Teraryst Anders Brejvik naviedvaŭ Biełaruś

Palityčny režym u Biełarusi jon nazyvaje dyktatarskim i adznačaje «nardyčny charaktar» bolšaści žycharoŭ krainy.

U Biełaruś teraryst jeździŭ, kab vyvučyć ŭździejańnie na ludziej avaryi na Čarnobylskaj atamnaj stancyi.

U svaim manifieście 2083: A European Declaration of Independence, jaki jon apublikavaŭ u internecie za dźvie hadziny da terakta, narviežski teraryst apisvaje Biełaruś jak krainu, jakaja paciarpieła ad Čarnobyla: «Bolšaść ludziej byli apramienienyja, jak prosty vynik taho, što ŭ Savieckim Sajuzie nie chacieli evakujavać ludziej (adzin tydzień zatrymki). I jany nie žadali praduchilić raspaŭsiud zabrudžanych sielhaspraduktaŭ. Akramia taho, dyktatura ŭ Biełarusi naŭmysna praciahvaje raspaŭsiudžvać sielskahaspadarčuju pradukcyju z zabrudžanych terytoryj. Ja byŭ u Biełarusi i mahu asabista paćvierdzić heta. Ja razmaŭlaŭ ź dziasiatkami ludziej, u jakich nie było vybaru, akramia jak ŭžyvać zabrudžanuju ježu. 60% radyjeaktyŭnych apadkaŭ vypali ŭ Biełarusi». Brejvik piša, što avaryja ŭ Čarnobyli padarvała siły Savieckaha Sajuza. Jon ličyć, što anałahičnaja avaryja ŭ Zachodniaj Jeŭropie moža razburyć Jeŭrapiejski Sajuz Savieckich Sacyjalistyčnych Respublik — EUSSR — takuju abrevijaturu jon prydumaŭ.

Brejvik dzielić jeŭrapiejcaŭ na try jeŭrapiejskija rasy. Biełarusaŭ jon adnosić da nardyčnych narodaŭ, da nardyčnaha typu. Jon piša ŭ svaim manifieście, što ŭ Biełarusi, hałoŭnym čynam, u paŭnočnaj jaje častcy, da 1990 hoda pražyvała 50% ludziej nardyčnaha typu, ciapier zastałosia ŭsiaho 30%, a da 2070 zastaniecca nie bolš za 15% ludziej nardyčnaha typu.

U jakaści prykładu nacyjanalistyčnaj partyi jon čamuści pryvodzić Libieralna-demakratyčnuju partyju Hajdukieviča.

Teraryst piša, što pieršaja ž kraina, jakaja pasprabuje vyjści z-pad hiehiemonii JESSSR \ ZŠA ŭ Jeŭropie, atrymaje šmatlikija prablemy: «Tamu ni Italija, ni jakaja-niebudź inšaja maleńkaja kraina nie pojdzie suprać Jeŭropy. Navat Sierbija abrała zastupnictva EUSSR / US [jak jon heta abaznačaje] zamiest taho, kab ryzyknuć apynucca ŭ jakaści novaj Biełarusi».

Teraryst šmat padarožničaŭ. U śpisie krain, dzie jon pabyvaŭ abo jakija jon vyvučaŭ, značacca: Šviecyja, Danija, Vialikabrytanija, Hiermanija, Polšča, Biełaruś, Francyja, Aŭstryja, Vienhryja, Charvatyja, Litva, Estonija, Łatvija, Ispanija, Kipr, Malta, ZŠA, Turcyja, Mieksika, Kitaj, Nihieryja, Kot-dJIvuar, Libieryja.

Pa słovach šefa nacyjanalnaj palicyi Śvienunha Słonhiejma, internet-adkryćcia padazravanaha dazvalajuć vykazać zdahadku, što jon prytrymlivaŭsia ultrapravych antymusulmanskich pohladaŭ

Na piersanalnaj staroncy ŭ Facebook Brejvik nazyvaje siabie chryścijaninam i kansiervataram, a siarod svaich zachapleńniaŭ jon pakazaŭ bodybiłdynh i masonstva.

Brejvika, jakoha abvinavačvajuć u padvojnym terakcie, što zabraŭ žyćci jak minimum 93 čałaviek, ličyć rasijskaha premjera Uładzimira Pucina hodnym pavahi. Pry hetym žychar Narviehii adznačaje, što rasiejski palityk ciažka paddajecca psichaanalizu. Brejvik kaža, što nie chacieŭ by być voraham Pucinu, paviedamlaje BBC.

U manifieście vyjaŭlenyja frahmienty, skapijavanyja z prac amierykanskaha padryŭnika-adzinočki Tedzi Kačyńskaha, taksama viadomaha jak «Unabombier». U pryvatnaści, zajava narviežca ab tym, što jaho dziejańni byli «žachlivyja, ale nieabchodnyja», faktyčna paŭtaraje słovy Unabombiera. Amierykaniec rassyłaŭ bomby poštaj u pieryjad ad 1978 da 95-ha. Jon vystupaŭ suprać techničnaha prahresu.

Anders Brejvik ździejśniŭ biesprecedentnuju ataku na narviežskaje hramadstva z metaj źmianić jaho, paviedamlaje narviežskaja dziaržaŭnaja teleradyjokampanija NRK sa spasyłkaj na jaho advakata Hiejra Lipiestada. «Jon chacieŭ pieramienaŭ u hramadstvie, dla jakich, na jaho dumku, patrabavałasia revalucyja. Jon chacieŭ napaści na hramadstva i jaho strukturu», — skazaŭ advakat u niadzielu.

Brejvik pierakonvaje palicyju, što taksama dziejničaŭ adzin. Ciapier jon znachodzicca pad vartaj. Jamu pahražaje da 21 hod turmy. Heta maksimalnaje pakarańnie pa narviežskim zakonach.

• 0
• 0
• 0
• 0
• 0
• 0