Яго вінавацяць у парушэнні патрабаванняў прэвентыўнага нагляду (арт. 421 КК).
У Першамайскім РУУС Менску Васілю Парфянкову паведамілі, што супраць яго пачатая чарговая крымінальная справа па артыкуле 421 за парушэньне патрабаваньняў прэвэнтыўнага нагляду.
Васіль апавёў карэспандэнту Свабоды, што 27 чэрвеня, калі ён прыехаў на чарговае адзначэньне ў пастарунак, інспэктар сказаў 28 чэрвеня прыйсьці да сьледчага.
«Са сьледчым мы доўга не размаўлялі, бо не было адваката. Я сказаў, што без адваката ніякіх паказаньняў даваць ня буду. Ён папярэдзіў, маўляў, май на ўвазе, што заведзена справа. Сьледчы сказаў, што пакуль я магу быць вольным. Сказаў, што, магчыма, будзе выклікаць на наступным тыдні. Сказаў, што яшчэ будзе апытваць маіх бацькоў».
Васіль Парфянкоў быў зьдзіўлены, што супраць яго зноў пачалі крымінальны перасьлед:
«На гэты момант у мяне толькі два парушэньні, а звычайна для пачатку крымінальнай справы трэба тры парушэньні. Сьледчы кажа, што два парушэньні — гэта ўжо сыстэма. І нібыта інспэктар убачыў у гэтым падставы для таго, каб пачаць справу».
Васіль расказаў пра свае парушэньні: адзін раз ён выйшаў у краму, а другі — крыху спазьніўся дадому. А менавіта ў гэты момант прыходзілі міліцыянты.
Відаць, я ім не патрэбны на волі, хаця ніякіх крымінальных праблем я ім не ствараю
«У выніку я ня быў дома пасьля 20 гадзінаў, хаця павінен быў. Мне неаднаразова казаў мой участковы інспэктар, што кожную раніцу на плянёрцы пытаюцца, як там той палітычны. Відаць, я ім не патрэбны на волі, хаця ніякіх крымінальных праблем я ім не ствараю. Ня ведаю, чаму яны за мяне так узяліся», — сказаў Васіль.
У траўні гэтага году Першамайскі суд Менску пакараў Васіля Парфянкова штрафам у 3 мільёны рублёў за парушэньне прафіляктычнага нагляду, які быў усталяваны за былым палітвязьнем пасьля адбыцьця паўгода арышту ў Баранавіцкім арыштным доме. Судзьдзя Юры Гарбатоўскі, які й раней судзіў Васіля Парфянкова, прызнаў, што 11 траўня той парушыў умовы прафіляктычнага нагляду, бо ў вечаровы час яго не было дома.
У канцы чэрвеня ў былога палітвязьня павінен быў скончыцца тэрмін прафіляктычнага нагляду.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку9
Каментары