Da biełaruskaj pierabudovy — čatyry hady?
...A kali spravy buduć zusim dreń — šukać achviarnuju hałavu dla publičnaha pakarańnia doŭha nie daviadziecca. Piša ŭ svaim błohu Alaksandar Kłaskoŭski.
Ujaŭlaju, jak čuchajuć patylicu čynoŭniki, raspracoŭvajučy Dyrektyvu №3. Jana, paviedamiŭ ŭčora ŭ Navapołacku Alaksandar Łukašenka, budzie pryśviečanaja pytańniam ekanomii dy aščadnaści.
Farmuloŭka adrazu sparadziła adčuvańnie deža-viu.
I ja zhadaŭ: była ž cełaja piacihodka pad lozunham ekanomii dy aščadnaści!
Hety kurs abvieściŭ Brežnieŭ na XXVI źjeździe KPSS u 1981 hodzie.
Tady prahučaŭ jahony afaryzm "Ekanomika musić być ekanomnaj". (Fraza ŭvajšła ŭ anekdoty.)
Karaciej, prezentuju raspracoŭščykam dyrektyvy krynicu tvorčaha natchnieńnia — pryniatuju pavodle zakliku hieneralnaha sakratara pastanovu CK KPSS i Savietu ministraŭ SSSR "Ab uzmacnieńni pracy pa ekanomii i racyjanalnym vykarystańni syravinnych, paliŭna-enerhietyčnych dy inšych materyjalnych resursaŭ".
Jak pišuć u reklamnych tekstach — "usio ŭklučana":)
Kali ž razvažać surjozna, dyk aficyjnamu biełaruskamu kiraŭniku napeŭna dobra viadoma, što biaskoncyja dyrektyvy savieckich časoŭ dapamahali ekanomicy jak chvarobie kašal.
Moža, sens u tym, što pryznačajecca adkazny za vykanańnie — premjer Sidorski?
Kali spravy buduć zusim dreń — šukać achviarnuju hałavu dla publičnaha pakarańnia doŭha nie daviadziecca.
Ale ž ad taho, što palaciać ministerskija hałovy, lahčej nia stanie.
Kali ŭžo brać historyju, dyk kurs na ekanomiju i aščadnaść, abvieščany KPSS na pačatku 80-ch, staŭsia žachliva niedalnabačnym, palijatyŭnym. Zamiest taho kab pajści na rašučyja reformy, stali prymušać narod ekanomić na zapałkach. Chvarobu zahnali ŭ siaredzinu. Nieŭzabavie pačałasia vostraja kryza — ź dzikim deficytam usiaho, kartkavaj systemaj i pakutami prostaha ludu.
Ci chopić ciapierašnim biełaruskim viarcham prahmatyzmu, kab pierasiahnuć praz zababony dy strach pieramienaŭ?
Darečy, siarod analitykaŭ jość versija, što "biełaruskaja madel" u minijatury paŭtaraje evalucyju savieckaj.
Peŭnyja rysy padabienstva sapraŭdy ŭražvajuć. XXVI źjezd abvieściŭ pachod za ekanomiju i bieražlivaść, kali niekankurentnuju dziaržaŭnuju haspadarku pierastali ratavać naftadalary.
Dyk što, da biełaruskaj pierabudovy — čatyry hady?
Chaj by sabie ŭ našym saŭkovym rymejku siužet ruchaŭsia trochi chutčej:)
P.S. Nazvu dyrektyvy možna padkaracić. Kali pierakłaści, dyk "ekanomija" i "aščadnaść" — adno i toje ž :)
Kamientary