Авіякампанія «Белавія» прыняла канчатковае рашэнне адмовіцца ад выканання рэйсаў у Сімферопаль у гэтым летнім сезоне, паведаміў журналістам 18 красавіка ў Мінску генеральны дырэктар кампаніі Анатоль Гусараў.
«Усім вядомая сітуацыя, якая адбываецца. Мы маем магчымасць выконваць палёты ў тым ліку і ў Сімферопаль, але попыт на гэты напрамак цягам лютага, сакавіка і пачатку красавіка ніжэйшы за мінулыя гады», — падкрэсліў Гусараў.
«Мы ўважліва адсочвалі, аналізавалі, параўноўвалі з папярэднімі гадамі. Нават з ліку тых пасажыраў, якія забраніравалі або набывалі білеты на гэты напрамак, быў адток пасажыраў. Гэта значыць людзі здавалі білеты. Таму прынята рашэнне, што сёлета мы ў Сімферопаль рэйсы, на жаль, выконваць не будзем», — сказаў гендырэктар «Белавія».
На пытанне, ці можа гэтае рашэнне быць перагледжана на працягу летняга сезона, Гусараў адказаў адмоўна: «Гэтае рашэнне канчатковае, мы ўжо перанакіравалі самалёты па іншых напрамках, у тым ліку на выкананне чартарных рэйсаў».
Рашэнне аб адмене летніх рэйсаў у Сімферопаль нацыянальная авіякампанія «Белавія» прыняла ў сувязі з іх «малой камерцыйнай загрузкай», заявіў 3 красавіка БелаПАН намеснік генеральнага дырэктара «Белавія» Ігар Чаргінец. Паводле яго слоў, гэтае рашэнне не звязана з прынятай 2 красавіка Еўракантролем забаронай на палёты ў Крым. «Мы прынялі рашэнне крыху раней. У панядзелак (31 сакавіка)», — сказаў Чаргінец.
У папярэднія гады рэйс Мінск — Сімферопаль карыстаўся папулярнасцю ў пасажыраў.
«Непапулярны сёлета, — сказаў Чаргінец. — Рэч у тым, што гэты рэйс выконваецца ўсяго тры месяцы на год — з пачатку чэрвеня па канец жніўня. Калі ён зараз не прадаўся, то калі яго прадаваць тады? Браніраванні былі, але вельмі мала ў параўнанні з аналагічным перыядам, напрыклад, мінулага ці пазамінулага гадоў. У некалькі разоў меншы продаж. Зараз прыкладна 100 чалавек у адзін бок забраніравалі. У папярэднія гады ў некалькі разоў больш браніравалі».
Разам з тым адміністрацыя Мікалаеўскай вобласці Украіны лічыць мэтазгодным адкрыццё чартарных авіярэйсаў з Мінска ў Мікалаеў.
Пра гэта паведаміў дырэктар дэпартамента эканамічнага развіцця, гандлю і турызму адміністрацыі Мікалаеўскай вобласці Міхаіл Тульскі 16 красавіка ў Коблеве (Беразанскі раён, Мікалаеўская вобласць) на сустрэчы з беларускімі журналістамі і прадстаўнікамі турфірм. Паводле слоў прадстаўніка адміністрацыі рэгіёну, вядуцца перамовы з беларускімі ўладамі, аднак прынцыповай згоды пакуль няма. «Мы мяркуем, што зносіны цераз чартарныя рэйсы або праз пастаянныя рэйсы Нікалаеў — Мінск дало б магчымасць забяспечыць нават бяспеку перамяшчэння, а самае галоўнае — зручнасць турыстаў», — зазначыў спецыяліст.
Каментары