Малады чалавек зваліўся з даху дома, які будуецца па вуліцы Багушэвіча ў мікрараёне Альшанка ў сераду, 13 мая, каля 12:00. Хуткую выклікаў выпадковы сведка.
Хлопец памёр да таго, як паспелі прыехаць медыкі.
«Следства ўстанаўлівае прычыну смерці, прызначаныя адпаведныя экспертызы», — паведаміў афіцыйны прадстаўнік УСК па Гродзенскай вобласці Сяргей Шаршаневіч.
Паводле яго слоў, пра матывы ўчынку і пра тое, было гэта самагубства ці няшчасны выпадак, казаць пакуль рана.
Загінулы родам з Пінска, але ўжо некаторы час жыў у Гродне. Любіў спорт: актыўна заўзеў за ФК «Нёман», у свой час займаўся боксам. У яго засталася жонка і аднагадовая дачка.
Апошні чалавек, з якім хлопец бачыўся і размаўляў па тэлефоне непасрэдна перад падзеннем з даху, — 18-гадовая дзяўчына, з якой ён сустракаўся яшчэ да вяселля.
Паводле яе слоў, малады чалавек хацеў развесціся з жонкай, а ёй нават паспеў падарыць пярсцёнак: «Мы былі знаёмыя амаль 2,5 года. Я хацела, каб ён быў з сям'ёй, а ён казаў, што не будзе без мяне жыць, што яму патрэбна толькі я і яго дачка. У апошні час ён наогул думаў з'ехаць з Беларусі».
Пра тое, што загінулы планаваў развод, кажуць і некаторыя яго сябры. Жонка хлопца на нашы пытанні не адказала, але ў статусе на старонцы ў сацсетцы напісала: «Яго больш няма, але я ўсё роўна яго кахаю» і «Ведай, я заўсёды цябе буду кахаць».
Цяпер чытаюць
У Польшчы арыштавалі былога кіраўніка беларускага «Паспалітага рушэння» — пагражае 10 год за наркотыкі23
Каментары