Chronika represij i supracivu

Cisk na palitviaźnia Fińkieviča

Uviečary supracoŭniki mahiloŭskaje papraŭčaje ŭstanovy adkrytaha typu zrabili pieratrus asabistych rečaŭ u palitviaźnia Artura Fińkieviča. Artur miarkuje, što metaj pieratrusu byŭ mabilny telefon.

BRSM viadzie daterminovuju ahitacyju?

Praktyčna va ŭsie paštovyja skryni vybarčaj akruhi, na jakoj balatujecca spadar Truchan, patencyjny kandydat u deputaty ŭ Słucki harsaviet, staršynia Mienskaha abłasnoha kamitetu BRSM Rusłan Truchan, zakinutyja ŭlotki, jakija ŭtrymlivajuć padrabiaznyja bijahrafičnyja źviestki "kamsamolca"-aktyvista, a taksama niekalki jaho fatazdymkaŭ.

Sprava Voŭčaka spynienaja

Administracyjnaja sprava suprać pravaabaroncy Aleha Voŭčaka spynienaja ŭ suviazi z zakančeńniem terminu daŭnaści. Takoje rašeńnie pryniaŭ 7 śniežnia sudździa Kastryčnickaha rajonu Mienska Siarhiej Hierasimovič. Sprava ŭ dačynieńni A.Voŭčaka była zaviedzienaja pa art. 193-5 Kodeksu ab administracyjnych pravaparušeńniach (nievykanańnie paradku ŭžyvańnia mieraŭ ekanamičnaj palityki i inšych abmiežavańniaŭ padčas pieravozu tavaraŭ praź miažu). Pravaabaroncu pahražaŭ štraf ad 50 da 300 bazavych vieličyń.

Daškieviča nakiravali ŭ Škłoŭ

Lidera niezarehistravanaha «Maładoha Frontu» Źmitra Daškieviča nakiravali adbyvać pakarańnie ŭ kaloniju ŭzmocnienaha režymu №17 u h. Škłoŭ Mahiloŭskaj vobłaści. Zroblena heta było da razhladu kasacyjnaj skarhi.

Nie puścili polskich i ŭkrainskich aktoraŭ

Mižnarodnuju teatralnuju trupu nie puścili ŭ Biełaruś z spektaklem pavodle tvoru Śviatłany Aleksijevič "Čarnobylskaja malitva". Vizyt teatru ŭ Homielskuju vobłaść byŭ zaplanavany na 6–7 śniežnia. Biełaruskija mytniki dvojčy admovili aktoram polskaha «Teatr Biuro Podrozy» i teatra «Arabieski» z Ukrainy ŭ pierasiačeńni miažy. Pryčynaj hetamu – nibyta niapravilna aformlenyja dakumenty na pravoz dekaracyjaŭ.

«Vitiebskij kuŕjer» vyhnali

Redakcyja niezaležnaj hramadzka-palityčnaj hazety «Vitiebskij kuŕjer» atrymała piśmovy zahad ad svajho arendadaŭcy AAT «Ełsan» – pakinuć pamiaškańnie, zajmanaje redakcyjaj, na praciahu dvuch sutak.

Carkva «Novaje Žyćcio» atrymała list z Upraŭleńnia ŭnutranych spravaŭ Administracyi Centralnaha rajonu Miensku za podpisam načalnika ŭpraŭleńnia V. Siniakova. U liście paviedamlajecca, što carkvie admoŭlena ŭ zaviadzieńni kryminalnaj spravy ŭ dačynieńni da žurnalistki Ł.Džurajevaj, a taksama ŭdzielnikaŭ jaje siužetu A.Rabicavaj i I.Januškieviča. Nahoda – adsutnaść u dziejańniach apošnich prykmietaŭ złačynstva.

Dniom raniej u prezydyjumie Vyšejšaha haspadarčaha suda (VHS) prajšli papiarednija słuchańni pa spravie carkvy «Novaje žyćcio», na jakim baki vykazali patrabavańni i ŭdakładnili svaje pazycyi. Mienharvykankam pazycyi nie źmianiŭ. Heta paćvierdziŭ pradstaŭnik Mienharvykankamu juryskonsult Kamitetu pa ziemleŭparadkavańni Ihar Kaśpiarovič. Jon dadatkova adznačyŭ, što «carkva, jak ułaśnik pamiaškańnia nia mieła prava vykarystoŭvać jaho (pamiaškańnie) ni ŭ jaki sposab». Varta nahadać, što VHS raspačaŭ razhlad hetaj spravy ŭ pieršaj instancyi paśla taho, jak 4 listapada prezydyjum VHS admianiŭ papiarednija rašeńni Mienskaha haspadarčaha sudu adnosna carkvy.

Pamiežniki admaŭlajucca addavać pašpart synu Milinkieviča

Syn lidera abjadnanych demakratyčnych sił Alaksandra Milinkieviča (taksama Alaksandar) źjaviŭsia va Upraŭleńnie kantrolna-prapusknych punktaŭ, dzie pavodle abiacańniaŭ Dziaržaŭnaha kamitetu pamiežnych vojsk, jamu pavinny byli viarnuć adabrany 29 listapada pašpart. Adnak, zamiest pašpartu, syn palityka byŭ padvierhnuty dźviuchhadzinnamu dopytu. Pamiežnikaŭ cikaviła, jakim čynam jahony pašpart apynuŭsia ŭ baćki.

