«Нам прыслалі пытанні, якія будзе задаваць Лукашэнка, і мы павінны на іх адказваць»
У Мінскім абласным кадэцкім вучылішчы, якое знаходзіцца ў Слуцку, 28 снежня чакаюць у госці Аляксандра Лукашэнку. Па словах навучэнцаў, кіраўнік дзяржавы прабудзе каля сарака хвілін, але рыхтуюцца да яго візіту цэлы месяц.
— Вакацыі ў нас перанеслі з 23 на 29 снежня, — падзяліліся навучэнцы.
Як распавялі карэспандэнту «Салідарнасці» юныя кадэты, да навагодняга балю ў будынку зрабілі рамонт, на тэрыторыі вучылішча — новая плітка і ліхтары. А ў самой навучальнай установе з’явіўся новы клас з камп’ютарамі. Сюды павінны прывесці кіраўніка дзяржавы, каб ён мог пагутарыць з вучнямі, якія лепш за ўсіх валодаюць замежнымі мовамі.
— А прэзідэнт ведае замежныя мовы?
— Напэўна, — бянтэжыцца кадэт.
Спецыяльна да візіту Лукашэнкі для навучэнцаў пашылі касцюмы і бальныя сукенкі за дзяржаўны кошт. А вось прычоскі дзяўчынкам прыйдзецца рабіць за свой.
— Да нас павінен быў прыехаць цырульнік з Мінска, але чамусьці ўсё адмянілася. Дзяўчынкам далі заданне купіць лакі, пенкі, гелі, шпількі. Цяпер яны трэніруюцца рабіць укладкі.
Не ва ўсіх выхаванцаў вучылішча ёсць бацькі. Некаторых выхоўваюць бабулі або іншыя сваякі, якім і прыйшлося ўзяць на сябе гэтыя траты.Па падліках навучэнцаў, прычоска абыйдзецца кадэтцы прыкладна ў 200 тысяч рублёў.
Маштабны рамонт вучылішча і выдаткі на прычоскі слуцкім кадэткам здаюцца дробяззю ў параўнанні з тым, як рыхтаваліся да сустрэчы з першай асобай краіны ў іншых рэгіёнах: каровам фарбавалі капыты, у паляўнічых забіралі стрэльбы і нават адстрэльвалі галубоў.
— Пакуль невядома, ці прыедзе ён з малодшым сынам, — распавядае іншы выхаванец кадэцкага вучылішча. — Але дзяўчынка рэпеціруе вальс, каб з Колем танцаваць.
— А як яе выбіралі? Быў нейкі кастынг?
— Нічога не ведаю, — кажа суразмоўца. — А вось з прэзідэнтам будзе танцаваць дзяўчынка з Віцебскай вобласці.
Усе хвалююцца, а раптам Лукашэнка яе спытае і даведаецца, што яна не з Мінскай вобласці. Што тады?
Але мяркуючы па размовы з кадэтамі з іншых класаў, ніякіх экспромтаў падчас візіту кіраўніка дзяржавы не чакаецца: усё пройдзе па сцэнары.
— Нам даслалі пытанні, якія ён будзе задаваць, — распавядаюць падлеткі. — І нашы адказы таксама.
Перад Новым годам нават кіраўнікі таталітарных краін хочуць выглядаць у вачах падданых як добры Дзядуля Мароз.І на самай справе, не будзе ж Лукашэнка ладзіць чыноўнікам публічную лупцоўку пры дзецях або пагражаць турмой начальнікам прадпрыемстваў.
Цяпер чытаюць
Хто той хлопец, які чакаў дзяўчыну пад дажджом у Мінску? Вы дакладна бачылі тое рамантычнае відэа12
Каментары