«Сала як масла, такога нідзе не знайсці». Як сям'я са слуцкай вёскі ператварыла хатнюю гаспадарку ў брэнд
Для герояў нашумелага роліка з велізарным шматом сала з вёскі Лядна Слуцкага раёна важней за ўсё засаліць сала так, каб яно раставала ў роце.
Ад віруснага відэа — да народнай любові
У беларускім сегменце інтэрнэту іх праславіў адзін ролік: кавалак сала памерам метр шэсцьдзесят на пяцьдзясят пяць сантыметраў. Аднак за гэтай карцінкай хаваецца цэлая сямейная гісторыя, якая пачалася задоўга да з'яўлення сацсетак.
Сямейная справа даўжынёй у дзесяцігоддзі
Каця і Рома — тыя самыя вытворцы са Слуцка, якія ператварылі хатнюю гаспадарку сваіх бацькоў у пазнавальны брэнд «Прохар Мяса». Іх сем'і займаюцца фермерствам ужо больш за сорак гадоў. Раней трымалі жывёлу для сябе, потым пачалі прадаваць, а сёння маладое пакаленне ўзяло на сябе перапрацоўку, піша «Мінская праўда»..
«Мы з Ромам удваіх вядзём усю свінагадоўчую гаспадарку: ад вырошчвання да раздзелкі. Дапамагаюць, вядома, бацькі, і яго, і мае, брат і сястра мая таксама дапамагаюць. Гэта ўсё нашая агульная сямейная справа», — расказвае Каця.
Натуральны смак без «сакрэтных інгрэдыентаў»
Асартымент сямейнага канцэрна фармаваўся пад запыты пакупнікоў. Як узгадвае Каця, калісьці людзям было няёмка купляць гатовую каўбасу, яны аддавалі перавагу таму, каб круціць яе самім. Але час змяніўся, і на змену прыйшло жаданне знайсці той самы «хатні смак».
«Цяпер ужо і час іншы. І ва ўсіх, я так разумею, шмат працы і няма калі гэтым займацца. Прасцей купіць гатовую прадукцыю, — тлумачыць яна. Так у асартыменце з'явіліся сухія каўбасы, сальцісоны, паляндвіца і, вядома, сала. Інгрэдыенты для іх самыя простыя: часнок і кроп са свайго агарода, свае спецыі.
«Ніякага сакрэту ў нас няма. Проста людзі настолькі адвыклі ад натуральнага смаку, што для іх сам гэты смак і ёсць галоўны сакрэт нашай вытворчасці», — кажа Каця.
У Мінск за пакупнікамі яны не едуць — занадта далёка і шмат канкурэнтаў. Уся прадукцыя расходзіцца на Слуцкім рынку або проста з падворка.
Гісторыя, якая змяніла падыход да продажаў
Але ёсць адна гісторыя, якая змяніла іх падыход да продажаў. Аднойчы пажылы мужчына з Віцебска, які сумаваў па вясковым дзяцінстве, папрасіў даслаць яму сала поштай. Каця спачатку сумнявалася, але ўсё ж спакавала самы лепшы кавалак.
«Я ўзяла самы лепшы, самы прыгожы кавалак, які ў нас быў, нацерла яго спецыямі, часнаком, загарнула ўсё гэта ў плёнку, запакавала ў скрынку і адаслала яму па пошце. Ён, калі яго атрымаў, ператэлефанаваў. Мне аж здалося, што ён там ці не плакаў ад гэтага сала. Сказаў: «Ну вось, сапраўды такое сала як масла, нідзе не знайсці». І сапраўды смак дзяцінства вясковы, як у бабулі», — узгадвае Каця.
Без гонкі за рынкамі і маштабамі
Асаблівай размовы заслугоўвае параўнанне іх прадукцыі з сусветнымі стандартамі. Некаторыя блогеры ў сваіх аглядах ужо паспелі правесці паралель паміж беларускай паляндвіцай і іспанскім хамонам. Каця, маючы за плячыма дыплом інжынера-тэхнолага мясаперапрацоўкі, прызнаецца, што ведае тэхналогію вырабу знакамітага далікатэсу. Але пакуль на парадку дня — пашырэнне геаграфіі смакаў, а не вытворчых магутнасцяў.
«Не разарвацца, — тлумачыць яна. — Вельмі шмат працы на вёсцы: то пакасіць, то пакарміць, то перапрацаваць. Ёсць час скруціць паляндвіцу, а вось саліць хамон і чакаць паўгода-год, пакуль ён саспее, — гэта зусім іншая гісторыя».
Але і без хамона іх прадукцыя ўжо перакрочыла межы.
«Наша прадукцыя ўжо была нават там, дзе нас не было. І ў Егіпет вазілі, і ў Турцыю вазілі, хоць там, дарэчы, і свініну не ядуць. Але ёсць такія, хто пераехаў, дапусцім, у Турцыю, нашы беларусы ці рускія там атабарыліся, і бяруць ды туды вязуць», — з гонарам заўважае Каця.
Святы замест рэкламы
Такі падыход — увага да кожнага чалавека — стаў візітоўкай сям'і. Яны не наймаюць рэкламныя агенцтвы, а ладзяць святы для душы. Мінулай зімой на Слуцкім рынку яны арганізавалі сапраўдную ранішнюю імпрэзу: Дзед Мароз, Снягурка, дэгустацыя, песні і танцы. Сабралася больш за трыццаць чалавек — пастаянных кліентаў, для якіх паход на рынак стаў сапраўднай падзеяй.
«Я кажу: «Ну падарыць якую-небудзь палачку каўбаскі, зрабіць нейкі конкурс, розыгрыш. Затое мы класна правядзем час». Сабралася больш за трыццаць чалавек. Мы і спявалі, і танцавалі, і гулялі, і елі, і адпачывалі. Ой, было проста здорава, ведаеш, проста для душы», — дзеліцца эмоцыямі гераіня.
Сакрэт поспеху — у простасці
У эпоху маркетынгавых стратэгій і маштабавання сям'я са Слуцкага раёна даказвае, што самы надзейны рэцэпт поспеху просты: гэта сумленная праца і натуральны прадукт без выкарыстання кансервантаў, павага і ўменне ўбачыць у пакупніку не чэк, а жывога чалавека, які сумуе па сапраўдным смаку. Менавіта таму іх сала пахне дзяцінствам, а іх бізнэс працягвае расці, застаючыся ў душы такім жа маленькім і ўтульным, як родная вёска.
Слуцкія фермеры, якія ўразілі ўсіх вялізным кавалкам сала, ставяць новыя рэкорды ВІДЭА
Слуцкія фермеры паказалі гіганцкі апетытны кавалак сала — у тыктоку мільёны праглядаў
Чаму сала ў Беларусі даражэйшае за мяса? Патлумачылі фермеры
Сала — сапраўдны суперфуд. У чым карысць гэтага прадукту і колькі ён цяпер каштуе
Цяпер чытаюць
Уводзяць адказнасць за прапаганду гомасэксуальнасці, бяздзетнасці, а таксама за незаконнае прадстаўленне Беларусі на міжнароднай арэне24
Каментары
Какошнік жа ў масковіі запазычылі з Азіі