Strajk na abutkovym pradpryjemstvie «Čyrvony kastryčnik»

Atrymaŭšy raźlikovyja kvitki, supracoŭnicy «Čyrvonaha kastryčnika» ŭbačyli, što ichnyja zarobki za minuły miesiac źmienšylisia prykładna na 100 tysiač rubloŭ. Heta i stałasia asnoŭnaj pryčynaj strajku. Rabotnicy skardzilisia taksama na drennyja ŭmovy pracy: u ich nie praduhledžany pierapynak na abied, pracavać davodzicca i ŭ vychodnyja. Svaje patrabavańni šaŭčychi vykłali ŭ liście dyrektaru «Čyrvonaha kastryčnika» j paviedamili pra strajk admnistracyi. Adnak nichto z načalstva da ich u cech nie pryjšoŭ.

Verbavali ŭ KDB

Babrujskaha dziejača Ihara Choćku vyklikali na razmovu ŭ miascovaje KDB. Vyklikali jaho tudy jašče ź leta, ale sp.Choćka admaŭlaŭsia pa pryčynie zaniataści. Na hutarku pajšoŭ paśla taho, jak padaŭ dakumenty na rehistracyju jaho kandydatam u deputaty miascovaha savietu i atrymaŭ čarhovaje telefonnaje zaprašeńnie. Namieśnik načalnika Babrujskaha KDB pryčyny vykliku aktyvistu tak i nie patłumačyŭ, ale, sa słovaŭ, prapanavaŭ supracoŭnictva ŭ abmien na deputactva.

Aperacyja «pierachop»

10 śniežnia napiaredadni zaplanavanaj akcyi salidarnaści z Alaksandram Kazulinym i inšymi palitźniavolenymi na Kastryčnickaj płoščy, la siadziby BNF milicyjantami ŭ cyvilnym byŭ zatrymany namieśnik staršyni Biełaruskaj sacyjał-demakratyčnaj partyi (Hramady) Alaksiej Karol. U pastarunku Saviecaha rajonu palityku patłumačyli, što adbyvajecca aperacyja «Pierachop», a sam jon nibyta padobny da taho, chto skraŭ aŭtamabil», – zajavili palityku ŭ milicejskim pastarunku Savieckaha rajonu. Paśla taho, jak akcyja salidarnaści była žorstka razahnanaja siłavikami, Alaksiej Karol byŭ adpuščany. La siadziby BNF taksama byli zatrymanyja moładzievyja aktyvisty Franak Viačorka, Maksim Vielimovič i Siarhiej Karpovič, na jakich skłali administratyŭny pratakoł pa art. 172.3 KaAP – raspaŭsiud drukavanaj pradukcyi, źmiest jakoj nanosić škodu dziaržaŭnamu ładu, pravam i zakonnym intaresam hramadzianaŭ. Chłopcy razdavali dakład śpiecdakładčyka AAN pa Biełarusi Adryjana Sieviaryna. Administratyŭnyja pratakoły budzie razhladać administratyŭnaja kamisija, sankcyi pa dadzienym artykule praduhledžvajuć štraf da 5 bazavych adzinak.

U časie razhonu akcyi salidarnaści z palitźniavolenymi ŭ rajonie Kastryčnickaj płoščy byli zatrymanyja: Bialacki Aleś, Stefanovič Valancin, Labiedźka Anatol, Kalita Aleś, Palevikova Valancina, Sierbantova Aryna, Mikłaševič Siarhiej, Kasianik Lina (1931 hodu naradžeńnia), Łaŭrynovič Alaksandar, Žuraŭlova Volha, Bahdanovič Raman, Mielnik Alaksiej, Jasiuk Alesia, Vieracinski Hienadź, Łatuškin Dźmitry, Iŭleŭ Alaksandar, Karšukoŭ Mikałaj, Ryžkoŭ Juraś, Lipień Anton, Makajeŭ Alaksandar, Čajkoŭski Pavał, Korban Aleh, Siarhiejeŭ Uładzimier, Fiedaruk Źmicier.

Raściažki «Svabodu Kazulinu!» źjavilisia 10 śniežnia, u Dzień pravoŭ čałavieka, u Miensku i Barysavie.

Troch junakoŭ pakarali aryštam

Sudździa Centralnaha rajonu Miensku Alaksiej Byčko vynies vyrak: Aleh Korban i Źmicier Chviedaruk pavinny adbyć 15 sutak administracyjnaha aryštu, Uładzimier Siarhiejeŭ – 3 sutak za ŭdzieł u pikiecie 10 śniežnia.

Vysialeńnie «Baćkaŭščyny»

U Haspadarčym sudzie Miensku adbyłosia čarhovaje pasiadžeńnie pa spravie MHA «Zhurtavańnie biełarusaŭ śvietu «Baćkaŭščyna». Cudździa Mielnikava pastanaviła admianić asnoŭny pazoŭ KUP «Mienskaja spadčyna» da MHA «Zhurtavańnie biełarusaŭ śvietu «Baćkaŭščyna» ab skasavańni arendy, a taksama sustrečny pazoŭ «Baćkaŭščyny» da arendadaŭcy. Pryčyna anulavańnia zyskaŭ u sudzie nie była pradstaŭlenaja. Matyvacyjnuju častku sudovaha rašeńnia ŭdzielniki sprečki atrymajuć u najbližejšy čas poštaj.