Kazulinu padoŭžany režym specyjalnaha dyjetyčnaha charčavańnia
Pavodle słovaŭ advakata, da A.Kazulina pa-raniejšamu nie dapuskajuć niezaležnych uračoŭ.
Eks-kandydatu ŭ prezidenty lideru Biełaruskaj sacyjał-demakratyčnaj partyi (Hramada) Alaksandru Kazulinu padoŭžany ŭ kałonii režym charčavańnia «5B», jaki byŭ jamu pryznačany ŭ kancy minułaha hoda paśla praviedzienaj palitykam haładoŭki. Heta aznačaje, što A.Kazulin atrymlivaje śpiecyjalnaje dyjetyčnaje charčavańnie, vyzvaleny ad pracy, ale pry hetym udzielničaje ŭ abaviazkovych mierapryjemstvach atrada. Pra heta BiełaPAN paviedamiŭ advakat palityka Ihar Rynkievič. «Hetaje rašeńnie mnie paćvierdzili načalnik kałonii «Vićba-3», dzie adbyvaje pakarańnie A.Kazulin, i jaho namieśnik», — paviedamiŭ jon.
Nahadajem, z 20 kastryčnika pa 11 śniežnia 2006 hoda A.Kazulin pravodziŭ haładoŭku, kab pryciahnuć uvahu Savieta biaśpieki AAN da situacyi ŭ Biełarusi. Za čas haładoŭki jon schudnieŭ na 30 kiłahramaŭ.
Pavodle słoŭ I.Rynkieviča, da A.Kazulina pa-raniejšamu nie dapuskajuć niezaležnych uračoŭ. «Ni inicyjatyvy niamieckaha pasolstva — pasła Marcina Chiekiera, ni pradstaŭnikoŭ Mižnarodnaj arhanizacyi Čyrvonaha Kryža, jakija taksama chacieli pravieści abśledavańnie Kazulina, nie atrymali ŭchvały ŭ departamiencie pa vykanańni pakarańniaŭ. Heta značyć niezaležnych miedykaŭ da jaho nie dapuskajuć», — paviedamiŭ I.Rynkievič.
Advakat ličyć, što vychad z haładoŭki ŭ turemnym režymie dla A.Kazulina niemahčymy: «Siarhiej Skrabiec, jaki haładaŭ u turmie nie adzin raz, kaža, što tam patrebny rehularnyja prahułki, masaž, łaźnia, basiejn. Čym, uvohule, Skrabiec i zaniaŭsia paśla vychadu z kałonii». (S.Skrabiec taksama abjaŭlaŭ haładoŭku ŭ znak salidarnaści z A.Kazulinym, kali adbyvaŭ pakarańnie ŭ adnoj ź im kałonii. — BiełaPAN.)
13 lipienia 2006 hoda A.Kazulin byŭ pryznany vinavatym u «naŭmysnych dziejańniach, jakija hruba parušajuć hramadski paradak, <...> supravadžajucca prymianieńniem nasilla i źniščeńniem čužoj majomaści», a taksama ŭ «arhanizacyi hrupavych dziejańniaŭ, jakija hruba parušajuć hramadski paradak, źviazany ź jaŭnym niepadparadkavańniem zakonnym patrabavańniam pradstaŭnika ŭłady, što paciahnuła parušeńnie raboty transpartu, pradpryjemstvaŭ, i aktyŭnym udziele ŭ takich dziejńniach».
Eks-kandydata ŭ prezidenty pryhavaryli da pazbaŭleńnia voli na piać z pałovaj hadoŭ z adbyvańniem pakarańnia ŭ papraŭčaj kałonii ahulnaha režymu.
Ciapier čytajuć
Zahinuŭ biełaruski dobraachvotnik Vasil «Dzir» Rapicki10
Kamientary