«Nioman» pakazaŭ zuby

Finał XIX adkrytaha čempijanatu Biełarusi pa chakiei prajšoŭ z maleńkaj siensacyjaj. U finalnaj sieryi płej-of hrodzienski «Nioman» upieršyniu pieramoh minskaje «Junactva».

Jašče paśla treciaj parazy ŭ Hrodnie nastaŭnik «Niomana» Dźmitryj Kraŭčanka skazaŭ, što ŭ finale sustrelisia kamandy z roznych vahavych katehoryj, tamu vynik supraćstajańnia možna ličyć pieradvyrašanym. Akrylonyja ž pieramohami minčanie, jakija, miž inšym, sprabujuć prarvacca ŭ Kantynientalnuju chakiejnuju lihu, pierad apošniaj hulnioj nie žadali hublać status favarytaŭ i zaciahvać finalnuju sieryju da sustreč u Minsku.

«Junactva» stanaviłasia čempijonam Biełarusi ažno piać razoŭ — 2004, 2005, 2006, 2009 i 2010 hodzie. «Nioman» vyjhravaŭ čempijanat trojčy  — u 1998, 1999 i 2001 hodzie. Da finalnaj sieryi supierniki sioleta ŭ rehularnym čempijanacie hulali piać razoŭ. Pa pieramohach napieradzie akazałasia «Junactva» — 3 z 5 hulniaŭ minčuki vyjhrali.

Pieršyja dva matčy prajšli na chatniaj placoŭcy minskaha «Junactva», što vyklikała vialikaje niezadavalnieńnie zaŭziataraŭ «Niomana» —

ladovy pałac staličnaha kłuba ŭ Parku Horkaha ŭmiaščaje mienš za tysiaču hledačoŭ.

Kiraŭnictva «Junactva» nie žadała hublać vyhodaŭ hulni na rodnaj placoŭcy i nijak nie adreahavała navat na napisany zaŭziatarami «Niomana» list u Fiederacyju chakieja Biełarusi ab pieranosie minskich matčaŭ na inšuju arenu.

Zrešty na list nijak nie adreahavała i sama Fiederacyja.

Zaŭziatary «Niomana», zažuryŭšysia pa dobrym chakiei, za tydzień da chatnich matčaŭ užo raskupili ŭsie kvitki. Niekatoryja ź ich nie pabajalisia stajać ŭ čerhach hrodzienskaha Ladovaha pałaca pa 5–6 hadzin. Tamu na hrodzienskich trybunach usie dva matčy sieryi prajšli z anšłaham — volnaha miesca nie było, a ludzi zajmali navat stajačyja miescy. Ahułam finalny matč nazirała bolš za 3000 hledačoŭ.

Uvohule «Nioman» pa naviedvańniu chatnich matčaŭ maje samy lepšy pakazčyk u hetym čempijanacie.

Da čaćviortaha matču chod finalnaj sieryi byŭ 3:0 na karyść staličnaha kłuba — 1:6, 0:3, 3:4 (OT).

28 sakavika «Junactva» vychodziła na lod hrodzienskaha Ladovaha pałacu tolki dziela adnaho — pieramohi.

Zaciahvać siezon nichto nie žadaje, tym bolš što na nosie čakajecca padrychtoŭka zbornaj Biełarusi da Čempijanatu śvietu. Haradziencam ža ŭžo nie było čaho hublać — treba było ryzykavać.

Pieršy pieryjad staličny kłub pačaŭ z aktyŭnych atak. Ale padnačalenyja Dźmitryja Kraŭčanki vynieśli pravilny dośvied ź minułych troch paraz — abarona haradziencaŭ adpracavała na vydatna. Redkija ataki «Niomana» prynieśli pośpiech na 17 chvilinie — streł Karšunova akazaŭsia dakładnym. Druhi pieryjad «Junactva» pačało našmat ahresiŭniej — da varot hałkipiera «Niomana» ataki sypalisia vielmi časta. Amal uvieś druhi pieryjad staličny kłub prosta daminavaŭ na placoŭcy. Maciaruchin na 25 chvilinie robić lik 1:1, na 27-aj 1:2 robić užo Cimčanka, na 28-j 1:3 zapaliŭ na tabło Kurylin — nievierahodny spurt ad «Junactva».

Abarona «Niomana» ledź nie rassypałasia, kolkaść pamyłak ździŭlała navat balelščykaŭ.

Naprykancy druhoha pieryjada na 40-j chvilinie haradziency vykarystali kolkasnuju pieravahu 5 suprać 3 — Jaromin vyjšaŭ adzin na adzin z hałkipieram «Junactva» i dakładna paceliŭ — 2:3.

U hety čas źjaviłasia nadzieja, što nie ŭsio dla haradziencaŭ jašče stračana…

Treci pieryjad dla «Junactva» staŭ pravalnym. Vosipaŭ na 41-aj chvilinie robić lik 3:3. Padnačalenyja Michaiła Zacharava vyhladali ŭžo stomlenymi. Było jasna, što kamandy hulajuć na oviertajm — kožny dapuskaŭ šmat pamyłak i pralikaŭ. Pieršaja dadatkovaja dvaccacichilinka nie vyjaviła macniejšaha, chacia i kamandy radavali chutkimi atakami, ale nichto nie zmoh realizavać svaje momanty. Było zaŭvažna, što kamandy razyhryvajuć svojeasablivuju łatareju — kamu pašancuje chutčej. Napačatku druhoha oviertajma adna z atak haradziencaŭ mieła pośpiech — Dudzik zabivaje pieramožnuju šajbu i praciahvaje zmahańnie «Niomana» u finalnaj sieryi.

Piaty matč užo projdzie na niejtralnaj dla «Junactva» «Minsk-Arenie» 30 sakavika.

• 0
• 0
• 0
• 0
• 0
• 0
• 0
• 0