TBM damahłosia čarhovaj pieramohi: u chutkim časie ŭsie abviestki ŭ elektryčkach buduć rabicca pa-biełarusku. Dziela hetaha specyjalisty z Tavarystva pierakłali ŭsie teksty — nazvy nasielenych punktaŭ, praviły biaśpieki, zvaroty da pasažyraŭ.
«My ich jašče i pierapracavali: ustavili, dzie mahli, słovy «kali łaska» i «łaskava prosim», jakich prosta nie było ŭ zvarotach», — kaža namieśnik staršyni TBM Siarhiej Kručkoŭ. Načalnik depo Biełaruskaj čyhunki Aleh Sidarovič kaža, što sprava pavinna kančatkova vyrašycca da kanca sakavika: «Treba tolki ahučyć i pieradać u Maskvu, dzie rabiłasia hetaja systema. Tam hukavy nośbit umantujuć u systemu ahučvańnia». Ahučvać budzie žančyna. Z kandydaturaj peŭnaści pakul niama: mahčyma, heta budzie supracoŭnica radyjo «Mir», jakoje rabiła tuju ž pracu dla metro.
TBM točyć kamień, ale zastajecca sfera, dzie biełaruskaja mova zastajecca praktyčna pa-za zakonam, — heta sudy. Za apošnija hady adzinym pracesam, dzie sudździa karystałasia biełaruskaj movaj, staŭ praces pa likvidacyi pravaabarončaha centru «Viasna». Siabar arhanizacyi Ŭładzimier Łabkovič atrymaŭ paśla pratestaŭ z nahody zakryćcia «Viasny» štraf bolšy, čym inšyja, bo patrabavaŭ biełaruskamoŭnaha pierakładčyka.
A časam u sudach pradmietam razhladu stanovicca sama biełaruskaja mova. Redaktar časopisu «Šachmaty» Volf Rubinčyk uletku 2003 h. byŭ zvolnieny z pasady zasnavalnikam časopisu — vydaviectvam «Adukacyja i vychavańnie», bo... rabotnikam vydaviectva nie spadabałasia mova vydańnia. Dakładniej, nie sama mova, a leksyka, jakoj karystaŭsia Rubinčyk.
Zvolnieny redaktar z takim rašeńniem nie pahadziŭsia, sprava ŭ listapadzie 2003 h. dajšła da sudu. Pa arhumenty abodva baki źviarnulisia da movaznaŭcaŭ z navukovymi stupieniami. Vydaviectva — da vykanaŭcy abaviazkaŭ dyrektara Instytutu movaznaŭstva NAN doktara filalohii, prafesara Alaksandra Łukašanca, Rubinčyk — da dacenta katedry historyi biełaruskaj movy BDU, kandydata filalohii Siarhieja Zaprudzkaha.
Poŭny varyjant artykułu hladzicie ŭ hazecie "Naša Niva".
Arkadź Šanski
Kamientary