ŠI dapamoh znajści «naturalny Aziempik»

Preparaty na asnovie siemahłutydu, takija, jak «Aziempik», stali praryvam u lačeńni atłuścieńnia. Jany dapamahajuć źnizić apietyt i masu cieła, ale mohuć vyklikać pabočnyja efiekty — młosnaść, ciažkaści z aparažnieńniem kišečnika i inšyja prablemy sa stravavańniem. Akramia taho, padčas pachudzieńnia čałaviek moža hublać nie tolki tłušč, ale i myšačnuju masu.

Siemahłutyd imituje dziejańnie naturalnaha harmonu GLP-1, jaki ŭdzielničaje ŭ rehulavańni apietytu i ŭzroŭniu cukru ŭ kryvi. Adnak receptary, na jakija jon uździejničaje, znachodziacca nie tolki ŭ mozhu, ale i ŭ kišečniku, padstraŭnikavaj załozie dy inšych orhanach. Tamu dziejańnie preparatu nie abmiažoŭvajecca pryhłušeńniem pačućcia hoładu.

GLP-1 naležyć da pieptydnych harmonaŭ. Jany ŭtvarajucca, kali śpiecyjalnyja fiermienty rasščaplajuć vialikija białkovyja malekuły na mienšyja frahmienty — pieptydy. Niekatoryja z hetych frahmientaŭ stanoviacca harmonami, jakija rehulujuć roznyja pracesy ŭ arhaniźmie, u tym liku abmien rečyvaŭ i apietyt.

Prablema ŭ tym, što pry rasščapleńni białkoŭ moža ŭtvaracca vielizarnaja kolkaść pieptydaŭ. Vyznačyć, jakija ź ich majuć važnyja bijałahičnyja funkcyi, a jakija źjaŭlajucca prosta pabočnymi praduktami rasščapleńnia, nadzvyčaj składana.

Jak piša Science Daily, daśledčyki sa Stenfardskaha ŭniviersiteta vyrašyli pašukać siarod ich novyja rečyvy, zdolnyja rehulavać apietyt. Jany zasiarodzilisia na fiermiencie, jaki ŭdzielničaje va ŭtvareńni GLP-1 i inšych pieptydnych harmonaŭ.

Kab nie praviarać sotni tysiač mahčymych malekuł paasobku, navukoŭcy raspracavali ałharytm štučnaha intelektu Peptide Predictor. Jon praanalizavaŭ kala 20 tysiač čałaviečych hienaŭ, jakija kadzirujuć białki, i dapamoh znajści 373 białki, ź jakich mahli ŭtvarycca 2683 roznyja pieptydy.

Ź ich daśledčyki adabrali dla łabaratornych vyprabavańniaŭ sotniu rečyvaŭ, u tym liku ŭžo viadomy harmon GLP-1. Navukoŭcy praviarali, jak hetyja malekuły ŭpłyvajuć na aktyŭnaść niervovych kletak.

Najbolš cikavy vynik pakazaŭ raniej nieviadomy pieptyd z usiaho 12 aminakisłot, jaki nazvali BRP (BRINP 2‑related peptide). Jon pavialičvaŭ aktyŭnaść niervovych kletak u dziesiać razoŭ u paraŭnańni z kantrolnymi ŭzorami. Dla paraŭnańnia, GLP-1 pavialičvaŭ jaje ŭtraja.

Ale ci moža BRP nie tolki aktyvizavać niejrony, ale i ŭpłyvać na apietyt?

Što pakazali daśledavańni

Kab heta pravieryć, navukoŭcy ŭviali BRP myšam i karlikavym śvińniam. Apošnija bolš dakładna adlustroŭvajuć mietabalizm i charčovyja zvyčki čałavieka, čym myšy. Na praciahu hadziny paśla injekcyi žyvioły źjadali da 50% mienš ježy, čym zvyčajna.

U nastupnym ekśpierymiencie myšy z atłuścieńniem atrymlivali preparat štodnia na praciahu dvuch tydniaŭ. Za hety čas jany stracili ŭ siarednim try hramy vahi, tady jak myšy z kantrolnaj hrupy, naadvarot, nabrali kala troch hramaŭ. Pry hetym amal usia stračanaja vaha prypadała na tłušč, a nie myšcy. U žyvioł taksama palepšylisia pakazčyki zasvajeńnia hlukozy i reakcyi arhanizma na insulin.

Asabliva cikava, što daśledčyki nie vyjavili istotnych źmien u ruchalnaj aktyŭnaści, spažyvańni vady, pavodzinach, źviazanych z tryvožnaściu, i pracy kišečnika.

Mahčyma, sprava ŭ tym, što BRP dziejničaje inakš, čym siemahłutyd. Pavodle daśledčykaŭ, malekuła ŭpłyvaje pieravažna na hipatałamus — nievialiki adździeł mozha, jaki ŭdzielničaje ŭ rehulavańni hoładu i abmienu rečyvaŭ. Pry hetym jana aktyvizuje inšyja niejronnyja miechanizmy, čym GLP-1. Takoje bolš vybaračnaje dziejańnie tearetyčna moža dapamahčy paźbiehnuć častki pabočnych efiektaŭ, charakternych dla isnych preparataŭ dla pachudzieńnia.

Što dalej?

Adnak pakul BRP vypraboŭvali tolki na žyviołach. Nieviadoma, ci budzie malekuła hetak ža efiektyŭna źnižać apietyt u ludziej i ci sapraŭdy vyklikaje mienš pabočnych efiektaŭ.

Navukoŭcam taksama jašče treba vyśvietlić, ź jakimi mienavita kletkavymi receptarami ŭzajemadziejničaje BRP i jak padoŭžyć dziejańnie malekuły ŭ arhaniźmie. Pieptydy mohuć davoli chutka razburacca, tamu biez dadatkovych raspracovak preparat, mahčyma, daviadziecca ŭvodzić zanadta časta.

Daśledčyki ŭžo rychtujuć nastupny etap — vyprabavańni na ludziach. Tolki jany pakažuć, ci zmoža BRP stać sapraŭdnaj alternatyvaj aziempiku.

• 0
• 0
• 0
• 0
• 0
• 0
• 0
• 0