Žonka Alaksandra Kłaskoŭskaha-małodšaha sustrełasia z mužam upieršyniu z momantu jaho zatrymańnia
Natalla Kłaskoŭskaja, žonka Alaksandra Kłaskoŭskaha, jaki znachodzicca ŭ SIZA KDB, sustrełasia z mužam upieršyniu z momantu jaho zatrymańnia. Jak jana paviedamiła BiełaPAN, sustreča adbyłasia 29 sakavika.
Były supracoŭnik milicyi Alaksandr Kłaskoŭski byŭ zatrymany ŭ noč na 21 śniežnia ŭ siabie doma ŭ suviazi z udziełam 19 śniežnia ŭ niesankcyjanavanaj akcyi ŭ Minsku i źmieščany ŭ SIZA KDB. Jamu pradjaŭlajecca abvinavačańnie ŭ arhanizacyi i ŭdziele ŭ masavych biesparadkach (čč. 1 i 2 art. 293 KK), u źniavazie pradstaŭnika ŭłady (art. 369 KK) i ŭ samavolnym prysvajeńni zvańnia abo ŭłady słužbovaj asoby (art. 382 KK). Kłaskoŭskamu pahražaje da 15 hadoŭ pazbaŭleńnia voli.
«Jak i naležyć pa zakanadaŭstvie, sustreča praciahvałasia try hadziny, — paviedamiła Natalla Kłaskoŭskaja. — My staralisia nie zakranać temy, jakija mahli b jamu naškodzić. Joje kazaŭ, što ŭ kamiery stała mienš ludziej — ich tam zaraz čatyry. Vielmi šakiravany pradjaŭlenymi abvinavačańniami».
Jak zaznačyła Natalla, Kłaskoŭski choča, kab jaho chutčej asudzili i adpravili ŭ miescy pazbaŭleńnia voli. «Jon kaža, što jamu lepš budzie tam, kab jaho pieraviali ź SIZA KDB. Dasłoŭna jon skazaŭ:
«Usio, što kaža Michalevič, — praŭda»,
— paviedamiła Natalla. Nahadajem, były kandydat u prezidenty Aleś Michalevič, paśla taho, jak byŭ vyzvaleny sa śledčaha izalatara KDB, zajaviŭ, što ŭ SIZA KDB zatrymanych padviarhajuć katavańniam i biesčałaviečnamu abychodžańniu.
«Da Alaksandra prychodziŭ čałaviek z Hienieralnaj prakuratury, pytaŭsia, ci jość u jaho skarhi na ŭmovy ŭtrymańnia. Viadoma, Alaksandr adkazaŭ, što skarhaŭ u jaho niama. Inakš, jak jon skazaŭ, umovy i biez taho nialohkija, pahoršylisia b jašče bolš», — skazała Natalla.
Jana zaznačyła, što kryminalnaja sprava ŭ dačynieńni da muža ŭžo pieradadzienaja ŭ prakuraturu, jakaja pavinna nakiravać jaje ŭ sud.
Kamientary