Biełaruskija supiermarkiety techniki jašče nie pradadzienyja ni rasijcam, ni jeŭrapiejcam.
Źviarnucca ŭ internet-kramy ci ŭ sałon? Aščadzić $100 ci atrymać harantyju servis-centra i mahčymaść «pamacać» tavar svaimi rukami? Taki nialohki vybar staić pierad biełarusami, jakija vybirajuć sabie bytavuju techniku. Z kožnym hodam kolkaść sietkavych kramaŭ raście, a ich prapanovy vyhladajuć usio bolš pryvabnymi.
«Naša Niva» raźbirajecca, nakolki raźvity rynak supiermarkietaŭ elektroniki ŭ Biełarusi.
Cyvilizavany handal
Hipiermarkiety i sałony va ŭjaŭleńni biełaruskich čynoŭnikaŭ vyhladajuć evalucyjnaj prystupkaj raźvićcia prodažaŭ. Rynki i internetkramy nibyta musiać admierci, nie vytrymaŭšy kankurencyi z «cyvilizavanym» handlem. I choć ambicyjnyja płany pa budaŭnictvie bujnych kramaŭ dalokija ad realizacyi, u krainie ŭžo pracujuć čatyry sietki. Chto vałodaje imi?
«Piaty elemient» (ZAT «Patya»)
Sietka ŭžo pradstaŭlena ŭ 16 haradach Biełarusi, u jakich znachodzicca kala 25 kramaŭ. Uładalnik «Piataha elemientu» — biznesmen Andrej Bałabin. Jahony pachod u rehijony — davoli ryzykoŭnaja zaduma, tym bolš u kryzisnyja časy. Adnak vyhladaje na toje, što jon pierapoŭnieny aptymizmam nakont budučyni svajoj sietki: «Ja viedaju, što my vyjhrajem za košt asartymientu. Dobra pradajecca siaredni cenavy siehmient i nižejšy za siaredni».
Bałabin nie admaŭlajecca i ad internet-handlu. Tam dziejnaść idzie ad imia PUP «Malitorh».
Kampanija atrymała indulhiencyju na budučyja mahčymyja pamyłki, staŭšy ŭ 2010 hodzie sponsaram Nacyjanalnaha alimpijskaha kamiteta. Jana apynułasia ŭ adnym šerahu z padraździaleńniami «Biełarusnafty» i «BiełŚvisBankam».
«Razumnyja rečy» (ZAT «Enierhapram»)
Sietka źjaviłasia jašče ŭ 1990-ja. Heta ciapier jana razrasłasia na 8 haradoŭ (usie abłasnyja centry, Orša i Babrujsk), a tady stvaralniki biznesu pačynali z pastavak techniki Moulinex. Dyrektar ZAT «Enierhapram» — Dźmitryj Parchimovič.
Raniej «Razumnyja rečy» byli na rynku ledź nie manapalistam, hod za hodam atrymlivajučy premiju «Vybar hoda». Ciapier kampanija zdała pazicyi, sastupiŭšy pieršynstva kankurentam.
«Elektrasiła» (AAT «Elektrasiervis i K»)
Jašče adzin daŭni brend na biełaruskim rynku, stvorany navat da prychodu da ŭłady Łukašenki. «Elektrasiła» taksama vyjšła ŭ rehijony, ale najmacniejšyja pazicyi zachoŭvaje ŭ Minsku, dzie znachodzicca siem kramaŭ sietki. Kiruje biznesam Andrej Chomič, samy małady z usich «kaleh» pa rynku.
«Karona Techna» (AAT «TytuńInviest»)
Prodažy elektroniki — dadatkovy biznes cyharetnaha mahnata Paŭła Tapuzidzisa. Padrabiazna pra jaho «Naša Niva» pisała ŭ №28 za hety hod. Biznesmen, jaki pačynaŭ svaju spravu ŭ Hruzii z cacačnych samalocikaŭ, prabiŭsia ŭ zakryty cyharetny rynak Biełarusi i maje z hetaha dastatkova hrošaj, kab trymać i viertalotny biznes.
Jahonaja «Karona-Techna» pracuje ŭ Minsku, Breście, Babrujsku i Viciebsku. Va ŭsich pieraličanych haradach kramy spałučajucca z hipiermarkietami «Karona».
***
«Prosiać vybrać televizar — i sychodziać kuplać jaho ŭ internecie»
Pra asablivaści pracy sałonaŭ techniki raskazvaje Andrej, pradaviec-kansultant sałona «Piaty elemient»:
«NN»: Nakolki kryzis udaryŭ pa pryjarytetach biełarusaŭ?
A: Najbolšy popyt źjavicca pierad Novym hodam, kali ludziam budzie ŭsio adno što kuplać, hałoŭnaje — kupić. Tady klijenty mohuć «vynieści» z kramy ledź nie ŭsio — i televizary, i chaładzilniki. U astatni čas pieravažna kuplajuć čajniki, prasy, drobnuju techniku. Vyklučeńnie — jurydyčnyja asoby, jany kuplajuć tavar na praciahu ŭsiaho hoda, nie źviartajučy ŭvahi na canu.
«NN»: Pa tvaich nazirańniach, kolki pracentaŭ ad tych, chto zachodzić u sałon, vychodziać z nabytym tavaram?
A: Papieršaje, bujnyja zakupy, jak niekalki televizaraŭ, robiać «kasu» za dzień. Jość častka klijentaŭ, jakija doŭha chodziać pa sałonie, uvažliva ŭčytvajucca ŭ techničnaje apisańnie… Ale jany prychodziać, kab «pamacać» rukami tavar, vybrany imi zahadzia ŭ internecie. Takija ludzi nie zajmajuć našaha času. Ale chapaje i inšych klijentaŭ, jany prosiać, umoŭna kažučy, padabrać im televizar da $500, vypytvajuć usialakija drobiazi paŭhadziny… A paśla pierapisvajuć na papierku nazvu madeli i sychodziać, kab kupić jaje ŭ internet-kramie.
- My vyrašyli paraŭnać ceny ŭ troch asnoŭnych krynicach tavaraŭ dla biełarusaŭ. Heta pieraličanyja vyšej sałony techniki, internet-kramy i kramy ŭ Polščy i Litvie, u jakich časta zakuplajucca našyja pradprymalnyja suajčyńniki.
Kamientary