Z usioj krainy

 Z usioj krainy

Vučeńniam kaniec

Hałoŭny štab Uzbrojenych siłaŭ Biełarusi navažany prapanavać na 2001 hod siakija-takija źmieny ŭ systemu aperatyŭnaj padrychtoŭki orhanaŭ kiravańnia biełaruskaha vojska z-za braku hrošaj na praviadzieńnie maneŭraŭ. Prapanoŭvajecca kamandava-štabnyja vučeńni pad kiraŭnictvam ministra abarony pravodzić adzin raz u dva-try hady. Astatni čas budzie addadzieny vučeńniam i treniroŭkam pad kiraŭnictvam kamandziraŭ armiejskich karpusoŭ i mabilnych siłaŭ. Prapanoŭvajecca taksama bolš aktyŭna pierachodzić da padrychtoŭki praz kamputarnyja hulni i z vykarystańniem elektronnych mapaŭ. Niama hrošaj, i nie pradbačycca. Ale ž, pravodziačy vučeńni na tapahrafičnych kartach zamiest realnych umovaŭ, dobra vajavać nie navučyš.

Pavodle BiełaPAN

Drybin adkryŭ front baraćby

Drybin, miastečka evakujavanych čarnobylcaŭ, staje centram hramadzkaj aktyŭnaści. Jašče nie zabyŭsia pratest u miascovym kałhasie, kali viaskoŭcy vylivali na ziamlu małako. A ciapier pratestavali nastaŭniki. Im taksama nie addavali zaroblenych hrošaj. Kali ŭžo amal dva miesiacy ludzi biez zarobku, što rabić? 30 miljonaŭ rubloŭ biudžet musiŭ byŭ vydatkavać drybinskim pedahoham na apłatu adpačynkaŭ. Davoli praciahły čas nastaŭnikam abiacali, što hrošy voś-voś pryjduć. Jarmošyn na ŭsiu krainu zajaviŭ, što da 20 lipienia z usimi raźličacca. «Pryjšło 20 lipienia, potym 21, 22, a kasy ŭ buhalteryi začynienyja!» 35 nastaŭnikaŭ Drybinskaj SŠ padali zajaŭku na pikiet. Pikietavać źbiralisia pobač z rajvykankamam. Faktyčna, jany adstojvali intaresy nia tolki svaje, ale i ŭsiaje vobłaści. Zapazyčanaść u Mahiloŭskaj vobłaści pierad nastaŭnikami składaje bolš za 700 miljonaŭ za dva miesiacy. Siaredni zarobak u nastaŭnika kala 40 tysiačaŭ z ulikam usich pierahruzak. Małady i 20 nie atrymlivaje. A tut nie addajuć i taho!

I pieramahli. Rajonnaje načalstva, praŭda, zastałosia niezadavolenaje aktyŭnaściu pedahohaŭ. A što dyrektarka SŠ padpisała zajavu na pikiet razam z padnačalenymi, tam usprymajuć jak «nierazumieńnie składanaj sytuacyi ŭ ekanomicy».

Symon Hłazštejn, Mahiloŭ

Złotnikaŭ vyjšaŭ z AHP

Z Abjadnanaj Hramadzianskaj Partyi vyjšaŭ ekanamist Leanid Złotnikaŭ. Złotnikaŭ razyšoŭsia z novym kiraŭnictvam partyi ŭ pytańniach palityčnaj taktyki. Jon choča balatavacca ŭ Pałatu pradstaŭnikoŭ, a Labiedźka – nie dazvalaje. Były staršynia viciebskaj abłasnoj arhanizacyi AHP Hienadź Murataŭ maje tyja ž namiery. A što – adnamu z takich Muratavych pašancuje. Dziela pryliku ž niekaha z demakrataŭ Łukašenka ŭ pałatu musić prapuścić.

B.T.

Karcaŭ — nievyjazny?

Vadzim Karcaŭ, maładafrontaviec, aŭtar «NN», jaki hod tamu, majučy harantyi polskich siabroŭ, sam admoviŭsia ad palityčnaje emihracyi, «emihravaŭšy» ŭ barysaŭski biznes, zaraz moža być naohuł pazbaŭleny mahčymaści vyjechać za miažu.

