Kiraŭnik Nvidia ŭ centry novaha skandału: akramia ramanu sa špijonkaj, u jaho byŭ raman z padnačalenaj
63‑hadovy suzasnavalnik i hiendyrektar Nvidia Džensen Chuanh mieŭ raman z 48‑hadovaj vice-prezidentkaj kampanii Kimbierli Paŭeł, jakaja niepasredna jamu padparadkoŭvajecca. Pra heta The New York Times raskazali piać čałaviek, jakija pracavali ŭ kampanii. Abodva majuć siemji.
Paŭeł kiruje ŭ Nvidia kirunkam achovy zdaroŭja. Jana dałučyłasia da kampanii ŭ 2008 hodzie, a ŭ kancy 2017‑ha stała vice-prezidentkaj. Jaje kamanda zajmajecca prymianieńniem technałohij Nvidia ŭ miedycynie.
Pavodle krynic haziety, adnosiny Chuanha i Paŭeł abmiarkoŭvali ŭnutry kampanii. U sakaviku, padčas štohadovaj kanfierencyi Nvidia ŭ kalifarnijskim San-Chase, ich bačyli ŭ hateli, kali jany prajaŭlali piaščotu adno da adnaho.
Adzin ź vidavočcaŭ źniaŭ heta na telefon. Jak raskazali try surazmoŭcy, znajomyja ź incydentam, achova Chuanha zaŭvažyła čałavieka, adviała jaho asobna i prapanavała padpisać pahadnieńnie ab nievydavańni.
Kodeks pavodzin Nvidia patrabuje paźbiahać situacyj, u jakich asabistyja adnosiny stvarajuć kanflikt intaresaŭ.
Kali žurnalisty patelefanavali Chuanhu i spytali pra stasunki z Paŭeł, jon adkazaŭ: «Nie dumaju, što vam varta razmaŭlać sa mnoj naŭprost» — i pakłaŭ słuchaŭku. Nvidia admoviłasia ad kamientara, Paŭeł na zapyt nie adkazała.
Novaja publikacyja źjaviłasia na fonie rasśledavańnia inšaha ramana Chuanha — z Elis Chuanh, kiraŭnicaj sinhapurskaj kampanii Megaspeed, bujnoha klijenta Nvidia. Amierykanskaja raźviedka ličyć jaje źviazanaj z kitajskimi śpiecsłužbami.
8 listapada Chuanh u liście supracoŭnikam pryznaŭsia ŭ zdradzie žoncy. Saviet dyrektaraŭ Nvidia raspačaŭ rasśledavańnie. Kiraŭniki troch upłyvovych kamitetaŭ Pałaty pradstaŭnikoŭ ZŠA taksama zaprasili jaho na zakrytuju sustreču, kab raspytać pra kantakty z Elis Chuanh.
Na hetym tydni Donald Tramp zastupiŭsia za kiraŭnika Nvidia i nazvaŭ jaho «prystojnym čałaviekam».
Ciapier čytajuć
Advakat Alaksandr Danilevič: Mianie adviali ŭ kletku na KPP i začytali ŭkaz dla słužbovaha karystańnia pra pamiłavańnie pa prośbie Mižnarodnaha alimpijskaha kamiteta88
Kamientary