U Baranavičach vyklikajuć u milicyju ŭdzielnikaŭ Narodnaha schodu, jaki prajšoŭ u horadzie 8 kastryčnika.
Jak paviedamiŭ kiraŭnik Baranavickaj haradskoj arhanizacyi ruchu «Za Svabodu» Viktar Syryca, ranicaj 4 listapada jamu patelefanavaŭ supracoŭnik milicyi i zaprasiŭ pryjści ŭ hety ž dzień u haradski adździeł unutranych spraŭ.
«Tam u mianie pytalisia ab maim udziele ŭ Narodnym schodzie. Ja nie ŭtojvaŭ, što braŭ udzieł u jaho padrychtoŭcy i praviadzieńni. Pry hetym zajaviŭ, što jon byŭ praviedzieny ŭ adpaviednaści z zakonam ab respublikanskich i miascovych schodach, — skazaŭ Syryca. — Spačatku ŭ milicyi skłali pratakoł apytańnia, zatym administracyjny pratakoł u dačynieńni da mianie za arhanizacyju i ŭdzieł u niesankcyjanavanym masavym mierapryjemstvie. Paśla hetaha ŭručyŭ pozvu ŭ sud na 10 listapada».
4 listapada ŭ milicyju taksama vyklikali baranavickaha aktyvista Abjadnanaj hramadzianskaj partyi (AHP) Ryhora Hryka.
Pavodle jaho słoŭ, 3 listapada jon atrymaŭ pozvu, ź jakoj vynikała, što jon pavinien źjavicca ŭ Baranavicki HAUS u jakaści śviedki.
«U milicyi mnie nie skazali, pa jakoj spravie ja prachodžu jak śviedka, — adznačyŭ Hryk. — Usie pytańni, jakija mnie zadavali, tyčylisia Narodnaha schodu, jaki prajšoŭ u našym horadzie 8 kastryčnika. U pryvatnaści, adkul ja pra jaho daviedaŭsia, čamu pryjšoŭ na jaho. Ja pajšoŭ ź milicyi paśla taho, jak padpisaŭ pratakoł apytańnia. Jano doŭžyłasia prykładna 15 chvilin».
Na dumku Syrycy,
takim čynam miascovych aktyvistaŭ sprabujuć zapužać pierad zapłanavanym u Baranavičach na 12 listapada čarhovym Narodnym schodam.
«Ja taksama nie vyklučiu, što arhanizataraŭ schodu mohuć pasadzić na sutki, kab izalavać na čas praviadzieńnia schodu», — zajaviŭ Syryca.
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu24
Kamientary