Miascovaja pašpartna-vizavaja słužba, zamianiŭšy ŭ suviazi z 25-hodździem Karcava jahony pašpart na novy, nie pieraniesła sa staroha štampu z dazvołam vyjaždžać va ŭsie krainy śvietu. Načalnik PVS Barysaŭskaha HAUS sp. Šarko, ščyraj dušy čałaviek, paviedamiŭ, što ankietnyja dakumenty sp. Karcava zatrymlivajucca Ŭpraŭleńniem KHB pa Mienskaj vobłaści «dla dadatkovaj pravierki» (jakaja moža ciahnucca hadami). «Značycca, u ŭłaściej jeść kakije-ta vaprosy k vam», — dadaŭ jon naprykancy hutarki.

Miž tym, u Varšavie, dzie ciapier prachodzić samit najbujniejšaj mižnarodnaj maładziovaj arhanizacyi — EDS (Eŭrapiejskija Demakratyčnyja Studenty), kudy byŭ zaprošany i Vadzim Karcaŭ, pradstaŭnikami Biełarusi była praviedzienaja admysłovaja presavaja kanferencyja, dzie jany zajavili pra adradžeńnie ŭ Biełarusi niekatorych savieckich metadaŭ palityčnaha pieraśledu.

Karcaŭ planuje źviarnucca ŭ haradzkuju prakuraturu sa skarhaj na dziejańni čynoŭnikaŭ, a taksama ŭ sud, kab usio ž abaviazać pašpartnaje biuro pastavić štamp. Jon čakaje taksama zaprašeńnia z aparatu polskaha Sojmu naviedać u vieraśni seminar dla maładych pradprymalnikaŭ z SNH.

B.T.

Novyja konsulstvy

45 biełaruskich dyplamatyčnych pradstaŭnictvaŭ dziejničajuć siońnia ŭ 39 krainach śvietu. Sioleta čakajecca adkryćcio Hieneralnaha konsulstva Biełarusi ŭ Bracisłavie, a paśla — u Miunchienie i Hamburhu. MZS starajecca zachavać maksymalna lhotny režym pajezdak hramadzianaŭ Biełarusi za miažu. Usio ž Baŭharyja ŭviała vizavy režym z 1 studzienia. A z nastupnaha hodu vizavy režym ŭvodzić Słavaččyna. Polšča i Vuhorščyna dumajuć zrabić heta dzieści ŭ siaredzinie nastupnaha hodu.

U Baranavičach vajujuć

***

Pračnuŭšysia rankam na svaim leciščy pad Baranavičami, haspadar pabačyŭ niejkaha złodzieja, što kapaje jahonuju bulbu. Zrazumieła, aburyŭsia. Milicyjantaŭ za horadam nia znojdzieš, telefonaŭ niama, i haspadar vyrašyŭ baranić svaju majomaść, jak heta robiać u halivudzkich filmach — z dapamohaj zbroi. Vyciahnuŭ sa schovanki niezarehistravanuju strelbu, padskočyŭ da złodzieja j pačaŭ źbivać prykładam. Pad čas adnaho z udaraŭ strelba streliła j paraniła haspadara lecišča ŭ žyvot. Złodziej źbieh, a haspadar zaraz u špitali.

***

Na minułych vychodnych u Baranavičy ź Miensku pryjechała bryhada aperatyŭnaha pryznačeńnia MVD v/č 5448, dziela «profiłaktičieskoj pomoŝi» miascovym milicyjantam. Sami milicyjanty klanucca, što nijakaj dapamohi nie zamaŭlali — bo ŭ horadzie chapaje svaich, dy jość jašče siaredniaja škoła milicyi. Mienčuki ž adrazu nakiravalisia na kirmaš i pačali prafilaktyčnyja ahlady dakumentaŭ. Jany, darečy, byli ŭ zialonaj vajskovaj formie, a na našyŭkach — tolki adznaki z hrupaj kryvi. Razahnali babulek, jakija pradavali sadavinu. Miascovaha milicyjanta, jaki musiŭ by ich supravadžać, nidzie nie było.

***

Užo kolki hadoŭ na Baranavickim vajskovym aeradromie, dzie raniej mieściłasia častka Dalokaj aviacyi, lažała zakinutaja vializnaja cysterna z kalarovaha metału. Paśla častka taja źjechała ŭ Rasieju, zastalisia tolki samaloty-źniščalniki. Adnak raptam źjavilisia la cysterny traktary dy ekskavatary, parezali jaje aŭtahienam na častki, ale tutaka j pabraŭ usich asoby adździeł. Kaštavała b taja cysterna, kali b trapiła ŭ łom, kala $15 000 — ścienka ažno 15 sm taŭščynioj. Śledztva ciapier raźbirajecca, jak trapiła cyvilnaja technika na zakryty aeradrom.

Rusłan Raviaka