31 žniŭnia, pad čas akcyi pratestu deputata miascovaha harsavietu Alesia Čyhira ŭ Babrusjsku byli zatrymanyja žurnalisty. «Biełaruskaja asacyjacyja žurnalistaŭ» źviarnułasia da prakurora Leninskaha rajonu Babrujsku z patrabavańniem pryciahnuć da adkaznaści supracoŭnikaŭ milicyi, jakija parušyli pravy žurnalistaŭ i biełaruskaje zakanadaŭstva ab ŚMI.
28 vieraśnia supracoŭniki niedziaržaŭnaj hazety «Bobrujskij kuŕjer» Volha Marjasina i Ihar Chodźka byli vyklikany ŭ haradzki adździeł milicyi Babrujska dla śviedčańnia pa fakcie zatrymańnia supracoŭnikami milicyi bolš jak 10 žurnalistaŭ. Incydent adbyŭsia 31 žniŭnia, pad čas akcyi pratestu deputata miascovaha harsavieta A. Čyhira, jakuju jon ładziŭ na centralnaj płoščy Babrujska. Siarod zatrymanych apynulisia i žurnalisty «Bobrujskoho kuŕjera».
12 vieraśnia «Biełaruskaja asacyjacyja žurnalistaŭ» źviarnułasia da prakurora Leninskaha rajona Babrujska Viktara Haŭrykava z patrabavańniem pryciahnuć da adkaznaści supracoŭnikaŭ milicyi, jakija parušyli pravy žurnalistaŭ i biełaruskaje zakanadaŭstva ab ŚMI. «Žurnalisty mieli pry sabie žurnalisckija paśviedčańni, inšyja dakumienty, paćviardžajučyja asobu, nie prymali ŭdzieł u akcyi, a vykonvali svaje prafiesijnyja abaviazki. Tym nia mienš, jany byli zatrymanyja na padstavie vyśviatleńnia asoby, da niekatorych z žurnalistaŭ prymianiałasia fizyčnaja siła... U fotakarespandentaŭ byli ściortyja zroblenyja imi zdymki», – vykładziena ŭ zajavie prakuroru.
Jak možna zrazumieć, pačałosia rasśledavańnie. Ale – što ździŭlaje – raśśledavańniem zajmajecca toj ža adździeł achovy hramadskaha paradku i prafiłaktyki AUS Babrujskaha harvykankama, supracoŭniki jakoha i pravodzili zatrymańnie žurnalistaŭ. Jak raskazała pres-słužbie BAŽ žurnalistka «Bobrujskoho kuŕjera» Volha Marjasina, śledčy zapisaŭ tłumačeńni ź jaje słovaŭ u pratakoł, ale nia daŭ aznajomicca z materyjałami spravy. Sa słovaŭ Volhi, joj zadavali mnostva pytańniaŭ, jakija nia majuć dačynieńnia da sutnaści spravy – pačynajučy tematykaj, u jakoj jana pracuje, i zakančvajučy dataj vydačy joj žurnalisckaha paśviedčańnia. Ihar Chodźka zaraz znachodzicca ŭ adpačynku i tamu nia zmoh źjavicca ŭ milicyju.
Nahadajem, sioleta 31 žniŭnia žurnalisty biełaruskich i zamiežnych ŚMI byli zatrymanyja milicyjaj pry vykanańni svaich prafiesijnych abaviazkaŭ – aśviatleńni akcyi pratestu na płoščy Lenina h. Babrujska. U toj dzień deputat haradskoha savieta, šmatdzietny baćka, nastaŭnik historyi Alaksandr Čyhir prykavaŭ siabie łancuhom da apory lichtara ŭ znak pratestu suprać zvalnieńnia jaho z pracy za hramadzkuju dziejnaść (z A. Čyhirom nie praciahnuli kantrakt). Usie supracoŭniki ŚMI, jakija prysutničali ŭ hety čas na płoščy, byli zatrymany i adviezieny ŭ milicyju. Tam ich pratrymali kala troch hadzin i praviali z kožnym paasobku «prafiłaktyčnuju» razmovu «biez pratakoła».
❏
Hladzi jašče:
Zatrymanych u Babrujsku žurnalistaŭ pačali adpuskać (abnoŭlena ŭ 15.44)
Fotachronika zatrymańnia Alesia Čyhira
Kamientary