Jany nie zadavolenyja nizkim zarobkam.
Pavodle staršyni Bieraściejskaj abłasnoj rehijanalnaj arhanizacyi Svabodnaha prafsajuzu biełaruskaha (SPB) Valancina Łazarenkava, na šmatlikich pradpryjemstvach u lutym ludziam zapłacili mienš, čymsia ŭ studzieni. U vyniku, na Bieraściejskim mašynabudaŭničym zavodzie i supolnym pradpryjemstvie «BiełKielmie» ŭ Biełaaziorsku adčuvajecca napružanaść u dačynieńniach pracaŭnikoŭ z administracyjaj, paviedamlajuć pravaabaroncy-viasnoŭcy. A pracaŭniki Baranavickaha stankabudaŭničaha zavodu «Atłant», nie zadavolenyja nizkim zarobkam (Br 1,2–1,3 młn rub.), užo źviarnulisia ŭ SPB pa dapamohu, bo nie bačać sensu razmaŭlać z kiraŭnictvam pradpryjemstva.
Valancin Łazarenkaŭ zaŭvažaje, što, pavodle aficyjnych źviestak, žychary Bieraściejskaj vobłaści zarablajuć mienš za ŭsich u Biełarusi, a košty na niekatoryja tavary i pasłuhi vyšejšyja, čym u siarednim pa krainie. Prafsajuzny aktyvist miarkuje, što varta čakać rostu chvalavańniaŭ, pakul zarobak nie budzie zabiaśpiečvać hodnaha ŭzroŭniu žyćcia. «U toj ža čas
vystupać adkryta ludzi aścierahajucca, bo bajacca represijaŭ z boku kiraŭnictva pradpryjemstvaŭ», –dadaje Łazarenkaŭ.
U Babrujsku ž situacyja advarotnaja: ludzi pad ciskam sychodziać. Staršynia piarvičnaj arhanizacyi Biełaruskaha niezaležnaha prafsajuzu na AAT «Biełšyna» Michaił Uścinovič raspavioŭ, što niekalki čałaviek napisali zajavy ab ustupleńni ŭ arhanizacyju, što nie spadabałasia ideołaham. «I tamu našu moładź cynična i nachabna pačało «adbivać» kiraŭnictva «Biełšyny». Naprykład, kali ichnyja baćki tut pracujuć, ich znachodziać i pačynajuć kazać, što syn ich hańbić, nahadvajuć, kolki im zastałosia da piensii, pahražajuć zvalnieńniem. Abo, naprykład, u adnaho chłopca tut žonka praktyku prachodzić, i jamu pahražajuć, što nie praciahnuć ź joj supracu. Inšamu kazali, što jahonuju žonku z dekretu nazad nie voźmuć. I taki šantaž – z kožnym. Naturalna, što paśla hetaha im zastajecca tolki adno – sychodzić z BNP», – raspavioŭ Uścinovič.
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary