Stan Kirkorava padčas kancertu ŭ Ciumieni vyklikaŭ pytańni. Artystu pryjšłosia vybačacca i davać druhi kancert
Kancert Filipa Kirkorava ŭ Ciumienskaj fiłarmonii 9 listapada supravadžaŭsia skarhami hledačoŭ na stan artysta. Śpiavak pierasoŭvaŭsia ź ciažkaściu, siadzieŭ na kreśle mieŭ patrebu ŭ dapamozie padčas pieraapranańnia.
Vystup Filipa Kirkorava ŭ Ciumieni 9 listapada staŭ pradmietam aktyŭnaha abmierkavańnia ŭ sacyjalnych sietkach i miascovych miedyja. Kancert prachodziŭ u Ciumienskaj fiłarmonii, i, pavodle paviedamleńniaŭ u internecie, častka hledačoŭ zastałasia niezadavolenaj tym, jak artyst pravioŭ viečar, paviedamlaje tamtejšaje vydańnie «Tahił sici».
Hledačy apisvali jaho stan jak źniasileny: jon ź ciažkaściu pierasoŭvaŭsia pa scenie, doŭhi čas siadzieŭ na kreśle i, pavodle śćviardžeńniaŭ niekatorych naviedvalnikaŭ, nie dapiavaŭ asobnyja frahmienty piesień. Hetyja nazirańni sparadzili dźvie asnoŭnyja viersii — chvaroba abo ałkaholnaje apjanieńnie. Sam Kirkoraŭ abvierh padazreńni ŭ druhim vypadku, zajaviŭšy, što ŭ jaho była vysokaja tempieratura.
Niekatoryja hledačy pryjechali na kancert śpiecyjalna z susiednich rehijonaŭ — Novasibirska, Krasnajarska i Omska.
Vysoki košt kvitkoŭ staŭ adnym z arhumientaŭ dla tych, chto paśla šou ŭźniaŭ pytańnie ab kampiensacyi. U sacyjalnych sietkach źjavilisia kamientary z patrabavańniami viarnuć hrošy, a deputat Ciumienskaj abłasnoj dumy Ivan Viaršynin publična padtrymaŭ hetuju inicyjatyvu.
Sam Filip Kirkoraŭ paśla kancerta apublikavaŭ zvarot u sacyjalnych sietkach. U im jon nazvaŭ vystup u Ciumieni adnym z samych składanych za ŭsiu tvorčuju karjeru. Pavodle słoŭ artysta, jon vyjšaŭ na scenu z vysokaj tempieraturaj, i kožny numar davaŭsia jamu ź ciažkaściu. Śpiavak adznačyŭ, što nie staŭ admianiać kancert, kab nie padvieści hledačoŭ, jakija zahadzia nabyli bilety i pryjechali ź inšych haradoŭ.
U tym ža paviedamleńni jon pryznaŭ, što šou atrymałasia nie takim, jakim pavinna było być, i dapuściŭ, što chtości z hledačoŭ moh syści z pačućciom rasčaravańnia.
10 listapada rasijski śpiavak daŭ u Ciumieni druhi kancert.
Kamientary