Apazicyja zajaŭlaje pra hatoŭnaść da vybarčaj kampanii

Pradstaŭniki apazicyi hatovyja da majučaj adbycca vybarčaj kampanii, a pravaabaroncy — da nazirańnia za vybarami.

Tak, da vybarčaj kampanii «całkam hatovaja» Partyja BNF, paviedamiŭ jaje staršynia Alaksiej Janukievič.

«My ŭžo daŭno viadziem padrychtoŭku i pa vyłučeńni svaich členaŭ u akruhovyja i terytaryjalnyja kamisii, i pa vyłučeńni kandydataŭ u deputaty. Pravodzilisia sieminary, navučańnie patencyjalnych členaŭ vybarčych kamisij. Na praciahu apošnich čatyroch miesiacaŭ kiraŭnictva partyi i patencyjalnyja kandydaty ŭ deputaty vyvučali prablemy ŭ rehijonach. Centralny ofis praktyčna zaviaršyŭ raspracoŭku ahitacyjnych i mietadyčnych materyjałaŭ», — raskazaŭ palityk. Kandydataŭ na ŭdzieł u vybarach pavinien vystavić źjezd Partyi BNF, data jakoha budzie vyznačana na sojmie 23 červienia.

Pra hatoŭnaść da vybaraŭ zajaŭlaje i hramadzianskaja kampanija «Havary praŭdu!», jakuju ŭznačalvaje eks-kandydat u prezidenty Uładzimir Niaklajeŭ.

«My hatovyja vyłučyć svaich kandydataŭ u deputaty šlacham zboru podpisaŭ, i taki śpis kandydataŭ užo sfarmiravany, — paviedamiŭ namieśnik staršyni kampanii Andrej Dźmitryjeŭ. — Usie našy kandydaty buduć papularyzavać ideju hramadzianskaha dahavora. Takim čynam, my chočam zavajavać hołas „novaj bolšaści“ — tych ludziej, jakija zajmajucca sacyjalnymi prablemami i razumiejuć, što karani hetych prablem usio ž tojacca ŭ palitycy».

Abjadnanaja hramadzianskaja partyja taksama «daŭno hatovaja da vybaraŭ», zajaviŭ namieśnik staršyni AHP Leŭ Marholin.

«My vyznačylisia sa stratehijaj partyi na vybarach, u nas jość śpis śpikieraŭ, jakija pojduć kandydatami ŭ deputaty. U bližejšyja dni projdzie palitsaviet partyi, jaki vyznačyć datu źjezda pa vyłučeńni kandydataŭ u deputaty, i krychu paźniej — jašče adzin palitsaviet pa vyłučeńni našych ludziej u akruhovyja vybarčyja kamisii», — skazaŭ Marholin.

Sustaršynia arhkamiteta pa stvareńni partyi «Biełaruskaja chryścijanskaja demakratyja» (BCHD), eks-kandydat u prezidenty Vital Rymašeŭski zajaviŭ pra hatoŭnaść da aktyŭnaha bajkotu vybarčaj kampanii.

«My praviali abłasnyja spravazdačnyja kanfierencyi ŭ Homieli, Mahilovie, Hrodnie i Breście, na jakich abmierkavali taktyku bajkotu vybaraŭ. U Homieli ŭžo padadziena 20 zajavak na pikiety pa abmierkavańni z nasielnictvam pytańniaŭ vybaraŭ i bajkotu. U Mahilovie stvorany štab pa bajkocie. U nastupnyja vychadnyja my praviadziem takija kanfierencyi ŭ Minsku i Viciebsku. Tak što, dla kožnaj vobłaści, z ulikam miascovych asablivaściaŭ, my padrychtujem płany pa aktyŭnym bajkocie vybaraŭ», — paviedamiŭ palityk.

Da bajkotu vybaraŭ hatova i hramadzianskaja kampanija «Jeŭrapiejskaja Biełaruś», jakuju ŭznačalvaje eks-kandydat u prezidenty Andrej Sańnikaŭ.

«My jeździli pa rehijonach, pravodzili kansultacyi, i my bačym, što ludzi ŭsprymajuć vybary ŭžo navat nie jak dekaracyju, a jak niejki pachavalny rytuał, — zajaviŭ kaardynatar kampanii Alaksandr Atroščankaŭ. — Bajkot parłamienckich vybaraŭ — heta tolki častka kampanii pa ahulnym bajkocie dyktatury, jakaja budzie zasnavanaja na narodnaj padtrymcy».

Zahadzia pačali rychtavacca da nazirańnia za vybarami i pravaabaroncy. Inicyjatyva «Pravaabaroncy za svabodnyja vybary» pačała padrychtoŭku daŭno. My praviali šerah sieminaraŭ pa navučańni našych naziralnikaŭ, raspracavali formy dakumientaŭ i nieabchodnyja mietadyčnyja materyjały dla naziralnikaŭ. U pryncypie, my pryviazvajemsia da kalandarnaha hrafika kampanii, jak i rabili heta zaŭsiody. Paśla kožnaha etapu vybaraŭ my płanujem rabić spravazdaču, i vynikovuju spravazdaču paśla vybaraŭ», — raskazaŭ Valancin Stefanovič.

Pavodle jaho słoŭ, «Pravaabaroncy za svabodnyja vybary» majuć namier vystavić padčas parłamienckaj kampanii prykładna 50 čałaviek u jakaści naziralnikaŭ na praciahły termin. Astatnija dałučacca da nazirańnia padčas daterminovaha hałasavańnia i niepasredna ŭ sam dzień vybaraŭ.

«My nie stavim pierad saboj mety achopu jak maha bolšaj kolkaści vybarčych učastkaŭ. Ja ŭ hetym nie baču sensu, tamu što ščylnaje pakryćcio ŭčastkaŭ naziralnikami maje sens tolki tady, kali naziralniki sapraŭdy majuć mahčymaść praduchilać falsifikacyi i niejkim čynam upłyvać na chod vybarčaha pracesu, kab jon adbyvaŭsia ŭ adpaviednaści z zakanadaŭstvam. U nas, na žal, heta faktyčna niemahčyma», — skazaŭ jon.

Pavodle słoŭ Stefanoviča, asnoŭny ŭpor doŭhaterminovyja naziralniki buduć rabić na prymušeńnie uład da jaŭki na vybarčyja ŭčastki. «Kali budzie aktyŭnaja kampanija bajkotu vybaraŭ, i navat kali takoj kampanii nie budzie, pakolki hetyja vybary ŭžo mała kamu cikavyja,-to dla ŭłady hałoŭnaj zadačaj zastajecca zabieśpiačeńnie jaŭki vybarščykaŭ na vybary. Tamu my rychtujemsia nazirać za prymušeńniem da hałasavańnia», — adznačyŭ pravaabaronca.

• 0
• 0
• 0
• 0
• 0
• 0
• 0
• 0