БДУ хоча рэарганізаваць гуманітарны факультэт, студэнты супраць
Студэнты гуманітарнага факультэта БДУ пачалі кампанію супраць расфарміравання факультэта. Свой пратэст яны каардынуюць праз суполку «Укантакце».
Студэнты зазначаюць, што БДУ намераны рэарганізаваць гуманітарны факультэт, які сёння налічвае восем кафедраў.
У выніку плануецца стварыць факультэт мастацтваў, а іншыя кафедры перападпарадкаваць другім факультэтам. Студэнты супраць такога рашэння, бо яно прымалася адміністрацыяй без абмеркавання з імі.
Таксама студэнтаў турбуе магчымы перавод кафедраў дызайну і культуралогіі ў корпус БДУ па вуліцы Маякоўскага, 96, дзе цяпер займаюцца студэнты Дзяржаўнага інстытута кіравання і сацыяльных тэхналогій (ДІКСТ).
«Будынак знаходзіцца ў аварыйным стане: перакрыцці будынка драўляныя, адсутнічае ацяпленне, не працуе цепласетка, вокны згнілі і не адчыняюцца, касметычны рамонт зроблены на 10%, часткова не функцыянуюць прыбіральні… У санвузлах другога паверха адсутнічаюць дзверы кабінак, не працуе сталовая і г. д.
Акрамя таго, у будынку недастаткова навучальных месцаў для размяшчэння студэнтаў і выкладчыкаў спецыяльнасцяў «Дызайн (камунікатыўны)» і «Культуралогія»,— гаворыцца ў заяве ад студэнтаў.
Таксама студэнты выступаюць супраць «перападпарадкавання кафедры камунікатыўнага дызайну і кафедры культуралогіі Гуманітарнага факультэта Духану І. Н.» і «пераводу іншых кафедраў Гуманітарнага факультэта на іншыя факультэты БДУ».
Турбуюць студэнтаў і магчымыя кадравыя змены, звязаныя з рэарганізацыяй.
«У адваротным выпадку выкладчыкі пададуць заявы на звальненне ў сувязі з нежаданнем працаваць пад кіраўніцтвам новага начальства», — гаворыцца ў заяве.
Студэнты заклікаюць падпісваць заяву не толькі ад імя студэнтаў. У суполцы ёсць і заява на імя рэктара БДУ Сяргея Абламейкі для бацькоў: у ёй яны выступаюць як спонсары навучання.
230+360
Дэкан гуманітарнага факультэта Уладзімір Гурскі малюе не вельмі аптымістычную карціну: «Студэнты выступаюць супраць стварэння новага факультэта і пераводу часткі кафедраў і студэнтаў у корпус на вуліцы Маякоўскага.
Пакуль канчатковага рашэння аб рэарганізацыі факультэта няма. Але ініцыятыва сыходзіла ад рэктарата БДУ. Хочуць узяць кафедру мастацтваў ДІКСТ і кафедры культуралогіі і дызайну гуманітарнага факультэта і пакласці іх у аснову новага факультэта мастацтваў.
Члены рэктарата матывавалі такі крок тым, што Маскоўскі дзяржаўны ўніверсітэт стварыў такі факультэт, у Санкт-Пецярбургу стварылі такі факультэт. Больш аргументаў не было.
Але ствараць новы факультэт не мае сэнсу. Абедзве кафедры паспяхова функцыянавалі на базе гуманітарнага факультэта.
Гуманітарны факультэт застанецца. Але рэарганізацыя факультэта — гэта яго аслабленне за кошт драблення. Бо каля рэарганізацыя закране каля 30% студэнтаў факультэта. Гэта таксама і павелічэнне выдаткаў».
Гурскі не абмінуў увагай і будынак, у які пераедзе новы факультэт, калі будзе створаны.
«Будынак на Маякоўскага вельмі стары і знаходзіцца не ў лепшым стане. Там рабілі рамонт, аднак у гэтым будынку пачынаць справу трэба было з даху, а дах пакінулі, як ёсць. Рамонт заключаўся ў мантажы гіпсакардонных лістоў. Больш паказушнага рамонту быць не можа.
Да таго ж гэты будынак малы. У ім і так займаюцца 230 студэнтаў. А цяпер хочуць дадаць яшчэ 360 з нашага факультэта. Там проста не хопіць месца, не хопіць майстэрняў», — сказаў ён.
Атрымаць каментары членаў рэктарата пакуль не ўдалося.
Каментары