Пратэстанцкі пастар Эрнст Сабіла кажа, што царкву, якую ён будуе ў Асіповічах неўзабаве могуць адабраць мясцовыя чыноўнікі.
“Паводле ўказа Лукашэнкі, уласнікі якія набылі зямельныя ўчасткі для будаўніцтва, мусяць завяршыць гэтае будаўніцтва ў трохгадовы тэрмін. Калі ж не дабудуеш — цябе паводле таго ж закона і папярэджваць не павінны. Проста збіраюць неабходныя дакументы і выклікаюць у суд, дзе ставяць перад фактам. Па суседству са мною ўжо быў такі выпадак: чалавек узяў зямлю, але праз недахоп грошай не змог пабудаваць дом. І ў яго адабралі зямлю”, — расказаў пастар Сабіла.
“Раней, праўда, трэба было здаць будынак цалкам, з усімі камунікацыямі. Цяпер дастаткова падмурка, сценаў і даху.
Будаваць дом я пачаў ужо пенсіянерам, інвалідам другой групы. Але тады былі нейкія сродкі. Цяпер іх няма, а дом гатовы на 78% — месца, дзе я жыву з жонкай. А астатняя частка існуе толькі ў выглядзе падмурка.
Калі я яго не дабудую, яго могуць адабраць. Таму я і залямантаваў перад усім светам з працягнутай рукой, каб людзі, неабыякавыя да Беларушчыны, працягнулі хоць якую капейку. Бо гэты дом не проста царква, гэта прытулак для бедных беларусаў. Тут збіраецца мясцовае аддзяленне Таварыства беларускай мовы, сюды прыязджалі Улідзімір Арлоў, Ніна Стужынская...
Я падлічыў, што мне патрэбна прыкладна 10 тысячаў даляраў, каб паставіць хоць хліпенькія сцены і дах. Аднак гэта здыме кайданкі з маіх рук і надзене іх на рукі чыноўнікаў, якія ўжо не змогуць адабраць дом.Пакуль, дзякуй богу, у мяне яшчэ ёсць каля двух гадоў”, — падсумаваў Сабіла.
* * *
Пералічыць сродкі можна па адрасе: 213760, Магілёўская вобласць, г.Асіповічы, вул.Ленінская 40 Сабілу Эрнсту Канстанцінавічу.
Каментары