«Нёман» паказаў зубы

Фінал XIX адкрытага чэмпіянату Беларусі па хакеі прайшоў з маленькай сенсацыяй. У фінальнай серыі плэй-оф гродзенскі «Нёман» упершыню перамог мінскае «Юнацтва».

Яшчэ пасля трэцяй паразы ў Гродне настаўнік «Нёмана» Дзмітрый Краўчанка сказаў, што ў фінале сустрэліся каманды з розных вагавых катэгорый, таму вынік супрацьстаяння можна лічыць перадвырашаным. Акрылёныя ж перамогамі мінчане, якія, між іншым, спрабуюць прарвацца ў Кантынентальную хакейную лігу, перад апошняй гульнёй не жадалі губляць статус фаварытаў і зацягваць фінальную серыю да сустрэч у Мінску.

«Юнацтва» станавілася чэмпіёнам Беларусі ажно пяць разоў — 2004, 2005, 2006, 2009 і 2010 годзе. «Нёман» выйграваў чэмпіянат тройчы  — у 1998, 1999 і 2001 годзе. Да фінальнай серыі супернікі сёлета ў рэгулярным чэмпіянаце гулялі пяць разоў. Па перамогах наперадзе аказалася «Юнацтва» — 3 з 5 гульняў мінчукі выйгралі.

Першыя два матчы прайшлі на хатняй пляцоўцы мінскага «Юнацтва», што выклікала вялікае незадавальненне заўзятараў «Нёмана» —

лядовы палац сталічнага клуба ў Парку Горкага ўмяшчае менш за тысячу гледачоў.

Кіраўніцтва «Юнацтва» не жадала губляць выгодаў гульні на роднай пляцоўцы і ніяк не адрэагавала нават на напісаны заўзятарамі «Нёмана» ліст у Федэрацыю хакея Беларусі аб пераносе мінскіх матчаў на іншую арэну.

Зрэшты на ліст ніяк не адрэагавала і сама Федэрацыя.

Заўзятары «Нёмана», зажурыўшыся па добрым хакеі, за тыдзень да хатніх матчаў ужо раскупілі ўсе квіткі. Некаторыя з іх не пабаяліся стаяць ў чэргах гродзенскага Лядовага палаца па 5–6 гадзін. Таму на гродзенскіх трыбунах усе два матчы серыі прайшлі з аншлагам — вольнага месца не было, а людзі займалі нават стаячыя месцы. Агулам фінальны матч назірала больш за 3000 гледачоў.

Увогуле «Нёман» па наведванню хатніх матчаў мае самы лепшы паказчык у гэтым чэмпіянаце.

Да чацвёртага матчу ход фінальнай серыі быў 3:0 на карысць сталічнага клуба — 1:6, 0:3, 3:4 (ОТ).

28 сакавіка «Юнацтва» выходзіла на лёд гродзенскага Лядовага палацу толькі дзеля аднаго — перамогі.

Зацягваць сезон ніхто не жадае, тым больш што на носе чакаецца падрыхтоўка зборнай Беларусі да Чэмпіянату свету. Гарадзенцам жа ўжо не было чаго губляць — трэба было рызыкаваць.

Першы перыяд сталічны клуб пачаў з актыўных атак. Але падначаленыя Дзмітрыя Краўчанкі вынеслі правільны досвед з мінулых трох параз — абарона гарадзенцаў адпрацавала на выдатна. Рэдкія атакі «Нёмана» прынеслі поспех на 17 хвіліне — стрэл Каршунова аказаўся дакладным. Другі перыяд «Юнацтва» пачало нашмат агрэсіўней — да варот галкіпера «Нёмана» атакі сыпаліся вельмі часта. Амаль увесь другі перыяд сталічны клуб проста дамінаваў на пляцоўцы. Мацярухін на 25 хвіліне робіць лік 1:1, на 27-ай 1:2 робіць ужо Цімчанка, на 28-й 1:3 запаліў на табло Курылін — неверагодны спурт ад «Юнацтва».

Абарона «Нёмана» ледзь не рассыпалася, колькасць памылак здзіўляла нават балельшчыкаў.

Напрыканцы другога перыяда на 40-й хвіліне гарадзенцы выкарысталі колькасную перавагу 5 супраць 3 — Яромін выйшаў адзін на адзін з галкіперам «Юнацтва» і дакладна пацэліў — 2:3.

У гэты час з’явілася надзея, што не ўсё для гарадзенцаў яшчэ страчана…

Трэці перыяд для «Юнацтва» стаў правальным. Восіпаў на 41-ай хвіліне робіць лік 3:3. Падначаленыя Міхаіла Захарава выглядалі ўжо стомленымі. Было ясна, што каманды гуляюць на овертайм — кожны дапускаў шмат памылак і пралікаў. Першая дадатковая дваццаціхілінка не выявіла мацнейшага, хаця і каманды радавалі хуткімі атакамі, але ніхто не змог рэалізаваць свае моманты. Было заўважна, што каманды разыгрываюць своеасаблівую латарэю — каму пашанцуе хутчэй. Напачатку другога овертайма адна з атак гарадзенцаў мела поспех — Дудзік забівае пераможную шайбу і працягвае змаганне «Нёмана» у фінальнай серыі.

Пяты матч ужо пройдзе на нейтральнай для «Юнацтва» «Мінск-Арэне» 30 сакавіка.

• 0
• 0
• 0
• 0
• 0
• 0
• 0
• 0