«Прыдумалі налепку «Выконвай хуткасны рэжым», памер яе 9,5 на 9,5 см, — піша заснавальнік крамы Symbal.by Павел Белавус. — Трэба ж неяк абараняць «хуткасны рэжым» ад русіфікацыі».
Фраза «Выконвай хуткасны рэжым» стала знакамітай пасля паслання Аляксандра Лукашэнкі да народа і парламента 19 красавіка гэтага года.
«Еду па дарозе. Траса, якую называюць прэзідэнцкай. Вывесілі табло «Выконвай хуткасны рэжым». Зразумела мне, што хацеў сказаць аўтар. Але едзе рускі чалавек або рускамоўны беларус: «Выконвай… Хуткасны… Але зразумеў, што «рэжым». Няўжо, думае, зноў пра дыктатуру Лукашэнкі. Што вы хацелі гэтым паказаць? 50% насельніцтва (з запасам кажу) зразумеюць, што патрабуе дарожнік або даішнік… Але астатнія ж не зразумеюць! Прыйшлося вярнуць назву нармальную».
Пасля гэтага выказвання дарожныя табло сталі масава пераводзіць на расейскую мову, між тым яны былі сярод апошніх бастыёнаў беларускай мовы ў публічнай прасторы.
Прагучала меркаванне, што гэтым выказваннем Аляксандр Лукашэнка спрабаваў залагодзіць кіраўніцтва Расіі. У прыватнасці, міністр культуры Расеі Мядзінскі выказваў заклапочанасць, што ў Беларусі «руская мова знікае з шыльдаў». Русіфікацыя Беларусі заўсёды была непісанай умовай фінансавай падтрымкі Аляксандра Лукашэнкі Масквой.
Каментары