Вясна зноў адкладваецца: сіноптыкі прагназуюць маразы да 10 красавіка
Незвычайна халодны сакавік у гэтым годзе затрымлівае пачатак вясновых палявых работ больш, чым на два тыдні.
На большай частцы тэрыторыі Беларусі на палях захоўваецца снежны кілім вышынёй ад 20 см да 45 см, у Магілёўскай вобласці — да 60 см. Толькі па паўднёвым захадзе краіны снегу меней — ад 5 да 15 см.
Паводле прагнозу, у апошнія дні сакавіка і ў пачатку красавіка ў краіне чакаецца вельмі няўстойлівае надвор’е. Зноў пройдуць ападкі ў выглядзе снегу, мокрага снегу, па поўдні і паўднёвым усходзе — з дажджом.
Актыўнае таянне снегу ў большасці раёнаў краіны пачнецца ў канцы першай дэкады красавіка.
У гэты час чакаецца пераход сярэднясутачнай тэмпературы паветра праз 0С у бок павышэння, што характарызуе пачатак вясны.
Прамярзанне глебы ў гэтым годзе ў паўднёвай зоне і ў цэнтральных раёнах краіны невялікае — у асноўным не больш за 5–20 см.
Па меры сходу снегу адтаванне глебы будзе праходзіць даволі хутка.Аднак позняя вясна і позні сход снегу прыкметна скароцяць перыяд аптымальных агратэхнічных тэрмінаў сяўбы ранніх яравых культур. Пачатак сяўбы ранніх яравых культур на поўдні Беларусі стане магчымым толькі да канца першай дэкады красавіка.
Каментары