Піша Уладзімір Падгол.
Міністр абароны Расіі Шайгу другі раз цягам месяца паставіў ўсіх грамадзян Беларусі перад фактам. Ды перад якім! 5 чэрвеня з экранаў дзяржаўных тэлеканалаў ён паведаміў аб размяшчэнні на нашых аэрадромах расейскага вайсковага авіазлучэння. Так мы даведаліся (не ад Лукашэнкі — ўладара беларускага неба і зямлі!) А ад расейскага генерала, што да нас едуць для рэкагнасцыроўкі афіцэры арміі РФ на чале з камандуючым ваенна-паветранымі сіламі Расіі. Сказана гэта было журналістам і нам з тэлеэкрана такім тонам, нібы гаворка ішла пра паездку ў нашы лясы ў грыбы.
Грамадзяне Беларусі праігнаравалі гэтыя навіны. Дысыдэнты і тыя, хто называе сябе апазыцыянерамі, не зрэагавалі нават так, як гэта зрабілі дысыдэнты ў Маскве падчас уводу савецкіх войскаў у Чэхаславакію. Так што самалёты ВПС Расіі, кіраваныя расійскімі лётчыкамі, неўзабаве пачнуць лётаць над нашымі галовамі, калі мы будзем араць і сеяць, корпацца на градах, клацаць па клаве, любіцца з каханкай ды песціць малых дзетак.
Прычым гаручкі расейцы будуць мець на парадак больш, чым нашы лётчыкі, і, адпаведна, будуць лётаць (падаць) значна часьцей. Тым хто ў гэтым сумняваецца, раю зірнуць статыстыку аб катастрофах у расійскай вайсковай авіяцыі. 42 здарэнні за 2006—2012 гады!
Юрыдычныя, паліталагічныя моманты размяшчэння ВПС Расіі ў нас ўжо прааналізаваныя экспертамі. Я б хацеў вынесці на абмеркаванне толькі іншае пытанне. Як вядома, хуткасці сучасных самалётаў такія, што баявая машына за час палёту аблятае дзясяткі населеных пунктаў, а часам залятае за мяжу, як гэта было не так даўно ў Літве, куды ляснуўся зьнішчальнік ВПС Расіі. Адсюль у мяне паўстала заканамернае пытанне: ці будзе лётчык з Расеі падчас катастрофы адводзіць свой самалёт ад населенага пункта цаной свайго жыцця? Так як гэта зрабіў у 1996-м Карват, за што стаў першым Героем Беларусі. І так як гэта рабілі іншыя лётчыкі войска Беларусі? Ці будзе выконваць загад свайго камандзіра: «Катапультавацца!»
Сёй-той, на чый дах абрынецца знішчальнік ВПС Расеі, не даведаецца ніколі. Нават калі той зьнішчальнік ляснецца на Дразды. Бо расейскія С-300 свой знішчальнік збіваць не будуць па прынцыпе распазнавання «Свой-чужы». Так што лепш падумаць тут і цяпер, покуль да залатога пісталета на зваліўся яшчэ адзін падарунак — сапраўдны самалёт.
Каментары