Пра гэта распавёў журналіст Генадзь Барбарыч, згадваючы акалічнасці свайго затрымання вечарам 26 красавіка пасля акцыі «Чарнобыльскі шлях».Нагадаем, што журналіст разам з калегам па «Радыё Рацыі» Аляксандрам Ярашэвічам быў затрыманы і да панядзелка ўтрымліваўся ў цэнтры ізаляцыі парушальнікаў на Акрэсціна.
Учора журналісты атрымалі па трое сутак арышту і вечарам былі выпушчаныя на волю.
«Затрыманне і нават збіццё журналістаў становіцца звычайнай справай. Перашкаджаюць працаваць, перашкаджаюць асвятляць падзеі.Магчыма, крыху раззлаваў міліцыянтаў інцыдэнт, які адбыўся з анархістамі, якіх затрымлівалі на вуліцы Багдановіча.
Адна з жанчын, якая праходзіла міма і ўбачыла гэта затрыманне і крыкі, пачала абараняць хлопца-анархіста, які крычаў: «Дапамажыце!». І тады гэта жанчына кінулася і пачала проста біць міліцыянта тым, што было пад рукамі. І аднаму даволі моцна разбіла галаву.Супраць яе пачалі крымінальную справу. Калі нас афармлялі на арышт у Савецкім РУУСе, мы былі побач з ёй, чулі як яе дапытвалі.
Яе завуць Валянціна. Яна ішла з нейкімі будаўнічымі прыладамі, з нейкім вядром, малаткамі, пілкамі і вось яна імі пару раз стукнула міліцыянта і даволі моцна яму разьбіла галаву.Магчыма, у той момант гэта неяк падагрэла эмоцыі і ўскосна спрыяла нашаму арышту. Ціск быў і працягваецца, каб абмежаваць актыўнасць, каб запалохаць грамадства, заціснуць, зрабіць пратэстныя акцыі нешматлюднымі. Улады ўвесь час нечага баяцца».
Цяпер чытаюць
Лукашэнка: Размова з Макронам доўжылася 1 гадзіну 40 хвілін. Пройдуць перамовы з прадстаўніком Францыі12
Каментары