Пачалося будаўніцтва другога энергаблока Беларускай атамнай электрастанцыі, паведаміў намеснік генеральнага дырэктара па капітальным будаўніцтве РУП «Беларуская АЭС» Андрэй Баркун.
«Раней быў выкапаны катлаван і выкананы бетонныя падрыхтоўкі. Цяпер вядуцца работы па ўзвядзенні фундамента будынка другога блока, — растлумачыў Андрэй Баркун. — На высокай стадыі гатоўнасці знаходзіцца рэактарнае аддзяленне. Работы там ідуць поўным ходам».
Паводле слоў намесніка генеральнага дырэктара, паралельна з другім энергаблокам актыўнымі тэмпамі вядзецца будаўніцтва першага. У бягучым годзе там запланавана выканаць работы па будаўніцтве фундаментнай пліты будынка рэактара да нулявой адзнакі, шахты рэактара — да адзнакі плюс 7,35 м, унутранай ахоўнай канструкцыі — да 8 м.
Акрамя таго, прадаўжаецца будаўніцтва аб'ектаў жыллёвай інфраструктуры для работнікаў БелАЭС. Чакаецца, што колькасць абслуговага персаналу да канца года павялічыцца да 3,4 тыс. чалавек (цяпер на будаўнічай пляцоўцы задзейнічана амаль 2 тыс. работнікаў).
БелАЭС будзе складацца з двух энергаблокаў сумарнай магутнасцю да 2400 (2х1200) МВт. Для яе будаўніцтва выбраны праект «АЭС-2006», які поўнасцю адпавядае міжнародным нормам і рэкамендацыям МАГАТЭ. Генеральным праекціроўшчыкам і генеральным падрадчыкам з'яўляецца аб'яднаная расійская кампанія ААТ «НІАЭП» - ЗАТ «АБЭ». Тэрміны рэалізацыі праекта адлюстраваны ў генеральным кантракце, які прадугледжвае ўвод у прамысловую эксплуатацыю першага блока атамнай станцыі ў лістападзе 2018 года.
У лістападзе 2013 года на Астравецкай пляцоўцы пачалі бетанаванне фундаментаў аб'ектаў першага энергаблока Беларускай АЭС.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі1
Каментары