Месяц таму ў спарткомплексе «Стайкі» ўпершыню выбухнуў беларуска-расейскі шахматны кубак.
Не без дапамогі камітэту па адукацыі Менгарвыканкаму. Многія сумняваліся, што кубак адбудзецца: да апошніх дзён не было вядома, хто прыедзе і якія ўзнагароды атрымаюць пераможцы. Аднак арганізатары (сярод іх варта назваць расейскага арбітра Міхаіла Крукава, яго беларускага калегу Анатоля Аліпава і старшыню менскай абласной шахматнай фэдэрацыі Пятра Герасімовіча) з гонарам пераадолелі розныя бар’еры.
У Менск прыехалі майстры і кандыдаты з Расеі, Украіны, Казахстану. У галоўным турніры расейцам удалося «акупаваць» тры першыя месцы зь пятнаццаці. Маладыя менчукі, прэтэндэнты на майстарскае жазло (Мікола Аляўдзін, Міхаіл Гінзбург, Арцём Самсонкін), сваёй мэты не дасягнулі, бо апынуліся ў сярэдзіне табліцы. Няўдала выступіла віцэ-чэмпіёнка Беларусі Тацяна Бондар, якая паралельна з рыўкамі ў Стайкі здавала іспыты ў Акадэміі фізвыхаваньня: 3,5 бала з 14. Затое выхаванка СДЮШАР-11, 14-гадовая Алена Таірава, з 10 баламі выканала норму гросмайстра сярод жанчын. Бронзавая прызэрка турніру ўжо некалькі год выступае за Расею: тут для яе стыпэндыі не знайшлося. Пэўнай кампэнсацыяй за вынікі турніру «А» зьявілася перамога сьвядомага беларуса Валера Гардзяені ў турніры «B».
Стайкамі шахматная інтэграцыя, відаць, не абмяжуецца. Другі майстарскі «кругавік» у рамках беларуска-расейскага кубку заплянаваны на жнівень — аматары шахаў і матаў сустрэнуцца ва Ўладзімеры. На восень сп.Аліпаў абяцае турнір з гросмайстарскай нормай у Менску, а фінальны этап пройдзе ў зімнім Серпухаве.
* * *
Менскі гросмайстар Вячаслаў Дыдышка выйграў у Чэхіі невялікі, але даволі моцны турнір «Астраўскі конік» (6,5 з 9), на паўкроку апярэдзіўшы польскага калегу Артура Якубца і чэха Марака Вокача.
Цяпер чытаюць
Адцісканні з татам, урокі з мамай. Як жыве і вучыцца сям’я Севярынцаў у Вільні4
Каментары