Malunak brytanskaha prynca Džordža apublikavali ŭ viadomym časopisie. Redaktaram byŭ jahony baćka
Malunak zimarodka, zrobleny 13‑hadovym pryncam Džordžam, apublikavali ŭ śpiecyjalnym vypusku časopisa Country Life, zaprošanym redaktaram jakoha staŭ jaho baćka, prync Uiljam. Na malunku, jaki chłopiec zrabiŭ hetaj viasnoj, kali jamu było 12 hadoŭ, namalavanaja jarkaja ptuška, što siadzić na halincy, piša Bi-bi-si.
Śpiecyjalny vypusk časopisa naličvaje 300 staronak. U im taksama nadrukavanaje intervju z pryncesaj Uelskaj Ketryn, u jakim jana raskazała pra adnaŭleńnie paśla lačeńnia ad raku. Pavodle jaje słoŭ, daktary papiaredžvali, što na hetym šlachu buduć jak dobryja, tak i drennyja dni.
Prync Džordž, jaki, jak paviedamlajecca, lubić malavać, praciahvaje siamiejnuju tradycyju. Jahony dziadula, ciapierašni karol Karł III, taksama zachaplajecca žyvapisam. Maci Džordža i jahony dziadźka, hiercah Sasiekski, vyvučali mastactva ŭ starejšych kłasach škoły ŭ miežach prahramy A-level. Ketryn, akramia taho, atrymała ŭniviersiteckuju adukacyju ŭ halinie historyi mastactvaŭ.
U minułym hodzie Ketryn, Džordž, a taksama małodšyja dzieci prynca i pryncesy Uelskich — Šarłota i Łui — namalavali partrety adno adnaho. Kiensinhtanski pałac apublikavaŭ usie čatyry malunki ŭ sacyjalnych sietkach. U pałacy patłumačyli, što takaja tvorčaja dziejnaść dapamahła členam siamji adčuć blizkaść, uvažliva pahladzieć adno na adnaho i zasiarodzicca adno na adnym.
U intervju piśmieńniku-pryrodaznaŭcu Robiertu Makfarlejnu Ketryn raskazała, što adnaŭleńnie paśla chvaroby nie adbyvajecca pa pramoj linii. Jana paraŭnała hety praces z pryrodaj, u jakoj pieryjady adpačynku, rozdumaŭ i abnaŭleńnia nie mienš važnyja, čym čas rostu.
U inšym materyjale časopisa prync Uiljam raskazvaje pra prahułki sa svaimi sabakami Orłaj i Ota, a taksama pra toje, jak jahonyja dzieci lubiać byvać na śviežym pavietry i daśledavać navakolny śviet. Jon taksama pryznajecca, što lubić zachodzić u pab i vypić pintu sidru ź lodam.
Jašče adna važnaja tema vypusku — biaśpieka žančyn, jakija słužać va Uzbrojenych siłach Vialikabrytanii. Prync Uiljam zaklikaŭ źmianić atmaśfieru ŭ vojsku, zrabić jaje bolš adkrytaj dla žančyn i zasnavanaj na pavazie da ich. Pavodle jaho słoŭ, nieabchodna prykłaści bolš namahańniaŭ, kab abaranić vajskovak ad seksualnych damahańniaŭ.
Hetyja zajavy prahučali na fonie abstavinaŭ śmierci 19‑hadovaj vajskoŭki Džejśli Biek u 2021 hodzie. Karanier pryjšoŭ da vysnovy, što biaździejańnie armii spryjała jaje samahubstvu. Kamandzir dziaŭčyny damahaŭsia jaje, a inšy vajskoviec učyniŭ u dačynieńni da jaje seksualny hvałt, adnak vajskovaje kiraŭnictva nie pryniało nieabchodnych mier.
U časopisie taksama pradstaŭlenyja hałoŭny trenier futbolnaha kłuba «Astan Viła» Unai Emiery. Napiaredadni vychadu vypusku jon nazvaŭ padtrymku kłuba z boku prynca Uiljama fantastyčnaj. Pavodle jaho słoŭ, kamanda hanarycca mahčymaściu radavać prynca dobrymi navinami, vynikami i pryjemnymi futbolnymi momantami.
Prync Uiljam nie pieršy vysokapastaŭleny pradstaŭnik brytanskaj karaleŭskaj siamji, jaki staŭ zaprošanym redaktaram Country Life. Karol Karł III niekalki razoŭ braŭ na siabie hetu rolu, u tym liku z nahody svajho 65‑hodździa i 70-hodździa. Raniej śpiecyjalnyja vypuski časopisa redahavali taksama karaleva Kamiła i pryncesa Hanna.
Biełarusy admovilisia ad zajčykaŭ, a brytanski funt źbirajecca pierajści na ich vyjavy
Baćku Miehan Markł abvinavacili ŭ seksualnym hvałcie nad dziećmi. Jana nie stała maŭčać
«Budźcie ŭpeŭnienyja, my davoli chutka jaje zabudziem». Uspaminy brata pryncesy Dyjany vyklikali abureńnie karaleŭskaj siamji
Dzieci Hary i Miehan źmianili škołu praź niekalki dzion paśla pačatku hoda. Pryčyna — intensiŭny darožny ruch
Kamientary