Дэпутаты палаты прадстаўнікоў 13 лістапада прынялі ў першым чытанні папраўкі ў Працоўны кодэкс, якія прадугледжваюць змяненне парадку вырашэння працоўных спрэчак.
У прыватнасці, паведаміў намеснік міністра працы і сацыяльнай абароны Ігар Старавойтаў, законапраект дае права членам прымірэнчай камісіі самастойна шляхам правядзення неабходных кансультацый з прадстаўнічым органам работнікаў, наймальнікам, уласнікам ці ўпаўнаважаным ім органам урэгуляваць рознагалоссі.
Дакумент прадугледжвае, што ў кожны орган па добраахвотным прымірэнні, што ствараецца на змешанай аснове, павінен уваходзіць роўны лік прадстаўнікоў ад работадаўцаў і работнікаў. Калі згоды ў прымірэнчай камісіі бакам калектыўнай спрэчкі дасягнуць не атрымалася, яны маюць права звярнуцца па далейшы разгляд калектыўнай працоўнай спрэчкі да пасрэдніка ці ў працоўны арбітраж.
Законапраектам вызначана, што працоўны арбітраж з'яўляецца часова дзейным органам, што ствараецца па пагадненні паміж наймальнікам і работнікамі ў асобе іх прадстаўнічых органаў. Устаноўлены пэўныя патрабаванні да працоўных арбітраў. Ім можа быць асоба, якая мае, як правіла, вышэйшую юрыдычную ці эканамічную адукацыю і вопыт працы па спецыяльнасці не менш як пяць гадоў.
Каментары