Прастытуткі ў кенійскім горадзе Мамбаса адмовіліся ад сваёй звычайнай вопраткі і носяць цяпер на працу традыцыйныя ісламскія строі, якія закрываюць усё цела і галаву
‑ Я лепш пачуваюся ў буібуі, бо выглядаю ў ім годнай пашаны. Таксама гэта дазваляе пазьбегнуць затрыманьня паліцыяй. Мне трэба неяк зарабляць на жыцьцё — кажа адна з прастытутак, якую сустрэлі ўначы на вуліцы.
Іншая сьцьвярджае, што носіць буібуі, каб утаіць, кім ёсьць. — Я ведаю, што грашу, але мяне да гэтага прымушаюць — дадае яна.
Яна таксама кажа, што большасьць яе кліентаў — гэта жыхары Мамбасы, не турысты. Дзякуючы буібуі яны лепш могуць распазнаць жанчынаў з гэтага рэгіёну.
Мусульманкі абураныя
Рэлігійныя мусульманкі абураюцца, што прастытуткі апранаюць вопратку, прызначаную для іх. — Буібуі страціла свой прэстыж. Мне так сорамна, што часам хачу зьняць і выкінуць яе — кажа Марыям Сальма, жыхарка гораду.
Некаторыя мусульманкі сьцьвярджаюць, што большасьць прастытутак не паходзяць з Мамбасы. — Гэта нават не мусульманкі. Большасьць прыехала з Самалі і Эфіопіі. Яны носяць нашыя строі, каб пазьбегнуць прыніжэньня — лічыць Аша Хусэйн.
Рэлігійныя лідэры ціснуць на палітыкаў
Мусульманскі строй ня толькі дазваляе прастытуткам зьлівацца з натоўпам іншых жанчынаў — дзякуючы чорным буібуі яны таксама менш заўважныя на вуліцах ноччу. Дзякуючы гэтаму паліцыі цяжэй іх затрымліваць.
Прастытуткі не ўпершыню ўжываюць гэты мэтад. У 90‑я гг. яны рабілі гэтаксама, аднак дзеячы рэлігійных арганізацыяў злавілі і публічна адхвасталі іх. Цяпер мусульманскія кіраўнікі таксама ціснуць на ўрад, каб той заняўся гэтай справай. — Мы ня можам затрымаць гэтых жанчынаў, за гэта адказвае ўрад — кажа імам Шэйх Мухамад Каліфа — Сумна, што палітыкі абсалютна ігнаруюць гэтую праблему.
На яго думку, сытуацыя робіцца небясьпечнай, бо шмат якіх жанчын могуць быць выпадкова палічыць прастытуткамі.
Каментары