Biełaruski chakiejny kłub vystupiŭ z aficyjnaj zajavaj.
Chakiejny kłub «Dynama» (Minsk) 8 listapada vystupiŭ z zajavaj «Staŭleńnie da kłubaŭ pavinna być roŭnym!», u jakoj rezka asudziŭ pavodziny hulcoŭ i hałoŭnaha treniera čechaŭskaha «Viciazia» ŭ kancoŭcy matča, jaki prajšoŭ 6 listapada, i vykazaŭ niezdavalnieńnie miakkaściu sankcyj, jakija nakłaŭ na kamandu haściejspartyŭna-dyscyplinarny kamitet KCHŁ.
«Dynama» pryznaje, što «pavodziny asobnych balelščykaŭ vyjšli za ramki dazvolenaha, tamu ŭžo na najbližejšym matčy čempijanatu buduć arhanizavany dadatkovyja miery biaśpieki».
U toj ža čas razhlad incydentu na pasiadžeńni SDK KCHŁ «moh być bolš usiebakovym, kali b na jaho akramia pradstaŭnikoŭ «Viciazia» było b zaprošana i kiraŭnictva CHK «Dynama». «Hetaha, na žal, nie było zroblena, i my nie zmahli pradstavić na pasiadžeńni dadatkovyja dokazy viny kamandy haściej u zdareńni», — adznačajecca ŭ zajavie.
«Vidavočna, što hałoŭnym vinoŭnikam hučnaj kancoŭki hulni źjaŭlajecca hałoŭny trenier „Viciazia“ Andrej Nazaraŭ,— ličać u „Dynama“. — Razumiejem, jak ciažka vynosić surjoznyja sankcyi ŭ adras pradstaŭnika trenierskaha štaba zbornaj Rasii».
«Dynama» ličyć niekarektnym razhladać sudziejstva ŭ jakaści pieršapryčyny pavodzinaŭ Nazarava i jaho padapiečnych: «Pahladzicie kancoŭki niadaŭnich matčaŭ „Viciazia“ ŭ Ryzie i Popradzie — niaŭžo i tam brudnyja pavodziny asobnych hulcoŭ „Viciazia“ vyklikany pavodzinami hledačoŭ abo sudziejstvam? Daŭno zrazumieła, što ŭstanoŭkaj vyšejšaha kiraŭnictva CHK „Viciaź“ źjaŭlajecca kroŭ na lodzie jak u pramym, tak i ŭ pieranosnym sensie. My pakazvajem maleńkim dzieciam nie škołu chakieja, a škołu bandytyzmu, kali chakieist „Viciazia“, „prafiesijanał“, padjazdžaje zzadu i podła nanosić rezki ŭdar u śpinu, a zatym pa nyrkach i inšych žyćciova važnych orhanach. Tut užo nie rehłamient KCHŁ pavinien uvachodzić u siłu, a artykuły Kryminalnaha kodeksa. Na vačach 15.000 hledačoŭ i miljonnaj teleaŭdytoryi ŭčyniajecca złačynstva. A jakoje pakarańnie?»
Kiraŭnictva «Dynama» «pravodzić kansultacyi z kalehami ź inšych kłubaŭ lihi». «Nam darahija našy chakieisty, i my budziem ich abaraniać. KCHŁ patrabuje ad nas harantyj biaśpieki — i heta pravilna. Ale dzie harantyi samoj lihi, što jana abaronić našych chakieistaŭ ad samavolstva hulcoŭ „Viciazia“ paśla adkrytych pahroz Andreja Nazarava „razabracca ŭ Čechavie“? Samaje strašnaje, što situacyja, padobnaja da niadzielnaj, moža adbycca ŭ nastupny raz u lubym inšym horadzie KCHŁ. Taki chakiej, kali na lod vypuskajuć adrazu niekalki bajcoŭ u adnoj źmienie, u Minsku dakładna nie patrebny. Na naš pohlad, nie patrebien jon i ŭsioj lizie», — havorycca ŭ zajavie.
«Luboje pakarańnie praduhledžvaje dalejšaje vypraŭleńnie, — adznačajuć u „Dynama“. —
Ale nie ŭ vypadku „Viciazia“. Tafhai adbyvajuć dyskvalifikacyi i spakojna atrymlivajuć nastupnyja».
«Dynama» ličyć metazhodnym chadajničać pierad prezidentam KCHŁ ab «kudy bolš strohich mierach u dačynieńni da hałoŭnaha treniera „Viciazia“ (dźvie hulni za nienarmatyŭnuju leksiku, nieprystojnyja žesty, ukazańnie tafhajam vieści brudny chakiej i kidańnie klušak na trybuny — heta ništo dla takoj situacyi), a taksama ab vypracoŭcy zrazumiełaj i prazrystaj stratehii ŭ dačynieńni da pastajannych biasčynstvaŭ na lodzie kamandy z Čechava».
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud18
Kamientary