Hieroj, zdradnik, achviara

Pryznańnie Ŭładzisłava Michajłava adrazu stała adnoj z najbolš papularnych temaŭ biełaruskaha LJ. Post pad nazvaj «Važna» byŭ vystaŭleny Michajłavym u niadzielu ŭ 20:55, za paniadziełak sabraŭ 336 kamentaroŭ. Heta bolej, čym niadaŭni chit łajvdžornału "Zianon-chop".

«Heta – ŬČYNAK». Piša ŭ pieršym komencie žž‑karystalnik agafon_bel. «Pavažaju. Respekt», ‑‑ padrymlivaje Ŭłada policyja. Ant1killer chvalić chłopca i vykazvaje jamu svaju pavahu za toje, što jon znajšoŭ śmiełaść va ŭsim pryznacca.

U svaju čarhu Aleś Kazakoŭ (Alyaksandr), pra jakoha «NN» pisała ŭ minułym numary, abiacaje pry sustrečy abaviazkova raźbić tvar Michajłavu. «Praz takich, jak ty, ja zaraz znachodžusia tut i navat na chvilinu nie mahu pajechać u Biełaruś», ‑‑ piša Kazakoŭ. Słovy Alesia znajšli stanoŭčy vodhuk u inšych karystalnikaŭ «Žyvoha žurnała».

Revanshist vykazaŭsia nastupnym čynam: «Napišy lepš uspaminy i vydaj knihu. Tolki dobruju, biaz pluhkaści i soplaŭ pra demakratyju i zmaharoŭ. Ja pačytaju z asałodaj. Lepšaje, što ty zmožaš zrabić dla siabie i navakolnych – heta detalova raśpisać, što i jak było. Dla nas važnyja technalohii raboty HB, a nie pakajańni zabłukałych aviečak». Jaho padtrymlivaje aquamber: «Kniha stanie lepšym abaroncam ad budučych «pretenzijaŭ» orhanaŭ».

Uvahu błohieraŭ taksama pryciahnuła fraza pra toje, što Ŭład Michajłaŭ vioŭ nia tolki dvajnuju, ale i «trajnuju hulniu», jany padrabujuć padrabiaznaściaŭ hetaj spravy. Kiryla kaža, što «skazaŭšy «A» treba kazać i «B» ‑ u čym zaklučałasia tvajo supracoŭnictva i jak jano mahło zaškodzić tvaim siabram»?

Vojur vykazaŭ svajo mierkavańnie nastupnym čynam: «Čałaviek pryciahvaje hrać pa tych ža praviłach, što i hraŭ raniej ‑ zarablaje sabie bały. Pijar, jaki moža raźviarnucca ŭ vyniku takoj zajavy, i padtrymki takoha «ŭčynku» nadaść upeŭnienaści inšym słužkam u svajoj pravacie i biezpakaranaści».

«Čuvak! Nu pahadzisia, nie darma ja tabie pa rožy ŭ Biełastoku źjeździła. I darma ty mnie kryčaŭ: «Dzievačka! Ty chto takaja»? – piša varjatka_aa.

Dobry_dzen napisaŭ: «Złom nie pieramožaš zło. Luboje pakajańnie – heta mocny krok. Ad pamyłak nichto nie zastrachavany». Błohier nikolaev: «Ja dakładna nia stanu jaho abražać. Jon znajšoŭ u sabie moc, a ja pavažaju mužnaść... Zrazumieła, ja praz heta nia staŭ daviarać jamu bolš, ale ž jon ‑ čałaviek, i kali jon praciahnie mnie ruku, ja pacisnu jaje, bo ja taksama čałaviek, a nie «nośbit idealohii». Pacisnu nie jak tavaryšu, a jak zvyčajnamu čałavieku, što zrabiŭ mnie krok nasustrač i praciahnuŭ dałoń...» Aliaks: «Asabista ja takim, jak ty, usio ž davaŭ by amnistyju za ŭłasnaje pryznańnie. Ale tolki paśla pieramohi».

• 0
• 0
• 0
• 0
• 0
• 0
• 0
• 0