jon jeździć i chodzić, tym bolš šancaŭ ubačyć niešta ŭnikalnaje. Naprykład, dla zdymki arłanaŭ treba pryjści ŭ miesca ich pražyvańnia jašče da śvitańnia, inakš ciabie mohuć zaŭvažyć varony i papiaredzić pra niebiaśpieku ŭsich navokał, tamu fatohrafu važna źlicca z pryrodaj i nie vydavać lišnich hukaŭ.

Łasioŭ lepš za ŭsio fatahrafavać na Brasłaŭščynie. Tam fatohrafam znajści i pryvabić žyvioł dapamahaje vopytny jehier Aleh Sielach.

— Ź jaho dapamohaj ja nieadnojčy akazvałasia davoli blizka da hetych pryhožych i mahutnych žyvioł, choć padčas honu jany mohuć być ahresiŭnymi. Ale kali bačyš hetuju pryhažość, zabyvaješsia pra ŭsio, imknučysia zrabić jašče krok nasustrač, — dadała fatohraf.

Pavialičyć

U asnoŭnym žyvioły bajacca ludziej i adrazu ŭciakajuć abo chavajucca, adčuŭšy niebiaśpieku. Ale i ludzi ŭ adkaz aścierahajucca niekatorych žyvioł, naprykład vaŭkoŭ. Choć vopytnyja fatohrafy viedajuć, što sustreć šeraha drapiežnika — vialikaja ŭdača. U vaŭkoŭ vydatny niuch, jany adčuvajuć čałavieka za kiłamietry, tamu źniać ich u dzikaj pryrodzie vielmi składana.

Vystava praciahniecca da 31 maja.

• 0
• 0
• 0
• 0
• 0
• 0
• 0
• 0